10.05.2026
德國足球乙組聯賽 第 33 週
Fortuna Düsseldorf - SV Elversberg
Düsseldorf Arena
賽果：3:1 (2:0)
入場人數： 42,165（約 2800 名作客球迷）
門票：18,71€

今個週末頭四全部都自炒，第一位既史浩克週中南下出海瘋狂慶祝，返到黎腳軟輸三球比好朋友紐輪堡，另外兩隊就各自喺星期五同星期六和波失分，變相送咗兩個 Match Ball 比我地，餘下兩場波只要贏一場就足夠直接升班。

好多人好樂觀咁話對住榜尾其實唔難，而家講出黎好馬後炮，但我一直都覺得今場唔會易踢。淨係睇過去幾年就知每次隊波一有壓力就會失準，你以為食硬既波佢就輸比你睇。 唉，我都唔想講咁多。

呢場波令我諗返去上年作客 Bielefeld 場波，個個滿心歡喜去作客，點知踢咗十幾分鐘就開始覺得唔對路。 今日同樣有主場球迷既加持下，主隊個個都紅色箭咀向上踢出超水準，球迷喺開波前先展示 F95 choreo， 頭十分鐘喺主看台影相時我地睇落都仲可以，到我返到作客看台後，好快就失咗第一球。

又！係！烏！龍！球！ 又係講出黎既馬後炮，我心入面一直諗我地最緊要唔好犯啲無謂錯誤，唔好又烏龍球。 今季已經入咗四個烏龍球，應該入到夠哂？？ 事實證明唔係！！！！ 烏龍球係可以無限出現，今季第五球，Le Joncour 個人第三球，就黎入波多過 Mokwa!!! （唔怪之得會諗返起 Bielefeld，因為嗰場兩球都輸佢，其中一球就係烏龍球！）

失一球都仲可以追得返既，但好快就失埋第二球。 場內既歡呼聲係勁到好似有六萬人在場咁， 呢個時候我知今場無希望了， 安份做羅賓漢送分救濟對方吧。 下半場輸到第三球係跣腳送禮。 今場真係好典型腳風唔順既一場，我諗就算比五球十二碼我地都唔會射入任何一球。 到最後連追返一球都係要靠對方烏龍球。

雖然係失望，但我地仲有一個 match point 可以下星期返到主場爭升班！ 賽後到啲球員苦口苦面黎到看台前，我地只想話佢地知唔洗氣餒，返去重整旗鼓下場贏波升班！！！！