05.04.2026
德國足球乙組聯賽 第 28 週
Hannover 96 - SV Elversberg
Niedersachsenstadion
賽果：1:1 (1:0)
入場人數：38.300 （約 400 名作客球迷）
門票：19,80€

過咗國際賽程後，返到德乙進入今季既最後大直路。黎緊幾場連撼其他爭直接升班既球隊，今日先對追追下又追返上黎既漢諾威。

先唔講場波，講返早兩星期既一件大事，就係喺球會八年既體育總監 Ole Book 轉咗會去佢由細支持到大既黃黑嗰隊。 上年年尾當慕遜加柏突然炒咗佢地個體育總監嗰陣就傳過佢會去接任，但球隊好快就宣布同佢續約等大家鬆一口氣。

我印象中嗰陣嗰訪問中係有提過如果係多佢先會考慮（後來都有其他人講佢有咁樣講過），黎到三月尾多突然炒咗佢地個體育總監，陣風又再次傳過黎。 唔知點解對比起上季季尾傳領隊走嗰陣無咁緊張，可能隊波某程度證明咗我地唔係一人球隊，走咗大半隊波都仲識踢波。 只係喺心底都會擔心而家可以話領隊走咗隊波都未散其實係靠 Ole 既指導有方，咁而家連指導有方嗰個都走埋咁會點？？ 唯一能夠希望既係佢一早有份 N 年計劃比我地繼續去發揚光大。

唔夠兩三日就公布咗佢轉會消息，今次佢唔同領隊一樣粒聲唔出就走咗，而係拍咗條片自己黎宣布同多謝 SVE 各方，同時好坦白咁講能夠效力多係佢兒時夢想（佢鄉下就喺附近）。估唔到今季我地出咗個 Ebnoutalib 返鄉下追夢，而家連上咗岸既管理層都可以愛回家。 大部份球迷同我一樣對呢間新聞出奇地平靜，又祝福佢前途似錦。 （但呢方面我祝福唔到佢～～～） 無論走咗邊個，波都係要繼續踢既。

而家只可以做既亦都係多謝 Ole 喺過去八年半既功勞。 喺佢走咗後既第一場波，我地寫咗塊大字報去表示感激佢帶領我地贏得四次莎蘭盃冠軍同兩次升班，喺對漢諾威開波後展出。 今日我地有近四名人黎作客，對比起德乙處子之戰同上季足足有兩倍人數到場，又係一個里程碑。

今日我最怕既係可預計既爆冷，內心又毫無奇望。 啱啱先由加勒比海返黎，日日唔係瞓就係去游水，返到黎又黑又凍既德國又要去面對足球現實，對比好大。。。。主隊一月尾到而家只係輸過一場，慢慢比佢地追返哂啲分有機會爭直接升班既位置，果然佢地踢法極之進取，每次都爭啱位搶到個波然後好快送到個波上去，某幾個球員上哂身咁轉身勁流利，啲 no look pass 全部都勁準咁傳到隊友腳下。相反我地就手忙腳亂咁同埋睇得出個腦轉唔切，個波推多兩下先再傳既時候已經比對方封咗位。

廿分鐘左右我地終於又被迫到犯錯篤咗個波入自己龍，今季第四個烏龍球！！！！！ 第四個呀！！！！ 到底係我地行衰運定係兩個中堅都有問題？？？ 漢諾威今日對比起上季都多咗好多人入場，佢地既北看台上下既打氣聲都大聲過之前好多。 入波領先後喺聯賽榜暫時爬埋我地頭，場內既氣氛就更加高漲。我喺主看台唔太聽到作客看台既聲音。。。。

下半場返到去作客區加入打氣，理解到今日我地既戰力好一般。對方有主場之利靠人多聲音輕易蓋過我地零星既打氣聲。 後來搏到十二碼大家又勁不安，有個光頭仔拎起個波諗住射，望咗好耐先知原來係 Petkov，叻仔唔理早兩場射失既陰影今次再次射入幫我地追和。 之後換 Mokwa 入黎時個個都慘叫，有一腳佢喺中場唔知做乜無啦啦篤走個波送比對面球員？？？？？ 大佬我都唔望你入波或者有貢獻，但都唔好送大禮啦。

作客區內個個都睇到好緊張專心唔到出聲唱歌，啲攻勢唔夠入肉，轉頭又比對方反擊要靠 Kristof 發功守住呢一分。主場球迷既情緒又異常高漲，賽後見到好多人話我地有球證做第十二人。我都想投訴球證把尺係無標準囉，但因為今日唔係贏波所以我地諗住睇返賽事精華去扮客觀，反正最後我地成功捱過咗十個角球同埋補時七分鐘，入咗兩球，對漢諾威仍然不敗保住一分離場。

離場時覺得好似無睇過場波咁，突然落大雨趕我地快啲上車返歸。