21.03.2026
德國足球乙組聯賽 第 27 週
SV Elversberg - Arminia Bielefeld
Waldstadion an der Kaiserlinde
賽果：3:1 (1:0)
入場人數： 9307 （1500 名作客球迷）
門票：季票

上星期作客對住要搶分護級既球隊輸波之後，好多人講到好似升班夢碎世界末日咁。諗都無諗過頭幾日齊齊失分，個聯賽榜頭十位既位置無變過，只係比漢諾威追近咗一分，變到而家有五隊痴埋一齊去爭升班。

今日我地返到主場對住另一隊要搶分護級既球隊，仲要係升班馬，呢啲球隊先最難對付。上半季去 Bielefeld 作客時係其中一個最佳證據，成場波我地完全任人魚肉被大炒而回。 今日又無一個可預計既劇本，因為對方係第一次黎作客，一於放長雙眼睇下結果會如何～

呢兩個星期終於回春，由法蘭克福出發一路都係無雲既藍天，心情好靚。去到球場先間中有雲，望住個作客看台就有啲羡慕佢地有太陽照住。 今日話有 14 度，但長期陰風陣陣我對手長期冰冷。。 好在今個比賽週有特別活動，其中一個贊助商送襪（好似話有喻意）比入場既球迷，啱哂我拎黎套上手做真正既手襪。

鬧咗 Mokwa 幾場之後今日終於唔用佢做正選，㨂咗 31 歲既 Schnellbacher！！！ 即係唔係得我呢啲「唔識波」既人覺得佢無表現，領隊都睇得出要做轉變，而佢又真係肯變陣。開波唔夠十分鐘 Conte 就拉親大髀傷出，唉唉唉，啱啱先好返無耐有得正選上陣。。。希望唔太嚴重唔洗抖太耐。 今日有 Schnelly 喺前面即刻睇得出多咗好多走位入攝，第一球既團隊合作真係完美：Günther 唔等個波碌出界去開界外球 （Zimmerschied 已經一早舉定手話係我地波），追波直線比 Zimmerschied 落底線傳中，Schnelly 走位啱啱好用腳尖篤到個波比 Petkov 轉個身就起腳中柱邊破網。 呢啲係我認識既 SVE!!!

之後都睇得出隊波今日終於回魂踢得出應有既水準，最主要係 DSC 唔係踢全場緊迫，我地班球員終於有氣抖，唔會每次一有波在腳就有人衝埋黎迫。下半場開波五分鐘左右，我地本來喺中場被吹罰犯規，Schnelly 就仲食住道氣想帶走個波，同時比人從後踩正佢腳踭對上個位直紅出場。呢一下 Schnelly 最後無咩事，但幾分鐘後又比人踢中，係時候要換佢呢個老人家出場比佢抖下換入 Mokwa。

因咩原因覺得佢唔掂都已經講咗幾場，今日可以 copy and paste 早幾場講既野就夠，唔洗多講。佢落場後幾分鐘， Petkov 開角球短傳再落返佢腳下，佢就自己帶住個波入禁區再拉遠柱中內柱入網。我個視線睇唔到入波嗰刻，淨係見到 Mokwa 喺尾柱衝埋去，以前比佢咁咁好彩篤到個波入網。 但見到啲球員慶祝先知係 Petkov 又一個靚射入網！！！ 最後再由 Conde 射入今季第一隊幫我地埋齋。

呢個時候，作客球迷已經放棄咗打氣，個個靜哂落黎唔再搖旗，就好似我地去佢地作客嗰陣咁。 尾段佢地踢入一球都無慶祝，我地好多人都唔知對方入咗波，幾分鐘後先問點解無啦啦 3:1?？！！ 哈哈！ 完場後對面都好快執哂野離場，我地就當然要同球員慶祝升上榜首。

Capo 問大家意見想唔想一齊大叫 Spitzenreiter – 因為我地只會喺第一位留四個鐘。 今晚係 Darmstadt 對史浩克，無論賽果如何我地都會跌返落第二。 但個個都話要享受呢一刻，唔理咁多，叫咗先算！ 最後一齊為 Günther 唱生日歌作結。

後來喺網上得知 Asllani 今日又黎咗睇波，嗚，佢星期五先去完萊比錫作客慘敗，今日要回家搵我地黎尋回足球樂？！！ 最近有個訪問叫佢組隊波會㨂咩球員，佢隊波半隊都係 SVE 球員，有 Rohr 做中堅， Pinckert 做右閘，Neubauer 做左閘，Schmahl 做攻中。佢到底幾時離隊等我可以追佢！！！！？

黎緊週末係國際賽程無波睇，可以好好休息一下。 抖完就開始地獄賽程，學領隊講，一場波入面十分鐘可以天翻地轉，我地仲有成七場波仲要對哂所有爭升班既直接競爭對手，有咩事真係留返五月先再講～