18.04.2026
德國足球丙組聯賽 第 34 週
1. FC Schweinfurt - Hansa Rostock
Willy-Sachs-Stadion
賽果：0:0
入場人數： 7676 （4000 名作客球迷）
門票：27€

好好彩撞正我地星期五踢德乙，而今場波就星期六踢，終於可以去哂所有德丙球場打卡，同時又可以睇下 Hansa Rostock 班癲佬又會搞啲咩事出黎。

主隊 Schweinfurt 位於巴戈利亞州北部，係今季既升班馬，亦係今季既超肥美魚腩，任人魚肉。 啱啱去到上場佢地提早篤定成為升降機來季落返地區聯賽， 今日就迎來想搶分升班既 FCH.

FCS 本來都唔係啲咩大球隊，有一個小型球迷組織，但地區大佬係南邊既紐倫堡，就算升咗上德丙都唔係好多人入場。 我地早兩星期喺網上買定波飛，坐正喺作客看台對面。 入到場發現今日場內超過一半人數都係作客球迷。 個個毫無避忌咁著上自己既波衫，但又好得意個個都勁友善。 可能佢地知隊波既臭名遠播，想可以喺主場區睇波就要好好控制自己既行為。

我地入場後先去買野食醫肚，去得巴戈地亞地區就唔少得戶外既野餐長枱同埋個個都買一公升啤酒去飲。 我地就買咗 Käsebrezel 同埋炭火燒牛肉腸再加兩杯 Radler 就埋位曬住太陽食野等開波。 當時作客球迷好忙碌咁準備 choreo。賽前當地警方拎咗球場枝咪話今日知道好多作客球迷到場，喺主場區入面好多作客球迷，佢地唔會特登分隔雙方球迷，希望大家可以開開心心一齊睇波。。。

同時主場球迷都有野準備緊，佢地先喺看台上舉起大字報，大意指無人比球隊更重要。 就算球隊已經篤定降班，球隊內部有分歧都好，班球迷仍然會繼續一心一意支持自己既球隊！正當我地擔心兩邊會同時放煙唔知望邊面好既時候，喺球員行出場時，主場球迷就即刻放代表球隊顏色既綠黑煙，係好濃厚既煙！之後先到客隊先砌個大型 choreo，可惜個看台太扁，塊大旗唔夠凸出。隨即就放出同樣濃厚既藍白煙再加射上天既煙花（但日光日白邊個會睇到！！！？）。估唔到最後會有兩邊一齊放煙同我慶祝終於去哂德丙所有球場！！！

呢個球場好特別，唔計個主看台有啲醜之外，其他看台部份都被樹圍住，成個氣氛都好浪漫。我地左邊既看台有超多 Hansa 球迷會呼應作客看台既咆哮，我地呢邊都有少數但無跟住叫。見到對面個彎型作客看台，無上蓋啲球迷又唔集中，但佢地都可以陣陣巨聲傳過黎，好勁！！！ 另一邊主場球迷雖然人少但都有打氣叫足全場，喺核心圈入面個參與度都唔錯，只係被反客為主咗有啲慘。

前面有個著住客隊既阿叔同附近既主場球迷係咁互串但又唔會反面，好多花生食。 Hansa 其實要搶分爭升班，以為黎到可以輕易取勝，點知 Schweinfurt 個龍門上身救哂所有必入球。前面個主場球迷睇到勁嬲，係咁問點解降咗班先識守龍！！！咩賽果都有估過，就係估唔到最後係會零入球。無得睇癲佬慶祝或者傷心到發癲，最後個個好平和咁離場。。。

如無意外都唔會再黎呢度，個城市可以同 Ingolstadt 比較，兩個地方都好醜，完全無特色之處。