13.09.2026
德國足球甲組聯賽 第三週
SV Elversberg - FC Bayern München
Waldstadion an der Kaiserlinde
賽果：1:2 (0:1)
入場人數： 9307 （1500 名作客球迷）
門票：季票
第一次輸咗波都仲係好開心同好滿足，平時輸咗波就唔會睇返相關報導，精華重播嗰啲都唔會有興趣。但今日賽前賽後既相關片段同新聞睇完又睇，一丁點失落感都無。 事關我地輸波既對像係德國班霸，拜仁慕尼黑；我地仲要踢咗場好波之餘仲入到一球波，唔似另一隊升班馬全場死守，真真正正既雖敗猶榮。
賽前唔知點解有上季季尾爭升班既緊張感，一個好正面既緊張，完全唔期待輸贏，只係希望大家可以好好享受呢一日。內心知道足球無絕對，同時又知道事實係對方既水平真係高幾平，但對方週中踢完歐聯可能回唔切氣我地偷到雞呢。學領隊話齋，我地就如沙漠中既雪球；一直好想快啲知結果如何。
今場波仲要放喺星期日最後一場，愈近比賽日就愈多相關報導，就連盧森堡同法國都受惠，佢地報導拜仁會有兩架包機由慕尼黑飛去盧森堡機場，然後由禁區內直接上隊巴去到位於德法盧三角邊境一個 Saarland 城市 Perl-Nennig 落腳，仲講埋酒店名；等啲球迷可以去追星。佢地星期六抵達酒店時，門口有幾百個球迷喺度等！！！！甘賓尼話佢地第一次喺國內外客見咁既場面，個個都仲好友善親切。
去到比賽日，好多人就算無飛都去到球場外搵個位係可以望到場內某一角，甚至只係望到堆貨櫃更衣室見到球員出入都好。球迷組織準備咗塊大海報 choreo，喺看台前寫住 Jahrelang durch Dörfer der 4. Liga – Heute gegen Meister und Pokalsieger – 多年來我地遊走喺第四級別既村仔，今日迎戰德甲同足總盃冠軍。 然後看台內會拉起一塊手繪既大海報。要沾沾既係海報上畫出黎既係我呢十年影過既幾張相，好開心可以比大家用黎回憶紀念～～
入場後個個忙住準備 choreo 相關既野，好多人都早咗入場霸靚位。 開波前一個鐘左右，拜仁既職球員陸續出現，無諗過有一日我地會喺度噓佢地比下馬威！！！ 今日場邊無啦啦有個中英文廣告，「你好 Paul （我地隻吉祥物係熊貓叫 Paul），來自成都的邀請。」心諗做乜9? 成都話佢地係熊貓既家鄉，所以今日喺成都直播呢場波。成件事勁9唔搭8. 到底關你地咩事？？8964!
之後我去咗主看台，同保安講好數今日有 choreo 我要影相，唔好中途踢我走。佢地今日友善咗仲搵咗個無人煩我既位比我安靜影相；仲話呢個位平時唔可以企人，但今日比我企入去。 然後我左邊有三個人走咗入黎又無人趕佢地走，其中一個係 Asllani ！ 笑死，佢真係好中意返黎睇波，但而家我地係直接對手，應該要踢佢走囉，仲有 Conte 今日都黎咗，都唔知係咪比賀芬威派黎 spy 我地。
拜仁既最大球迷組織叫 Schickeria，係人都知拜仁好多球迷，但場內打氣質素真心一般般。 我地既作客看台容納人數係 1500 人，今日就算係拜仁都係得嗰 1500 人喺作客看台內，聲勢得一兩陣可以明顯聽到，畫面就可以用醜黎形容。佢地有好多個球迷組織，個個都著自己衫，一堆紅一堆白，一堆黑。唯一好睇既係企位看台內個個一齊高舉雙臂，但呢啲只係作客既基本！！之後就算入咗第一球波好似只係慶祝咗半分鐘就完咗，可能人地慶祝慣唔想花咁多力氣。
今日整場波都好歡樂，本來有啲擔心啲人會入場支持拜仁，但好在絕大部份都仲係好認真支持 SVE。個感覺好似杯賽咁要一場定生死所以要為每個機會歡呼，每次我地拎到控球權或者只係中斷到拜仁既攻勢，主看台呢邊個個都即刻係咁拍手。去到 Karl 入波之後佢個慶祝同作係放食指喺咀前「殊」然後兩隻手喺耳邊好似暗串我地無聲咁；聽人講佢好似平時係咁慶祝，但今日喺場內啲人覺得佢挑釁所以由嗰刻開始，每次佢有波在腳都狂噓佢。
上半場尾段 Campbell 半單刀入波，可惜最後被 VAR 判越位詐糊。 上半場只係落後一球真心勁，我地話下半場隨時可以失多幾球，唔好咁淡定。 61 分鐘 Krattenmacher 喺禁區邊起腳扯死角笠死龍追和，呢個慶祝同上場絕殺有得比。 和波完全可以接受！！ 幾分鐘後拜仁一次過換四個球員，轉咗完全進攻 mode，呢一刻開始我地只能捱打，比佢地攻到無氣抖，失多球波完全係意料之外。 呢球當然係由 Kane 射入，仲要係唔知點入，即係佢明明無位仲要唔順腳，個勢係佢就快跌低咁但都仲坐住（？）咁起腳，學我地領隊咁講，呢個入球好 sexy.
拜仁真係拜仁，成場波紅衫無處不在，真係唔知我地傳波傳得差定係佢地真係經驗老到睇穿哂。仲有對面個二號（我記得佢個樣但永遠唔識串佢個名）成坐山咁，我地啲球員完全埋唔到佢身，一埋身就比佢 bell 飛！認真，今日應該係我第一次認真睇拜仁睇足全場，班霸真係班霸。等到球證吹雞完場，大家第一個反應都係出盡力鼓掌。今日中堅係 Rohr 同 Le Joncour 烏龍球孖寶，我地竟然成功無出醜，仲要入到波。
有人話我地既德甲奇妙之旅黎到第三場就輸咗，但明明仲係進行中：要輸比拜仁首先就係要有資格對拜仁！仲有三十幾場德甲，希望我地可以繼續以今場既表現完成今季。下場作客史浩克，要喺升班馬身上搶分！！
