17.04.2026
德國足球乙組聯賽 第 30 週
SV Elversberg - Karlsruher SC
Waldstadion an der Kaiserlinde
賽果：3:0 (1:0)
入場人數： 9307 （1500 名作客球迷）
門票：季票

星期日輸波後，唔夠一個星期又返到同一地方迎接另一隊波，希望可以喺邊度跌低就喺邊度爬返起身。今日黎作客既唔係頭五，而係喺中游無野好爭既 KSC。以往績黎講，上半季作客時打破宿命第一次贏波，今日會唔會可以第一次主場都贏埋呢？

今季餘下賽程既開波時間都已經定好哂，今日係最後一場星期五晚開波，我地趁機會早啲去 Saarland 順便去一去車房，車房話有野要執所以要留耐啲。本來諗住只需十五分鐘既事最後花咗個半鐘，我地只好將車房當成辦公室拎電腦出黎做野。 最後趕頭趕命咁做埋啲手尾，成功五點前出發行去球場。

早幾日我喺球場仲凍到震（著咗件 Fleece + 羽絨），今日天氣終於回暖到 20 度。我帶住件羽絨入到場就剝咗無再著過，好多人都只著 TShirt 甚至半裸上半身。 星期五踢主場波既好處係個個都可以盡興，唔洗擔心第二日要早起身返工返學，再加上天氣好，個個心情都好靚。

數下數下原來今季得返五場波，過去兩場失分後我地跌出頭三，開始提返自己唔好幻想太多，專注今場波先。 客隊一開始都仲有板有眼，好在有 Kristof 守得住個龍門力保不失。我地喺中場有幾次失誤， Conde 呢幾場真心麻麻，好多腳波都送咗比對手。好在我地有既係（我唔認得既） Petkov，佢上個月剪咗頭髮之後我到而家都認唔到佢，反正後來得知第一球由佢突破越位再睇準中間有位既 Pherai 靚傳撞射入網。

KSC 球迷由開波前到失波都完全無停過打氣，有幾下儲氣一齊大叫既時候大聲到連 Block C 都可以清楚聽到。佢地呢幾日其實勁忙，星期四要去法國幫 RCS 助陣（仲成功反勝緬恩斯），今日黎作客，星期日要北上幫哈化柏林。今日無論人數、旗海同聲勢都絕對係頂級，只係場上水準只能夠保持到十五分鐘左右。。。

下半場我地踢得好好多，有一段時間看台入面想試下玩新野，唱某一首歌既時候舉起頸巾白色嗰面，第二段就轉去黑色嗰面。成件事太複雜個個都手忙腳亂，我就周圍望緊笑啲人跟唔上個節奏時咁啱望返去球場方向就到個波飛緊入網。我地啲球員一係唔入波，一入就連入兩球，Pherai 再次靚射拉開比數！之後再有 Zimmerschied 入咗球迪斯高波，佢企定定擺橫隻腳就𠝹咗個波入網。 最後我地仲成功守到 Clean sheet!

對面就算輸到第三球都完全無停過打氣，完場後仲一齊唱歌為班球員打氣。反正都無野好爭，不如開開心心睇波用正面心態迎接新一季吧～～ 我地就開心同班球員慶祝，仲有等 Schnellbacher cooldown 完走入黎看台同大家合照一張，慶祝（同多謝）佢為球員披甲 200 場波，佢絕對係我地既一份子，係名正言順既 Fussballgott!

受惠於其他球隊既賽果，我地贏咗呢場波成功上返第三。賽後訪問問 Pherai 點睇其他賽事，會想邊度贏波或者和波？佢話完全無所謂（然後領隊 Wagner 喺側邊勁自豪咁點頭），我地只集中自己既表現。 無錯，下場繼續！！！！