25.07.2026
瑞士足球超級聯賽 第一週
Servette FC - FC Basel
Stade de Genève
賽果： 0:1 (0:0)
入場人數： 8.351 (1.000 名作客球迷)
門票： 55 CHF (~59,50€)

完季後到而家已經兩個幾月，中間其實都睇咗幾場波，但我實在太懶，只想好好享受週末無野好做，平日放工後又無趕工既壓力，做下平時成日搵借口唔得閒做既事。在加上啲廢波應該無咩人有人興趣，留喺心中自己記住就算。

今個暑假有世界盃，但我地只係撞啱食飯時間有免費直播先會用黎做下背景聲，完全唔值得花我既時間去睇呢啲黑箱作業既商業活動。喺啲鬧劇完結後，有啲聯賽開始開波，上個月去左北歐避暑，呢個週末就南下去雪山山腳搵間有冷氣既酒店等自己可以有覺好瞓。

星期五到咗日內瓦後，即刻就出去市中心做景點做遊客，去湖邊睇雪山同影相然我去睇咗場乙組聯賽。 星期六就先去睇兩河交界，一條河既水來自日內瓦市中心個湖，另一條河就直接來自雪山；一清一濁既河水喺市中心以西既地方交接。 頂佢，去到去個篤篤位竟然比棵樹擋住咗個景； 後來我地搵路行上去交接點上既橋度望返落去，無啦啦喺差唔多三十度高溫下去咗行山！！！ 好在最後個景係靚既，都算值得出汗。

睇完靚景食埋靚飯後就搭巴士去球場，架巴士好多人好焗，落車後第一時間衝入球場邊既商場入面既超市，行去凍櫃前向下涼風先。 吹到差唔多時間就入場。 同上次一樣，巴素球迷喺我地既右邊，佢地喺場外等齊人就一齊湧入場，個個好似螞蟻咁即刻各有各忙咁裝飾個看台。

望去左邊主場球迷區，即刻睇到法語區同德語區既分別。啲主場球迷忙咗十分鐘都仲係綁緊同一枝旗，而同一時間，班作客球迷已經搞好哂看台前嗰十塊大旗。到球員入場時佢地就放煙迎接新一季。

場波就一般般，今日唯一既重點只係班作客球迷，佢地喺賽前號召個個著短褲配紅藍間條衫，看台內真係 95% 都係倒模出黎，再配上無間斷既打氣聲，同佢地既特式快速拍手，開始慢慢喚起我對新一季足球既期待。 過去幾個星期有時會覺得無野做好悶，同時又覺得無野做好正，而家真係想快啲可以成為喺看台內打氣嗰個。

仲有一個月終於開季啦！！