15.08.2026
季前熱身賽
車路士 對 皇家蘇斯達
史丹福橋球場
賽果： 3:1 (1:1)
入場人數：34,715 (200 名作客球迷)
門票：41£

今個週末係德國開波前最後一個得閒既週末，早兩個月訂咗諗住睇下會唔會買到飛去睇社區盾，本來諗住只睇一場波，後來同一個週末會有幾場熱身賽，有史特加作客富咸，有法蘭克福作客賓福特。平時賽季期間呢啲球場都好難買到飛，去睇熱身賽應該係最啱。最後㨂咗去車路士，一來唔想黎到英國都要見到一大堆德國人，二來又可以見下沙比！

星期六朝早帶埋兩老出發去倫敦，一個鐘多啲既車程去到 Richmond 泊低架車就去搭 Tube 入城。場熱浪啱啱係星期五算係完咗，今日終於開始有雲同埋有陣風，喺無太陽曬住既情況下係舒服既。 但室內既氣溫仲未正常返，好在District Line 都算比較新同有冷氣，上車後都唔算太嘔心。 我地喺中途同兩老分開，佢地入城行街，我地就轉另一條線去球場。

身為一個香港人，喺人潮中搵位攝位絕對唔係難事。 喺 Earl’s Court 月台上因為班車 delay 定唔知乜已經企咗好多著住藍衫既人等車。 同上年睇完獌既情況唔同，今日都係超多人，但完全無人會迫同推，首都人係唔同啲？！ 到咗 Fulham Broadway 跟住啲人潮好快就上到地面，出站嘟機都勁有效率。 轉兩個彎就已經係球場門口，呢樣真係英國獨有！！

唔知車仔最近係咪出咗好多復刻版波衫，定係係隊波本來既文化，超多人都係著埋啲舊版波衫，個感覺好似想比人知佢地唔係有油王入主先開始成軌？！喺場外行咗個大圈後終於搵到我地個入口，場外安檢好快，但上咗樓梯之後排隊入閘要排好耐。 終於入咗閘之後可以行室外既樓梯呼吸下新鮮空氣，上到去又變返室內，加上人多，突然有座隱形牆咁啲空氣變到勁焗。 諗住入到看台會好返啲，但佢個上蓋係膠（？） 係隔咗個太陽唔會被直射，但個太陽太有力。。。。我地喺接近山頂個位就好似一個焗爐咁。

明明話過唔再夏天去倫敦，今日走黎睇波完全係自己攞黎！ 好在喺山頂可以離遠見到沙比，呢個西班牙人完全無懼太陽，全程企喺場邊指指點點。到底點解最後會係軌可以有沙比執教而唔係利。。。。 我地個位可以望穿對面兩個看台之間，然後見到富咸既主場。 呢樣又係另一個英國特式！

看台入面既上蓋有幾部大電視，有時會唔知點解會集中睇咗電視而唔係睇眼前塊草皮，亦都唔知看台入面放咁多部電視係有咩用？ 客隊都有唔少球迷到場，佢地追和1:1 時甚至可以聽到打氣聲。 今日只係一場友賽都無話有咩期望，最重要係可以入場睇場波同參觀下。

離場後可以好順暢咁入返去地鐵站，成功喺第一班車黎到既時候攝到上車。之後要轉 Northern Line 去 Zone 1 ，搭三個站已經焗到想喊。會合返屋企人之後去 Abeno 食大阪燒，佢地個綠茶雪糕真係好好食！！！！ 回程時唔想再搭百年地鐵，寧願行三個站去河邊直接搭 District Line 返去 Richmond 拎車嘆住冷氣返屋企！