16.08.2026
英格蘭社區盾
阿仙奴 對 曼城
威爾斯千禧球場
賽果：3:0 （2:0）
入場人數：58,056 （32,742/19,948）
門票：45£

早幾個無意間發現黎緊既社區盾會喺威爾斯既千禧球場度踢，因為同一時間喺溫布萊一早比 The Weeknd 訂咗黎搞演唱會。諗住機會黎了，社區盾呢啲無咩意義既盃賽應該唔難買飛，以為終於有機會可以去呢個好少會用黎搞足球比賽既球場度睇波。

一開始留意 FA 個網一直都只係話去到會慢慢公布售票詳情，去到足總盃同英超冠軍都定咗之後都仲未有消息；再做多少少資料搜集了解到社區盾正常只會分比兩隊參賽球隊，再比佢地自行分配，唔會有中立球迷區。咁我地就開始留意兩隊波既售票安排，兩隊都行會員級別制，基本上非會員 （即係我地）唔會有機會買到飛。

一直都諗住平常心等下會唔會最後有公開售票，同時又諗定 plan B 最多咪去第二度等波。 到出發前約兩星期都唔見有咩公開售票，就上 Threads 問下有無人知非會員點買飛。 果然係萬能既 Threads！！！ 好快就有人 dm 話可以幫手買飛，仲比我睇哂邊度仲位同幾錢，成個過程唔洗半個鐘就完成買咗兩張飛。 對方仲完全無提過任何額外收費，真係純粹幫手買飛，呢啲就係香港人既愛同效率！！！ 買完之後張飛仲未出，email 都係話會喺開賽前三日左右先會出飛，一出咗飛對方都即刻 fw 比我。

好彩既係張飛可以直接由 email 加落 Wallet，完全唔洗 download app。 上年年尾去睇獌要裝 app 又只可以經 app share ticket 定唔知乜，早一日去睇軌又係要裝 app 然後喺 app 入面開張 QR code，今次就任何額外 app 都唔洗。

確定有飛在手之後就喺星期日一早帶埋兩老出發，佢地今日都係諗住跟埋去行下街咁。 我地九點左右出發，途經 Swindon, Bristol 再過威爾斯親王大橋進入威爾斯。 我地先喺第一個休息站度小休一下，成個休息站都係著住紅衫既阿仙奴球迷。

呢場波放喺威爾斯度踢，啲球迷全部都要由倫敦或者大西北去威爾斯。 以我地既觀察留意到英國好少會有 carpool 一班朋友一齊去睇波，路上好多都係得一個人喺車入面；唔似德國喺比賽日會見到五個大隻佬迫喺架細車入面咁。由呢個休息站開始，條公路變咗深紅色。 我地決定行小路穿過啲小鎮向卡迪夫出發。

同時亦都有好多人都㨂行小路，再加上英國本身都勁多人，塞下車又等下十幾枝紅綠燈，經過 Newport 到咗卡迪夫南邊既工廠區，比預計遲咗差唔多一個鐘後終於到達火車站隔離既停車場。 放低架車就穿過火車站到另一邊，見到成條街都人頭湧湧，超好氣氛！！！ 背住火車站行，喺條街上望向左邊隔一條街就已經係球場，咁大個球場放喺市中心真係好癲！

場外雖然好多人，但入場超快速，勁 hea 既安檢同嘟飛都好有效率，行幾層樓梯就上到去山頂搵自己個位。 一個可容納超過七萬人既全座位球場真係超巨型！！！ 以容納人數黎講，呢個千禧球場係全英國第四大球場，最大當然係Wembley， 然後就係欖球用既 Twickenham，跟住就係奧脫福。 呢個球場主要都係用黎比威爾斯欖球國家隊出戰，所以今日可以入場睇波（仲要係正價！！） 真係好難得！！

地個位雖然近山頂，但位於球場中線所以視覺超好！老實講兩隊波我都無興趣，今日入場真係為咗食花生。 賽前既煙花表演以一場 event 黎講又真係唔錯。 而我地掛住睇煙花就完全留意唔到原來兩邊龍門後面既球迷有準備咗choreo， 喺賽前打開咗。。。。 等到我發現時兩塊布都已經好快收埋緊。

阿妓一開波唔夠兩分鐘就已經入咗波領先，半個鐘後有德國人 Havertz 拉開比數。 輕鬆領先既阿迷好開心咁慶祝，由開波到完場唱咗幾次 Allez Allez Allez，有跳 Poznan ，同其他大路既歌。 曼呢邊就個個好安靜，去到尾段龍門後面啲球迷接受咗現實就開始自娛，最尾嗰十分鐘打氣至完場。 第一次親眼睇 Haaland 但見識唔到佢有幾好波。。。。 甚至有少少 Mokwa 既影子。下半場阿仙奴又係一開波就入波，領先到三球應該都無機會追得返。 未完場前好多曼城球迷提早離開，我地留到頒奬就離開慢慢回程。

回程時條公路又係塞到爆，中途就過咗 Bristol 先去休息站停低。成個休息站又係滿哂回程既球迷，有幾間快餐店都係大排長龍。 去到同倫敦路線分流既地方先終於少車返啲同靜返落黎。

再一次感謝香港人既幫助，令到我地可以去新球場睇波！！！