29.08.2026
德國足球甲組聯賽 第一週
SV Elversberg - Bayer Leverkusen
Waldstadion an der Kaiserlinde
賽果：3:2 (2:0)
入場人數： 9307 (1500 名作客球迷）
門票：季票
放咗三個月既暑假，黎到 2026 年 8 月 29 日，球員歷史既新一頁終於正式揭開！今日我地迎來 2024 年既德甲冠軍利華古遜，以戰績黎講，我地主場勝率係 100% （一戰一勝～），未驚過！
德甲開 league 戰被安排到星期六 15:30 開波，比德乙時間遲兩個半鐘，我地可以瞓耐少少先起身！ 不過今日我地都係早咗出門口，同班朋友預早到村內會合簡單集下氣先。 班村民同上季一樣約十點鐘，我地已經十二點先到都覺得勁早。遲啲開波既好處唔只係可以瞓耐啲，食晏既時間都正常少少，可以開波前喺球場外食啲野先入去。德乙時間份早餐都未落隔，等到完場又已經差唔多晚飯時間。而家好清楚賽前可以食 lunch，賽後返到屋企食晚飯。
去到球場門口，場外個炭火小食檔先啱啱開爐無耐，佢地集中燒緊腸同 Frikadelle (類似漢堡扒既物體），話多十分鐘先會開始燒 Saarland 名物豬扒 Schwenker。 等咗半個鐘見到個姨姨終於放啲豬扒落個爐度，我地一直離遠監視住直至佢燒好就奔去點豬扒包。寫歷史新一頁既第一日必須要有 Schwenker 份！醫好個肚就差唔多一齊落去球場等開門。
隊波雖然已經上咗職業聯賽好幾年，但好多野都仲係家庭式運作，一時又勁 hea 咩都無謂，一時又對啲新事物/新制度好緊張。升咗班我已經做好心理準備有啲安排又會唔同咗。 升咗班但場內人數其實無變，咪又係嗰九千人，唯一唔同既係多咗好多媒體到場，今日係德甲第一場，各大電視台當然要黎扑咪。呢堆人可以去邊？就係去後備席後面個地盤嗰邊既臨時鐵通棚，嗰邊起咗三座野放直播鏡頭 （直播畫面終於係見到三邊坐滿人既看台，正常好多），中間嗰座就有幾十個媒體席。 入場第一眼見到時心諗好彩我唔洗爬樓梯上去，上面一定勁食風同埋落雨會 pit 雨！！
同往年一樣，開波前半個鐘就去主看台用佢個靚廁所，然後就去中間可以清楚見哂兩邊球迷既位。放低咗啲野幾分鐘就有人問我睇證，佢個樣好疑惑，睇完就行開咗。然後就有著西裝既阿姐黎話我唔可以坐呢區，要去對面座危樓，我話我喺呢個位已經坐咗三季，同埋我張證寫住我唔入得媒體區，我可以去邊？佢話總之而家係德甲，呢區唔再係媒體區，我要去對面， ” ist so” （就係咁。）。
場內有佢地自己既規矩我無謂去拗，喺德國多年學識既其中一樣就係唔好同啲跟規矩做事既人去爭執，因為點都唔會拗得贏。綜合呢幾年既感受係，去作客時啲職員全部都對我呢個外人好好，會講得好清楚我可以去邊唔可以去邊，又會有額外安排可以影靚相既地方，有一種互相信任既感覺；而喺主場 Block C 以外我係無「家的感覺」。咁人地都話咗我唔可以留喺度，我就入咗場內，但場內麻煩在個角度麻麻地。我就試下行去媒體區睇下佢地比唔比我入，點知又好輕鬆過關上到去，啲靚位已經比其他人拎哂，得返最後兩邊角落。影相角度係可以既，同埋呢邊好靜，連喇叭都無，可以好清楚聽到哂兩邊球迷既打氣聲。
作客球迷今日有朋友 Kickers Offenbach 黎助陣，賽前話佢地申請咗會搞 choreo，最後只係放咗一堆濃煙。開波後我地好進取搶住黎攻，去到第 8 分鐘靠由 Petkov 起腳加少少運氣省中對方腳背改變方向，射入球隊歷史上德甲既第一球。我即刻諗住影低歷史性既慶祝一刻，正常係會一齊互叫三次入波球員個名，再一次叫比數完成成個慶祝。場內一齊叫咗三次 Petkov 之後無啦啦有另一波既慶祝聲，2:0!!!!! 原來對方重新開波後搓咗幾腳波，比 Mokwa 埋身嚇到送咗個波落 Campbell 腳下，佢自己帶到入禁區起腳射入。九分鐘領先兩球，喺從未無升班馬做過既事！
半場休息時想返入 Block C，去到平時球員入場嗰條斜路時見到有個位係可以直接入到 Block C （如果沿原路我要經龍門後面行返去主看台上去再經出入口入去），我問我可唔以可由呢個位入去 Block C。佢問我入去做咩，我嗰刻都唔知點答佢 sosad 我都唔記得我講咗咩，總之佢話唔得，我話 ok, 咁我經場邊返入去。 行咗幾步佢地大叫喝住我，問我本身點樣黎咗呢度，我一頭問號咁話我由主看台嗰邊行過黎，拎咗我張 pass 研究加一臉唔信我既樣；好在當時熟悉既球迷大使咁啱喺度同佢地講我可以入內場；之後就放咗我走。 返到去主看台，我經主看台既出入口行去 Block C 度閘，踏出咗個出入口兩步，有個大集佬保安成個身擋住我問： Wohin? （去邊？） 我比張證佢睇話入 Block C，佢望住張證望咗半分鐘先話 ok。 第一次覺得我喺呢個球場入面呢世都會被當係唔屬於呢度既人，心很累。
入返 Block C 感覺先良好返啲，對面喺開波時打開塊黑白大字報寫住 Kämpfen Andi ，為一位叫 Andi 既兄弟打氣（我估係同病魔/受傷戰鬥緊），啱啱影完塊大字報就見到 Mokwa 喺門口飛奔個個慶祝入波。 你睇下，喺球場入面掛住影相拍片為乜！！！！ 而家點入波都唔知！ 之後睇返先知呢腳係正宗 Mokwa * Koffi 式入球，一個解釋唔到既入球。
但對方有個 Patrick Schick，係馬後炮，但佢過去兩場都有入波，內心覺得佢會保持呢個紀錄。 下半場變到係對方搶攻，總之就大部份時間個波都喺另一邊，睇唔清發生啲咩事。 客隊追返一粒，入球球隊就係 Schick。 又係之後睇返先見到呢腳勁瀟灑，佢用腳踩一 tick 入網，完全無話可說。。。。 去到啱啱到 90 分鐘，對方又追多一球。
完場前，大家一齊唱 2022 ，最尾嗰兩句由德丙到而家改過幾次， “Jetzt spielen wir 3. Liga, und machen einen drauf” （我地而家踢德丙，要盡情享受），個 3. Liga 升班後改咗做 2. Liga，然後 und machen einen drauf 都改過做 und steigen wieder auf （要再次升班）。 而家上德甲無得再升班，改返做 und machen einen drauf 都仲算易事，但個 2. Liga 唱左三年，而家要改唱 1. Liga，唱十次有八次都唱錯 😀
補時五分鐘好緊張，仲要補滿咗五分鐘都仲未吹雞，去到差唔多六分鐘先終於完場。 德甲歷史第一個入球，同首勝喺第一場就完成咗。希望呢場波係一個好開始，唔係我地全季少數可以開心慶祝既賽果！
