08.10.2023
德國足球乙組聯賽 第 9 週
Holstein Kiel - SV Elversberg
Holstein-stadion
賽果：1:1 (1:0)
入場人數：12675(約 100 名作客球迷)
門票： 17€
更多相片

德乙開季以來都係去啲已經去過既球場作客，黎㺫第九週終於有機會去一個新城市同新球場，目的地係北部既 Kiel。

當賽程出左之後我地即刻訂左火車同酒店，經漢堡轉車再搭一個鐘左右火車去 Kiel 兩日一夜。去程回車同去 Hannover 一樣㨂搭 flixtrain, 每人只需 10€ ～ 第二轉火車可以用我地既 Deutschlandticket 月票算係免費。 回程係漢堡返法蘭克福搭 DB, 如果程車有咩問題起碼佢地之後既班次可以補救到，唔似 flix 每日得一兩班。

呢場波被安排係星期日上演，我地星期六一早就出發，搭八點火車連埋 delay 最後大約下午三點到達 Kiel 就先去酒店 check in 同休息一陣， 然後就趁佢停雨時出去市中心行街。 Kiel 位於波羅的海海岸，有連接瑞典同挪威既遊輪，當日仲有 Aida 郵輪埋岸， 仲見到潛艇工場同軍事基地可以離遠望下。夜晚食完飯就同其他早一晚黎到過夜既朋友聚一聚飲返幾杯，聽佢地講下十年前係德丙黎作客既趣事。 當年總共得八條友到場，凌晨由莎蘭出發直踩到 Kiel （一程 700 公里），去左軍事碼頭影幾張相就去睇波。 嗰季佢地只贏過三場作客比賽，其中一場就係作客 KSV，勝率 100%！

今日再次黎到 Kiel 作客，係網上面有唔少人分享佢地會點樣計劃到作客，有啲就會揸露營車，有啲自己揸車搵人 carpool，有啲就好似我地咁搭火車，呢度都已經多過當年既八個人！ 可借最後球迷巴士唔夠人未能成行 （凌晨一點出發），但最後我地係球場加加埋埋竟然可以有近百人！！！

比賽當日我地由酒店出發搭三個字巴士去到球場，係門口買飛要成 17€ 勁貴囉。 Holstein 球場既作客看台唔係位於龍門後，而係邊線角球旗邊，視線係睇唔到右邊遠處角球旗同前面既邊線，不過我不嬲都唔追求開完美視覺所以無咩所謂，只係要長期擰個頭向右邊搞到條頸好攰！

接近開波時間，啲球迷都黎得七七八八。 作客企位區有大約五十人，座位區另外再有五十人，星期日下午波黎講，真係一個唔錯既數字。 呢個球場可以容納萬五人，主看台有部份其實係無上蓋，唔知點解過左咁多年德足聯都仲肯通容佢地唔洗跟德乙球迷既規例？

主隊開季至今既成績好好，過左八場波排係頭四，我地要贏絕對唔係一件易事。 開波後果然比對方㩒住黎攻，唔係有神龍 Kristof 我地今場應該係大敗而回。去到完上半場前對方係禁區外搏到自由球，由賀治比開出我地清唔到個波，比人地搵到機會偷雞破網 。我係去到今日係場內宣布陣容我先知原來賀治比返左德國搵食～～～ 估唔到咁都有機會見返曾經迷過既球員～

下半場開波後形勢都無咩點變，我地都無咩動力打氣，長期靜左落黎。有段時間兩邊龍門後既球迷對唱唱左差唔多十分鐘，等到佢地唱完時靜左落黎我地即刻接力唱做我地既版本。 我地左邊既球迷人多勢眾咁合力藝過我地把聲係度鬥氣，我地鬥左幾 round 之後互相拍手示意尊重認輸唔夠佢地大聲，笑死。過多幾分鐘，個波突然出現係我地眼前，然後我地見到既係 Schnellbacher 勁瀟灑咁挑高個波笠死龍幫我地追和！！！後來睇返精華，唔知點解 Sahin 會係後場出現，佢望到 Schnellbacher 係前面準備起跑就放個波比佢，然後就出現我地眼前既畫面。換人之後大家好似醒神左，有兩次機會把握力好少少既話隨時反勝埋。 完場後個個都話執返呢一分個感覺好似贏左波咁，完全收貨！！ 大家好快就離場，趕住今晚可以返到屋企明天開工。

我地都係返去酒店拎行李就踏上歸家路途～ 最後大約凌晨一點返到屋企，第二朝準時起身返工！ 下星期係國際賽程，我地將會有機會入場見下其中一個必到既球場！