05.09.2026
德國足球甲組聯賽 第二週
Borussia Mönchengladbach - SV Elversberg
Borussia-Park
賽果：3:4 (2:1)
入場人數：51,042 （2200 名作客球迷）
門票：18,71€
今日我地以德甲球隊身份第一次去作客，對手唔係第一次對碰既球隊，數返喺武肺期間對方已經黎過鄉下地方作客；但今日當然係我地第一次去人地地頭比賽～～ 慕遜加柏有好多來自 Saarland 既球迷，呢場波算係幫好多人完咗夢可以「順便」去朝聖。最後有超過二千個球迷到場支持，驟眼睇絕大部份都係認真支持自己既鄉下隊，唔係真係只為入場食花生。
場波三點半開波，我地十點出門口，預夠塞車同叉電時間諗住可以一點半前入到場。今個週末我同同事交換咗架車，由 Ioniq 5 轉做 Kona ，我對電車啲性能無咩研究，我知 Kona 舊電細啲要預停多一兩次去叉電，但我唔知原來無快叉，即係嗰啲咩 15 分鐘可以由 20% 到 80%。 架 Ioniq 5 係可以泊低架車，開始叉電，行去去個廁所返到黎碌一碌電話就爆咗去 80%，今日就去完廁所返黎只係叉咗 8% 。 去程就叉夠等之後可以離場球場一段路先再叉電就算。 （回程見到佢過咗 80% 後個速度得返 3kw，開玩笑嗎？？？） 有個同事話佢之前揸架 Kona 返去東歐鄉下都覺得自己有啲痴線。
最後慢叉＋ 北威州永無止境既塞車，最後兩點先入到球場。今日有球迷組織既安排，我地可以喺前作客入口前泊低架車，好多球迷巴士同樣因為塞車搞到開波前三四個字先到場，作客區來得一個廁所，男廁有兩度門，見到啲人可以好快咁出出入入，而女廁就如常大排長龍，見到條龍本來急尿都變到唔急。
北看台今日準備咗個 choreo 黎慶祝開季，一塊大字報大意思指 「終於等到開季，可以再次喺主場睇我地最愛既 Borussia」，再一齊倒數同時向天射出綠白色紙條同放出綠白煙，然後就正式開波！ 認真，暫時黎講我對贏波輸波同護級降班都完全唔在意，淨係覺得歷史上第一次踢德甲要好好享受每一場波，真心唔在意賽果。
開波後，北看台拉開另一塊用黎諷刺我地既大字報，用我地既主席 Holzer 黎玩食字，Holz 喺德文解木，Holz vor der Hütte haben 直譯係屋前有木材，但其實係意指一個大波女人，話我地就算拎住一堆木 R€ichlich Holz(er) 企喺門口都係未夠班成為德甲其中一員，真係要比個讚佢地食字食得咁靚。一開始睇黎佢地真係講得啱，開波十分鐘就比對方射入領先。好在我地有球王 Mokwa 喺中線搶到波獨自帶到門前射入追和！！！
去到完半場前，對面 Kleindienst 快開界外球，我地反應唔切比對方入波再次領先。當時我地唔知咩事，淨係知啲球員追住球證投訴，連領隊 Wagner 都投訴食黃牌。 去到吹半場雞時， Wagner 又再食多張黃牌被趕離場。 後來睇返先知原來個界外球本來就應該係屬於我地，球員同領隊既反應都係投訴球證誤判。 球證賽後話佢比第二張黃牌係因為領隊向佢走過去覺得佢無體育精神 (unsportlich)。 領隊之後就解釋話佢知道唔可以跑 (laufen)向球證所以佢係慢慢向佢行去，同時亦無做出任何會令人覺得佢好激動既動作。佢解釋嗰陣好搞笑，因為 laufen 可以解跑同行，佢用咗幾個唔同方法去講佢係慢慢行，而唔係 laufen。（而佢地又點知球證既 laufen 係跑唔係行呢？）
下半場開波十分鐘後失多一球落後 3:1 ，嗰刻真係無咩感覺，就如之前所講只想好好享受出戰德甲既時光。 Capo 都不斷提醒大家唔洗氣餒，要記得我地每場波都寫緊歷史新一頁，我地踢緊德甲！由開波到落後兩球，作客區內既聲勢都無跌過。唔係話主場無氣勢定咩，但我地真係大部份時間都聽唔到對面既打氣聲，作客咁既情況能夠出現其中一個原因就係我地只係聽到自己無間斷既打氣聲。去呢啲大球隊作客真係好難得二千人都可以齊心一致。
可能就係咁，我地成功喺 66 分鐘追返一球，呢球係足球神既保佑，比新球員 Krattenmacher 喺遠柱執到死雞先用頭頂入中楣，個波彈返落佢身到入網。球波既出現係 Petkov 首先喺禁區邊起腳，比對方龍門救出後，喺 Krattenmacher 前有三個（！）防守球員，三個都喺度發夢，得 Krattenmacher 有反應追住個波。 去到倒數階段，我地喺禁區左邊有個死球，竟然比 Keidel 直射入網。 errr…. 睇呢隊波咁多年，其中一樣最唔會期待既就係罰球直射入網。 3:3 ！仲有十分鐘！！！
補時四分鐘，Petkov 喺後場右邊唔知點樣瞄到前面左邊空哂既 Futkeu （呢個靚傳真心要比返 credit Petkov lor，但睇咗幾條精華都無人提過！！！），下一個 credit 就係 Futkeu 接應得好靚，佢推咗幾步就見到右邊 Krattenmacher 有空位，Krattenmacher 推順咗就起腳地波通個靚坑渠，90+2 絕殺反勝！！！ 成件事真心好 SV Elversberg，唔可以靜靜地贏波，唔可以雖敗猶榮，要贏就要戲劇性咁落後 3:1 奮鬥到補時連入三球絕殺。 比人話我地未夠班，又遇上黑哨，最好既回應就係贏波收佢地皮！
去到下半場中段，我地開始擔心班球員唔夠氣準備輸多幾球，無諗過收皮先既係對面！？ 我地既後防已經算廢，原來一山還有一山低。慕遜加柏個名雖然仲係好大，但呢幾季都係喺中下游打滾。等到補時再補多一分鐘，終於等到黑哨吹雞完場，完成德甲首次作客勝仗！！！！ 班球員好快就向住我地飛奔過黎，個情景好似早兩季喺史浩克完場篤定入升班附加賽咁，佢地個個四萬咁口衝過黎同我地一齊慶祝一個重要既歷史時刻。 同時 Wagner 都極速由球場上層狂奔入返場內同我地一齊慶祝。
離場後，個個喺停車場拎住電話睇足總盃第二圈抽籤直播，每次見到唔想遇上既球隊都即刻心跳 +80bpm，又要一路數仲有邊啲我地唔想要既對手。謝天謝地我地終於抽中喺主場出戰，對手係德乙既 SV Darmstadt， 今次希望可以創歷史第一次進入足總盃第三圈！
兩戰兩勝，係德國史上唯一一隊喺德甲勝率 100% 既球隊 xD 同晚拜仁作客史浩克被迫和失分，我地正式喺兩場波之後排喺拜仁慕尼黑前面。 我唔理之後發生咩事，總之呢一刻拜仁廢過我地就係事實！下星期我地返到主場迎戰拜仁，我只係希望球隊踢到自己想踢既足球，好好享受，被大炒都唔緊要，入到波當贏！ 呢兩個星期賽後最開心就係碌電話，一開 ig 就一堆 post 要係咁 like，仲有好似歷史重演咁，對方啲球迷接受唔到自己隊波輸比升班馬，又有啲中立球迷話再係咁落去下季皇馬 PSG 要去地盤球場作客，笑死！！！！ （而家有得笑要笑多啲。。。）
