08.08.2026
季前熱身賽
RCD Mallorca - SV Elversberg
Estadi de Son Moix
賽果： 1:1 (0:0)
入場人數： 5,635 （100 名作客球迷）
門票： 30€
呢幾年上咗職業聯賽之後，球隊開始會喺暑假或者歇冬期間去其他國家集訓，但佢地次次都係出發前一個月多啲先公布行程。 其他大型球隊都會一早公布哂集訓行程，就算有啲比賽係閉門都會比球迷有個知字，等有興趣既人都可以自己安排相關行程。 今次又係比賽前一個月都無先話會去作客馬略卡，大佬，八月係暑假高峰期，咁遲先講點請假呀？仲要得返貴機票同酒店！！！
一開始真心嬲，嬲住睇酒店同機票，住兩晚要近一千歐，仲要已經唔㨂啲咩靚酒店，最後果斷放棄。去到賽前兩星期，唔知點解有個衝動好想去，難得終於有個原因比我去 Mallorca，嗰刻甚至考慮即日來回，但場波九點先開波，完場後再無機返德國，點都要留一晚。 嗰刻既衝動同我講：錢解決到既問題就唔係問題，如果要去就一於住好食好！星期六一早出發，星期日晚機返，暑假期間好多酒店都規定要最少住三晚，喺有限既選擇下㨂咗間離機場最近，又要喺沙灘前第一行同要海景房，用盡每一分鐘去享受陽光與海灘。 就係咁，突然間就成行，訂完下星期六出發！
Mallorca 係屬於西班牙既一個小島，被喻為德國既第十七個州份，喺島上唔識講西班牙文唔緊要，講德文都可以暢通無阻，所以呢個島可以比任何類型既遊客，可以一家大細親子遊，可以 grad trip 或者同班兄弟姐妹去飲到爛醉，可以去行山踩單車遊島，可以去睇靚景，做乜都得。 我同啲同事講訂咗去睇波，話下次先再正式去多次遊島。佢地個個都話今次已經好正式，去 Mallorca 就係要好無離頭咁發生！！
最近訂咗旅行之後都唔會有特別既期待感，但今次真係好似倒數聖誕咁好想佢快啲黎，日日聽住 Malle playlist 等自己早啲有旅行既感覺。終於等到星期五晚，執好兩個背包，瞓幾個鐘覺就起身，五點 call 車去機場，頭四班機都係去 Mallorca 既機。。。 Mallorca 個機場喺個島既南部，前面就係一條幾公里長既 Platja de Palma 海灘，呢個海灘最東邊個位叫 Arenal， 就係德國人既 party 之地，入面隨時一句西班牙文都唔會聽到。 我地間酒店就喺海灘既西邊，搭機場巴士第四個站就到，啲人比較正常。朝早十點就已經到咗酒店。當時佢話未有房，但早餐時間未完叫我地去食早餐先！
食飽後大約十一點，我地就由餐廳前門離開，過條馬路就入咗沙灘，set 好哂野就即刻攤低休息下。 早兩日有新聞話 Mallorca 錄得史上最高水溫 33 度，落水嗰陣啲水真係暖既！！ 個感覺好奇怪，好似落水都降唔到溫咁，同埋唔會喺水耐咗就覺得凍，要上返水曬太陽暖身。 而家係只有暖同熱既分別。 玩到大約兩點就去搵餐廳食午飯，食食下野我另一半話呢度啲人個個一樣樣，叫我望下行過呢個人，好似 Kristof。 我差啲開口想話： 真係好似喎！ 但同時見到隔離有另一個好熟口面既人，兩個加埋先理解到佢地唔係似樣，而的確係 Kristof 同埋 Rohr 兩個赤裸上身搭住條毛巾行過！！ 笑死，兩個都大眾樣到差啲認唔到。
個冷氣已經開好等緊我地，沖個靚涼後就攤喺床上望住個海景嘆冷氣，仲有枝免費紅酒！ 本來我地諗住休息一陣再戰海灘，但個冷氣實在太舒服，所以改變主意休息多一陣之後直接出城。 六點左右就搭巴士出城，搵雪糕食既途中喺舊城行咗個圈，再搭巴士去球場。
今日竟然有近一百個作客球迷，當中有啲本來年年都黎過暑假既，有啲黎食花生既，有啲係平時球場見開既。 呢個數字仲多過地區聯賽既年代，黎到今日我地去外地作客竟然都可以有咁多人！！！！ 主隊都有超過五千個球迷到場，仲有興致搞下氣氛。 馬略卡個球場超大同好靚，佢地好正式咁看待場比賽，場外有防暴，入場好認真咁查袋，仲有真係分隔咗作客區同賣作客波飛。
開波後唔夠十五分鐘，對方後防踢低我地可以單刀既球員，比球證罰直紅離場，個個都覺得友賽都紅牌有啲癲，就連我地個領隊都叫球證去場邊講數叫佢收返張紅牌，而個球證就企硬。 下半場輪到我地開波唔夠十五分鐘直紅，突然間變 fair game 10 vs 10。成場波都好悶，真心覺得浪費緊自己時間，如果唔係喺 Mallorca 既話我會建議佢地回水！！！
完場我地叫 Uber 返酒店，短短三個字車程要六十幾歐！！？ 第二朝趁太陽未夠力既時候先去海邊散步，跟住先食早餐，再落水玩一陣先再返酒店執野 check out。 Check out 之後我地仍然可以用酒店內既設施，去完沙灘再返去沖個涼先走都得！ 本來係諗住去機場前會喺酒店酒吧飲多杯野先去機場，但出面真係太熱，最後早少少入機場涼冷氣好過。
今次雖然無去到 Arenal 度觀光，但都起碼盡用哂所有可以玩水既時間，原來兩日一夜都可以花咁多時間喺沙灘仲要完全唔 chur! 去到機場被告知班機會 delay， delay 本身都唔係大問題，但法蘭克福機場係有禁飛時間，我地只係驚最後要去第二度 land. 班機最後由八點鐘變到九點鐘先走到，上到機後話 boarding completed，啲空姐仲喺度走黎走去，原來後面有一堆人仲企咗喺度，因為佢地搵唔到位放行李。嗰陣聽到啲空姐話我地又 miss 咗起飛個 slot ，即係趕唔到禁飛前返到去。
同時，架飛機已經被推咗出去，個機師唔知係唔理大家既生死定係對班空姐咁有信心，覺得佢地可以喺起飛前塞好哂啲行李，然後做安全指示再埋位坐低？ 等到啲空姐終於搵到最後一個位去塞行李同關哂所有行李位後，個個都為佢地鼓掌！！！ 佢地即刻勁快速咁做安全指引，再奔去自己個位度坐低，同時架飛機已經轉緊最後一個彎，順暢咁進入跑道就直接加速起飛。 呢個時候唯一願望係今晚可以十二點前返到屋企，最後我地成功喺 22:45 抵達！！！
就係咁完成咗 Mallorca 36 小時，解鎖第一次跟球隊出國作客！ 呢兩日應該可以講一世！！
