12.04.2026
德國足球乙組聯賽 第 29 週
SV Elversberg - FC Schalke 04
Waldstadion an der Kaiserlinde
賽果：1:2 (1:1)
入場人數： 9307 （1600 名作客球迷）
門票：季票

唉唉唉，輸咗波真係唔係好想諗返場波。史浩克喺我心中有一定既地位，我都好想佢地可以升返上德甲，就如迪斯高話齋，佢認為史浩克係屬於德甲所以佢想去幫隊波出一分力去爭升班。但係喺場上遇到佢地就唔係好想見到佢地慶祝，內心極之矛盾。

講起迪斯高，本來好期待佢光臨牛屎地方，可能可以重捨童年回憶喺爛地換衫沖涼；佢早兩場食紅牌好彩唔會對我地停賽，點知佢喺國際賽期間竟然整傷膊頭！！？ 波唔係用腳踢架咩？！ 我本來其實對佢無咩好感，但見到佢加盟之後好似喺個波度安裝咗自動導行咁，真係教材級射手，真係唔知佢好彩次次都企啱位定點，企定定就可以勁輕鬆入波。 我都係今年先知原來德國好多人當佢球王咁拜。諗起自己以前就係迷戀魯爾所以慢慢支持史浩克，嗰陣又係喺史浩克上咗神枱，如果係十年前咁樣要魯爾黎作客既話真心勁失禮！！！

好啦，返正今日無迪斯高，又無呢個又無嗰個，以為都唔會太難踢。 今日仲有兩班好友黎作陣，冰球乙組 Bad Nauheim 帶咗堆人黎，然後最後 friend 搭 friend 咁同 Garmisch 熟咗，佢地又帶咗一班人黎。賽前喺條村過半百人浩浩蕩蕩咁一齊行上球場去等開波。

史浩克如常企滿作客看台，佢好有唔少人入場時已經包哂頭，即係今日會有煙花睇。 等到球員入場時都仲係乜都無，我估佢地應該係等入波先放（。。。。。） 開波唔夠五分鐘，我地就喺自己半場把握到機會放個長傳去前面狂追，被 Schnellbacher 射破門神 Karius 既十指關領先。 當時真係以為今日會有完美結局，點知。。。。。 愈踢就愈唔太對路。

今季睇咗幾場史浩克，一直都唔覺得佢地踢得好睇，入波一球起兩球止，榜尾啲球隊入波仲多過佢地。但今日我地真係完全兩個 Level，上半場佢地攻勢多好多，我地又把握唔到幾次機會，最後就係對返入靚波追和。下半場對方有人兩黃一紅踢少個，後來睇返先知其實係 Petkov 踩到對方在先再瞓低，諗返轉頭諗如果球證有眼既話我地可以唔會輸。

因為對方踢少個之後反而更加有火，好快仲入埋波反超前。 後來我地愈踢愈廢，首先係 Mokwa 繼續永遠搶唔啱點，有兩次同 Conde 喺十二碼點爭波射（想點？？），喺左路換入今日新加盟到最後開始間唔中有後備上陣機會既 Raif Adam。 佢甩哂左邊既波，比直線靚波無一下追到，有無人願意 Mokwa + Adam 兩個一齊打包買走？？？？ Block C 內既氣氛喺失第一球就差咗好多，個個都好緊張無意打氣。。。

最後就係輸波完場，史浩克喺榜首拉開距離，比漢諾威爬頭。賽後見到班作客球迷好開心咁慶祝，冷靜返之後都真係好鄧佢地開心，頭五位之中我當然最想佢地可以上返去！暫時我地一和一敗，呢兩場真係抹去咗好多幻想。。。。 唔想再諗咁多，星期五再算。