17.05.2026
德國足球乙組聯賽 第 34 週
SV Elversberg - SC Preußen Münster
Waldstadion an der Kaiserlinde
賽果：3:0 (2:0)
入場人數：9307 （1500 名作客球迷）
門票：季票

睇波咁多年見過好多足球殘酷既一面，上季最後一分鐘失波既痛黎到今日終於被療癒。

升班呢兩個字今季一直都斷斷續續同我地扯上關係，去到近季尾都唔敢話自己可以爭升班。呢兩個月頭五既對戰我地一直分，係去到上場主場輕取柏達邦拎到喺最後直路既主動權，大家先真係以拎第二直接升班為目標。去到最後一場作客對尾三又踢屎波，最後都係要等到今日先定結局….

賽前一個星期日日坐唔安食唔落，我記憶中上季踢附加賽嗰排好似無緊張到咁。好在星期六有 Nürburgring 24 小時耐力賽幫手分下心，星期日朝早五點就醒咗，可以開電視睇打發時間。等咗好耐終於九點可以出發。

今日場波係德甲時間下午三點半開波，我地過去兩年喺最後主場賽前都有搞賽前遊行，為球隊集氣。球迷組織喺星期五召集大家一齊去訓練場打氣，我地要做黎生去唔到，但睇片都覺得好感動，當日有幾百個球迷到場，個個仲講笑話感覺仲多人過地區聯賽時間既主場波。 去到今日賽前同樣比過去兩年有更多人黎到村內市集一齊出發，仲有勁多電視台黎播訪，沿路又有好多人喺路邊食花生。雖然我唔係喺度成長，但我可以話今日一定係條村史上最多人喺路上聚集既一日！！！

我地好希望今日係最後一次入主場，贏波就收 league；和波輸波就要睇其他兩隊踢成點，可能要踢附加賽週中去北上去禾夫斯堡、甚至係跌落第四乜都無。 呢個時候只有榜首同榜尾已經落實，其餘 16 位到最後一秒都仲可以有變數，所以話德乙係最好睇最刺激既聯賽係絕對無錯！（有人話德乙最精彩係因為每年都有唔同冠軍～～～至理名言！）

入場之後個緊張感慢慢無咗，開始接受命運既安排。場內喺賽前如常播客隊既會歌歡迎佢地來臨，今日仲特別向班作客球迷致敬，就算自己隊波已經篤地降班都依然選擇隨隊，呢啲可以同甘共苦既既先係球隊最需要既球迷！佢地既主席借我地向球迷宣布為咗多謝班球迷到場，請哂所有作客球迷飲啤酒！班球迷今日仲準備咗一個 choreo，喺看台前拉起 ULTRAS LIBERI 大布，看台內先噴出綠白紙碎同放出綠煙。

要等到工作人員帶風筒吹走啲紙碎先可以開波。今日有少少好似對 Magdeburg 嗰場咁全場氣氛高漲，贏波係唯一可接受既結果。上年唔知點解無諗過要落咒幫球隊升班，早幾日突然醒起可以落個咒試下，最後我㨂咗放棄啤酒。好似。。。。真係靈？ 開波十分鐘左右，傷癒正選復出既 Conte 就入波！！！！ 雖然佢係由賀芬咸借過黎，但佢係真 Saarländer – 我地係由莎蘭人帶我地領先去爭升班。唔夠五分鐘後，我地有第二個攻勢，Mokwa 射入第二球！！！

要再一次向班作客球迷致敬，就算咁早落後同埋隊波都開始散散地，佢地都完全無停過打氣。領先兩球我地都仲怕怕地，下半場有 Mokwa 入多一隊終於可以放心預先慶祝升班。 我地今年又升班啦！！！！！ 之前係咁講今季係劇本係可預計既爆冷，對住 SCP 我地戰績奇差，對住榜尾啲球隊我地都好危，但今日我地喺主場出賽有場內外萬人集氣，成功寫出「爆冷」劇本。。。 就連一開始比人睇死今季要降班最後反而成為第二直升上德甲。

最後嗰十分鐘我地盡唱飲歌，等到補時三分鐘完結後，球證吹雞完場確定我地成為 2026 年德乙亞軍，來季升班德國足球甲組聯賽，成為第 59 隊喺德甲亮相既球隊；將 Saarland 喺 33 年後再次踏上頂級聯賽既舞台，成為全州之光； 再一次寫下球隊歷史新一頁。 賽前其實諗咗好多如果，然後有好多野想講，最後真係完夢之後心情反而異常平靜。其實仲有好多野想講，不過我要啲時間回想一切先。。。。

呢十年來經歷過三次附加賽升班失敗同三次升班，足球呀足球，點解你可以令人又愛又恨？

呢場波完結後到足總盃首圈之間相隔十三個星期，好耐無試過有咁長既暑假！！！！！！ 八月再見～～～～～