25.04.2026
德國足球乙組聯賽 第 31 週
SV Darmstadt - SV Elversberg
Stadion am Böllenfalltor
賽果：3:3 (2:3)
入場人數：17,810 （1700 名作客球迷）
門票：17,60€

今季最後一場喺射燈下進行既德乙賽事，主隊今季係第八次被安排喺星期六晚喺免費電視台直播，黎到季尾我地兩隊都仲有份爭升班，好順理成章再次被選為今週精選賽事，鄉下隊再次喺 RTL 出現。

作客 Darmstadt 係我地全季唯一一場「主場賽事」，由法蘭克福南下車程已需半個鐘左右，搭火車就大約一個鐘多啲。 上個月開始揸純電車後都有開始揸佢去睇波，今日係唯一一次來回都唔洗叉電，仲夠電可以揸多幾日先喺公司免費叉滿佢。賽前我地早少少出發，喺 Darmstadt 市內行一個圈再去食個早飯。

今日本來想喺法蘭克福食台式炸雞，但計完時間唔係好啱就去到先食～ 德國呢排好興中式手打麵，有啲仲係集團式經營喺唔同城市都有分店。我好中意食刀削麵同牛肉麵，多咗呢啲餐廳好啱我胃口～～ （我係偏劣食都 ok，所以我唔評論好唔好食啦） 總之乾淨企理唔太咸又唔係無味就得～～ 食飽之後仲可以食多兩球 Gelato 先出發去球場。

作客停車場位於球場東北面既大學區內，由大學校園行去球場要大約十五分鐘，中間仲要穿過個樹林先到達作客入口，條路好複雜，個個跟住帶頭嗰個行，行到一半先知原來行錯方向。聽過十幾年前喺德丙第一次黎作客時個巴士司機又係唔識路，喺大學附近求奇放人落車，嚇到啲警察要狂奔去帶路。

上季我地得大約一千人作客，下層個企位看台已經極之混亂。看台入面得中間有所謂既通道比人上落，但入場時企喺最上面其實睇唔到下面邊度仲有位，最後就係啲人唔敢行落去再去側面搵位，個個塞死哂係看台中間唔上唔落。搵到位都算，由於呢個區位於邊線角球旗位，你向左望係唔會望到左邊角球旗，即係根本成個看台都係視線受阻區域。 唯一好處就係場波向呢邊攻既時候可以睇到有無越位囉。

今日兩邊都準備咗 Choreo，主隊既球迷組織 Usual Suspects 慶祝二十週年準備咗三重奏 Choreo，首先係一大塊覆蓋成個看台既大布，上面畫有組織成立年份 2006 到今年 2026，中間一大個組織 logo，到球員進場時就拉低呢塊大布，每人手上都有唔同既門旗，上面有啤酒、波鞋、會徽等等唔同既 icon，喺看台前就拉起大字同幾人球員人像。 佢地真係每次星期六晚既比賽都有野比電視上既觀眾睇！！

相比之下我地既 Choreo 就十分之簡單，看台前四隻大字： Alles für den Sieg，為贏波附出一切。 看台內每人一枝旗人，企位看台白旗，上面就黑旗；下層就有放大約四十粒閃光彈。 下層睇落唔錯，上層啲黑旗就唔太明顯，但都已經進步咗好多！！！！本來擔心天未入黑會睇唔清啲閃光彈，最後個效果絕對成功！！

開波後唔夠三個字我地就連失兩球波，第一球係對面開角球個波彈咗去禁區頂比對方一抽入網。重開波後一個回傳直送咗個波落對方腳下輕鬆射入第二球。心諗唔係咁玩野嘛。。。。難得又一次作客滿座，個個好咁開心黎睇波，難得個作客看台咁集中啲聲勢可以勁集中同好易控制，估唔到未夠半場已經玩完。十分鐘後我見到對面一片混亂下個波飛咗入網，追返一球！ 又唔夠十分鐘後無啦啦有個紅衫友起腳又射咗個波入網，追和！！！？？ 去到近完半場前對方因為侵犯 Mokwa 單刀機會所以食直紅離場，我地喺禁區頂有自由球。。。。直射入咗。。！！！？？？反超前！！！！！！？？？本來追和嗰陣個作客區已經好興奮，入到第三球就再推高看台內所有人既情緒。企正喺看台前既我食聲食到勁應，可以話係我地今季作客氣氛最強既一次。

下半場開波前，對面就展開 Choreo 第三部份。看台前拉起另一塊 Usual Suspects 既大布，看台內啲人有藍白旗仔，聽到佢地喺度倒數曬碎紙。但成件事喺塊大布後面進行無人睇到。 然後仲有喺看台後面放煙花，好似慶祝新年咁。黎食花生既人一定覺得呢場波好抵睇，有入球又有煙花睇！！！

早兩場對史浩克，對面食紅牌之後我地完全無優勢；今日食紅牌之後我就一直諗住史浩克場波，果然真係惡夢成真。 對面喺左邊底線傳中空哂追和返，之後我地踢得開始有啲亂，中場好多誤傳比唔到個波上去，成個下半場加埋都唔知有無兩腳射門。。。 但睇得出班球員係出盡力想去搶分既，可惜未能如願。 球證一吹完場雞，主隊啲球員即刻瞓哂喺地下，因為佢地知道贏唔到呢場波就等同斷送升班機會。 我地班球員都跪地回氣，最尾嗰廿分鐘兩邊都 chur 到盡哂，兩邊都爭唔到各自想要既結局。。。。

呢一分叫做可以幫我地吊住升班既希望，但睇黎我地最後只能視第三位為目標。而事實上呢個比賽週後我地又踢返落第四，想爭升班就只能靠自己，贏唔到波就咩都唔洗諗。。。 下星期會係決定命運既最重要一場。。。。。又要好煎熬咁等一個星期 T_T