13.10.2023 國際友誼賽 英格蘭 對 澳洲 溫布萊球場 賽果：1:0 (0:0) 入場人數： 81116 門票： 35£ 更多相片
今季我地每個週末都圍繞住德乙而行，黎到年尾啲假又用得七七八八，見到呢個無比賽既週末心郁郁又想去第二度玩，最後㨂左請兩日假去英國探親，又可以帶兩老去大球場睇波。
張機票同波飛早係七月未開季就已經買定左，每人 35£ 就可以入溫布萊睇波，應該就算坐唔滿都有九成滿既！我地星期五一早出發搭 Uber 去機場。 第一次遇上唔識揸車既司機，佢明明有導航帶路都要我地提佢先記得轉彎。 係鎮內龜速，上到公路就極速狂奔，但架車期踩線，真心驚最後見唔到機場！！ 落車後要去麥當勞食個包定驚，然後就過關去等上機。
上機時偷聽到有幾個乘客有啲小插曲，我唔知佢地係咩人但佢地係用神根簽證黎到德國然後諗住上機去倫敦。係歐洲如果你唔洗 check-in 行李的話，基本上你做網上 check-in 去到機場就可以直接過關唔洗再去櫃台，係有少部份航空公司見你唔係用歐盟護照會要求你去櫃台比佢地對護照。 呢個乘客就去到閘口先比職員發現佢無有效英國護照，個乘客話佢有神根護照包埋英國喎，最後我地班機要 delay 大約十分鐘，因為要搵返佢地既行李出黎… 就算英國無脫歐佢地本來都唔係神根地區，有時真係唔明點解啲人唔會做好資料搜集？
好在班機最後都算準時到達，又好快咁過到關，唔洗半個鐘就已經去到 Underground 搭車出市中心。 今次黎英國好難得早幾個月就定好左， 錯過左幾次之後今次終於成功可以一個月前訂到上去 Sky Garden 既門票！ Sky Garden 倫敦既免費對外開放既空中花園，但係要上去就一定要上官網訂飛，佢話可以 walk-in 但我估無人成功過。 七月買完機票之後我即刻睇下會唔會已經有十月既飛賣， 日日都話無票剩。我明明好耐之前間唔中睇過，例如我今日去官網可以見到幾個星期後邊日仲有飛咁。去到八月尾日日睇佢都仲係每飛，去到某個星期一發現原來佢而家每個星期一大約當地時間朝早九點就會放四星期後七日既飛出黎，即係我今次 10 月 13 號去，我要 9 月 11 日朝早去搶飛。 我第二日再睇佢得返平日仲有啲飛，週末好快比人搶哂。
佢話要對名又話唔可以早唔可以遲，同埋只有一個半鐘時間可以上去逗留。但其實佢得個講字，或者佢只係保留最終話事權，到真係要趕你就可以話條款寫得好清楚。 我地出左城之之後就先去 Cannon Street 站既 Whetherspoons 食早餐，㨂呢度係因為知道出面大雨，貪佢係站內又已經夠近 Sky Garden。 食飽之後見到出面停左雨，我地就去河邊散步，由 London Bridge 行去 Tower of London，再慢慢行入內街去 Sky Garden。
我地訂左 12 點，但 11 點半就已經去到門口，見到好多人係出面排隊。 隊頭同隊尾都有職員查飛，佢見我地有飛在手就比我地去排隊，去到最前個職員都係係咁e 望下張飛就放我地入去，無人對名、對時間同嘟 QR Code。 過埋安檢之後就搭電梯上去 35 樓就已經到頂 ._.
本來我好期待可以親眼見下個空中花園，上網睇相好似好綠好靚咁。 每一出到大堂一棵樹都見唔到，好快就比佢個室外觀景區吸引左出去影相，由左至右咁慢慢睇過去，啡色既泰晤士河就係我地腳下。 天公造美場雨咁岩停左，我地可以企係出面睇風景，享受下得幾秒既太陽同陣陣既強風～ 睇到開始凍就行返入去，原來啲花花草草係個花園既樓梯兩邊，可以行上多一層同望另一邊既景。 上到去仲有一層無咩人，我地就坐低休息下。 成個花園既枱櫈都係可以免費享用，唔洗特登係酒吧買杯野飲先可以坐低，中意坐幾耐都得！ 下次我地可以再黎過，然後會係樓下買定野食上黎開餐～～
係上面逗留左一個鐘左右，我地就落返去搭車去唐人街食少少野同買麵包，然後就行去 Green Park 搭 Jubilee Line 去 Wembley。落車後出閘迎接我地既係通往溫布萊既奧運大道，即刻要停低影返幾張相先。 我一早幫兩老訂左 Red Parking 車位，由地鐵站要行去球場另一邊近 Outlet 先係個停車場。 佢地大約四點鐘泊低架車之後，我地就去 Outlet 食飯先，當時時間尚早㨂岩餐廳就可以直入。 去到大約六點間間餐廳外面都排哂長龍，真係好在我地早啲黎食飯。
Wembley Park 附近有好多新式住宅，路邊有好多租屋既廣告仲話免租一個月。 我後來八卦上網睇下租倫敦 Zone 4 租樓要幾多錢； 一房最少要成 2400£ 一個月，啲裝修睇落都幾四正，但個價錢真係…. 到底啲人係點樣可以住係倫敦？
我地要由藍色區域既 A 閘口入閘，球場外既地圖無指示應該點樣行，淨係知我地係黃色區，係藍區既對面。 咁諗住係正對面，向左同向右行都應該無咩分別就決定行返去奧運大道嗰面兜過去。我地其中一人有啲行動不便拎住枝拐杖，見到第一條樓梯就諗住上左去平台再行，睇落好似少人啲，有個職員即刻衝埋黎叫我地唔好行樓梯咁辛苦，去返正門嗰面可以搭電梯上去。去到正門淨係見到另一大條樓梯，行到樓梯底我地開始有啲迷路，好在佢地有好多著住 Here to help 既紅衫人見到你一好迷惘咁就會走黎問洗唔洗幫手。 上左平台之後發現我地原來兜左一個大圈，如果一開始我地行另一邊既話行兩道閘就已經到左 ._. 好在最後都趕及係落大雨之前成功入場！ 多得枝拐杖，我地可以搭 lift 直上五樓，唔洗搭扶手電梯慢慢上去。
上到去仲有一個鐘先開波，係球場外面兜左一大個圈之後我地先搵返自己位坐低抖下先！ 兩老好興奮咁係咁影相，我地都覺得個球場好正，呢個全座位既球場可以容納九萬人！！！ 如果佢地會好似歐洲咁將其中一邊龍門後既看台改為企位既話一定更加正～～ 當時個天開始倒水，望住下層看台啲位全部濕哂，我地就坐係山頂食花生。 坐左一陣就返入去買杯啤酒暖下身，等到差唔多開波先再入返去。
賽會宣布陣容既時候， 每讀完一個球員名之後大家都一齊拍手 Yeahhh 下佢，係去到軒達臣既時候大家一齊噓佢。 原因唔單只係佢㨂左去沙地阿拉伯掘金，而係佢一時話支持 LGBT 運動，但又㨂去一個無人權既地方踢波，佢話去到人地地方要尊重人地文化，去沙地阿拉伯係為左改善當地既足球文化喎。 其實佢點包裝大家都知去得沙地就係為左錢，講到自己咁偉大做咩？ 宣布陣容嗰陣球場內都仲未有一半滿，噓聲唔算太大，去到下半場佢被換早時大家終於噓到佢都聽到仲上埋報 ^^
班球員入場後就播國歌，然後就為近期既以加衝突默哀。 開波後間唔中有人會帶起一齊叫 England， 雖然我唔係英格蘭粉，但為左兩老可以投入啲我都叫埋一份等佢地都一齊打下份玩下 xD 無咩氣氛同玩人浪我都仲接受到，我最頂唔順既係好多人都遲到，唔係遲兩三分鐘，而係十幾廿十分鐘。 好多人大約 80 分鐘就已經離場，我地前面有一家人係開左波半個鐘先到場，個阿媽就係咁幫兩個仔影相，然後未到 80 分鐘就提早走人，比 40 歐入場到此一遊就得，可能今場只係友誼賽無重要性，贏輸都唔會錯過啲咩。
唔知係我地問題定係英國波既問題，未開波我地已經估今場唔係和波就係得一個入球。 果然全場唯一入球就係下半場開波無耐出現…. 場上啲球員我好多都唔識，淨係識阿諾同 Grealish，澳洲反而有個我識喎，踢緊聖保利既 Metcalfe，係我地今季既對手！！
完場後我地等啲人散得七七八八先慢慢離場，一轉右唔洗五分鐘路程就已經去到我地個停車場 ._. 賽後我地預左會塞車，只係估唔到呢一段路仔可以塞左接近九個字先成功上公路逃離倫敦南下。 唔知如果搭地鐵走既話會唔會都係要等好耐呢？