22.08.2026
德國足總盃 第一圈
MSV Duisburg - SV Elversberg
Wedaustadion
賽果：1:3 (0:1)
入場人數：22,662 （1000 名作客球迷）
門票：17,60€

新一季又開始啦，今年我地以德甲球隊身份出戰（今季應該會係咁重覆呢句）。德乙及以下既聯賽都已經喺七月尾八月頭陸續開咗季，德甲球隊就一如以往新一季既第一場正式比賽係由足總盃開始。 無論係地區聯賽定而家德甲都好，每年等抽籤既時候都係一個折磨，要驚抽中廢隊浪廢可以見球星既機會，又要驚抽中廢隊之餘又要山長水遠去作客。今次就抽中六年無入過足總盃既前魯爾區大隊 MSV Duisburg。

巧合地，十年前同一個比賽週末我地都黎咗 Duisburg 睇足總盃首圈，當時係為咗睇柏林聯作客；乙組對乙組既賽事最後由客隊勝出。十年後既今日同自己隊波黎到作客，完全係另一個感覺。 早幾季踢德丙時 MSV 係其中一隊隊手，但當時原本既賽程因為暴雨而延期，延期後我又因為工作關係去唔到。 當年喺主場有 Koffi 既腳踭入波，作客就有 Woltemade 連入兩球，而家一個半退休，一個成為德國/英超新星。

三個月既暑假終於完結，某程度上好想繼續可以有安靜既週末，但過去兩三星期見到其他球迷慢慢開始歸位，自己都開始牙癢！！但都係簡單講下隊波喺暑假發生咗啲咩事先，同其他升班球隊相比，我地好積極簽入球員。由多簽入 Cole Campbell （話係咩天才前鋒），由拜仁簽入 Maurice Krattenmacher （上季喺柏林踢得唔錯，竟然比我地搶咗走），仲有由凱莎羅頓免費過黎既 Luca Sirch，呢個我懷疑簽佢只係因為佢個名叫 Luca。另外仲喺史浩加借咗 Darvich， 利華古遜既 Onyeka，同埋未簽已經唔太中意既 Futkeu。 我對球員既來來去去都唔太特別在乎，因為好多球員我都無特別留意，甚至完全唔識，不過都好開心見到球隊而家可以喺多隊球隊角逐之中，成功爭取到有實力既球員加盟，呢樣絕對係球隊管理層喺過去多年既功勞！

足總盃場波同德甲主要開波時間一樣： 15:30 。地區聯賽同德丙係兩點開波，德乙就一點開波，平時週末朝早唔可以太 hea，要有有效率既行程。 今季 15:30 開波，即係星期六朝早都可以瞓飽，食埋早餐都仲可以做下其他野先再出門口；而家就連作客都可以慢慢黎。 我地九點先起身，十一點出門口，中途有少少塞車最後開波前一個鐘左右先到場。

入場後先衝去廁所，再排隊買野食。一開始想買咖喱腸配薯條，但諗下陣間回程時想食麥記又係薯條，所以最尾改食腸仔包算。 唉，早知唔轉，條腸勁難食，食咗兩啖本來好肚餓都即刻變到無哂胃口。同時又聽到其他人大讚啲薯條世一。。。。（btw 睇返舊文，十年前黎食花生時，一兜薯條只係 2€, 而家貴咗一倍！！！

今日我可以㨂入場邊定去傳媒席，由於我好遲先搵到球迷人使拎龜背入場邊，就決定去傳媒席安樂睇波算。呢個決定完全正確，因為開波後三個字左右個天突然倒水，雖然只係落咗大約五分鐘雨，但個雨量係可以淋到全身濕哂。喺傳媒席我可以清楚睇哂兩邊球迷。 主場球迷喺開波前先唱起佢地近年既愛歌，內容係講球迷夢，夢到 MSV 走上歐洲賽道路，佢地靠呢個夢去帶球隊一齊走過低潮。 呢首歌係佢地喺球隊歷史首次跌落地區聯賽後出現，嗰季佢地對球隊既支持度有增無減， MSV 亦都無辜負球迷既支持，翌季上返丙組，上季仲差啲可以上返乙組（最尾on99衰自己）。

今日我地以德甲球隊身份（！）黎到作客德丙球隊，升班馬對藍色斑馬，唔知會唔會見到實力差距呢？ 我地今日有近一千人黎到作客，同德丙嗰年既補賽相比，今日既作客人數係當年既十倍。 就算同其他作客人數相比，一千人到場其實好癲！！！！ 但黎到仲 hype 緊既 Wedaustadion，一千人既聲勢只能好免強被聽到。 好在我地先有名宿 LUCA Schnellbacher 入波。 下半場衰自己，開界外球直接送咗個波去對方腳下，佢由半場帶住個波狂跑到入禁區邊射入，完美既獨食。 之後好彩對方有兩個 Mokwa 級既前鋒，單刀唔入同空哂頭鎚唔中龍，我地先開始捱到最後幾分鐘。

唔知 Petkov 做咗咩係咁比人噓，最尾可以一吐烏氣，喺禁區右邊入攝，落到底線篤個波去十二碼點附近比 Onyeka 一射破網再次領先！！！！ 唔洗加時！！！！！！？ 計埋補時仲有超過五分鐘，領先一球先最危險。。。兩分鐘後 Onyeka 自己帶住個波入禁區起腳，拉遠柱入網，真係唔洗加時呀！！ 首圈最正係入波就係入波，無得抽後算賬，呢啲先係足球既根本，入場睇波既樂趣。 呢一腳好在 Onyeka 自己獨食，佢有另一個選擇係傳左交比踢得快少少既 Mokwa，但個劇本將會完全唔同囉。。。

後來睇精華先知原來佢地自 2025 年一月到而家主場不敗，咁就被我地打破咗。 唔通今季又係打破紀錄既一年？ 有好多紀錄可以破喎，例如我地未贏過德甲冠軍啦，未贏過足總盃啦，未踢過歐聯，未踢過歐霸之類，呢幾個紀錄求奇破一樣我都 ok 的。 而家就首先擔心一下次圈抽籤會抽一邊個，近啲既紀錄我希望可以首次進入第三圈。