德乙：SV Elversberg – SC Paderborn – Grenzenlos Groundhopping

03.05.2026
德國足球乙組聯賽 第 32 週
SV Elversberg - SC Paderborn
Waldstadion an der Kaiserlinde
賽果： 5:1 (4:0)
入場人數： 9027 （約 1200 名作客球迷）
門票：季票

賽前一日史浩克喺主場以一球淨勝 Düsseldorf 確定來季重返德甲，直接升班席位就得返一個位有三隊波去爭，當中我地排第四，漢諾威以一分之差排第三，第二位就係今日黎作客既對手。

我地前面嗰幾隊呢排都踢得唔差，最唔穩定既係我地，亦都係我地暫時只係排第四既原因。今日對住排第二既 SCP 無人敢抱太希望。呢個時候個決定權唔喺我地手上，唯一可以做既就係希望可以贏波，贏波先仲有希望。另一方面亦都叫自己準備好接受輸波完季既結局，好有可能今日之後可以疊埋心水迎接我地既第四季德乙。

今日五場波會喺免費電視台做 Konferenz 直播，Konferenz 可以話係德國獨有既足球直播文化，就係喺一個台可以睇哂幾場同時踢緊既比賽。每場波都會有專屬既講波佬，電視台會不定時咁轉去另一場波，另一場波有入球時就會有人大叫，鏡頭就會即刻轉去有波入嗰場。簡單黎講睇 Konferenz 可以睇哂入部入球，唔會因為㨂咗場悶波而浪費時間。好多人又見到我地個地盤球場黎問到底我地個球場幾時先擴建完成（所以點解我地既主場波永遠唔會被選中做星期六精選）

Anyway，開波唔夠五分鐘我都仲未開始緊張就已經有個角球仲比 Rohr 頂入咗。！！！？？幻覺黎架姐，嚇我唔到既，領先一球先最危險呀！大約十分分鐘後比壽星 Mokwa 射入佢最殺食既空門入球，二比零！我地唔係未試過領先兩球倒輸返架，唔可以放鬆住。。。

作客看台雖然仲有大約三百個位淨，「只有」 1200 位球迷到場黎支持自己隊波去出戰一場重要既比賽。當然我地無咩資格去笑人，調返轉如果今日係我地去作客既話應該一半人數都無。再加上佢地看台入面既參與度極高，就算去到半場失咗四球佢地都完全無停過打氣。聲勢就真係麻麻，但喺九十分鐘入面為班球員打氣至最後一刻。

淨係以今場波黎睇，對面真係完全唔似我地好驚既聯賽第二位。。。成盤散沙咁，誤傳誤到係直接送個波去我地腳下，比 Poreba 放個靚傳比 Petkov 射入第三球。之後又有唔知邊個一個靚直線去右邊比 Petkov 射成四比零。呢個時候上半場都未完，每個攻勢都係入波咁，好有德丙進攻足球既感覺！！入到第四球之後，大家都唔再忍住對升班既希望，終於開始唱：Werdet zur Legende – kämpfen bis zum Ende – für die erste Liga – SVE!

諗起上季，我地同樣都係去到尾三嗰場喺紐倫堡反超前開始唱。同一時間另一場波漢諾威對榜尾由先失兩球對半場前追和。下半場仲反超前，即係我地又係好似上季咁，只能夠做好自己同要靠人地失分自己先可以有機會。唔理咁多，踢埋呢場先再算！！下半場對方進取咗好多， Kristof 自爆喺近柱擋咗個波入網比對方追返一球。去到補時階段，早幾場比我地話廢既 Raif Adam 都射入一球埋齋。