16.09.2023 德國足球乙組聯賽 第 6 週 SV Elversberg - Hamburger SV Waldstadion an der Kaiserlinde 賽果：2:1 (1:0) 入場人數： 10150 （約 2500 名作客球迷） 門票： 季票 更多相片
唔係馬後炮，真心唔係馬後炮，我地已經講左幾個星期： 漢堡開季至今不敗紀錄一定會由我地終結。
我地錯過左嗰兩場聯賽，一悲一喜，主場迎戰 Düsseldorf 慘敗五蛋，但望下人地今季暫時既成績同其他人賽後既評價都話我地係被技術性擊倒，班球員出盡力都搵唔到機會入波無野好講。 然後作客同我地一齊升班既 Osnabrück， 我地人少少得百幾人去作客，佢地見證到球隊取得德乙第一勝！！！ 由史特加黎既借將 Faghir 一球定勝～ 另一位由拜仁借過黎既 Wanner 第一次上陣就黎個靚傳助攻！ 呢三分真係好重要，我地對住啲大隊輸波當交學費，但對住升班馬我地點都要展出下德丙冠軍既實力～～ 聽人講呢場波既後防進步左好多，守得住不失球係另一個成就！
然後黎到呢場波，我地終於迎來漢堡…..大名鼎鼎既 HAMBURGER SV，個個都恥笑既 HSV！！！！ 雖然由佢地降班落德乙到而家我都有每年恥笑佢地護級成功，但始終人地係傳統勁旅紆尊降貴黎到呢個無火車站既鄉下地方….. 以普通球迷角度黎講其實係一個榮幸可以同佢地對碰。 我地有呢個機會唔只係人地成績差定乜，而係我地隊波咁多年努力返黎既成果，呢場波能夠上演係因為我地踢緊德乙呀！！！
賽前有好多好得意既比較，包括漢堡歷史上封王既成績，包括德甲、足總盃、歐洲賽等等，而我地既歷史係八次莎蘭盃冠軍，一次德丙冠軍咁 😀 仲有佢地既平均作客人數係大約一萬人…. 而 Elversberg 呢條村得嗰七千幾人，計埋鄰村官方數字都係得萬三人，同埋我地個球場而家都只係容納最多一萬人左右._. 好多漢堡球迷都黎唔到。。。。
Kaiserlinde 係臨時擴建工程完成之前只容納大約 6000 人，今季緬恩斯黎到作客就有超過 8000 人，當時球隊話最多可以容約一萬人時我地都問到底邊度仲有位可以塞得落多二千人？ 答案就係今場揭曉…. 波飛開售未到公開售票就已經比會員同季票持有人買哂，好多網友搵我地幫手買飛想黎食花生，但我地因為幫朋友買飛已經用哂 quota 都幫唔到外人買。 以往啲大隊好容易可以買到主場飛黎到反客為主，今季好多主場鄉下友搶啲哂飛等客隊無咩機會買飛，大大改善被反客為主既情況！！！！球場今日都有少少改變，主看台原有既紅黃座位變成黑白，紅黃色既原意係來自市徽既顏色，但而家改用代表球隊既黑白色更加貼切。
有個朋今日會黎呢場波報比數賺下外快， 我同佢兜左個大圈去到球場既另一面經過作客區先搵到傳媒入口 ._. 送左佢入去之後我就同另一個朋友行返返去 Block C/B 既入口，條龍係前所未有咁長….. 我幫朋友買左 Block B 看台無咁多人可以好快入到場，我就先入 Block C 影幾張相，拎到個 pass 就過左去 Block B 陪朋友。 係 Block B 有少量作客球迷混左入去，不過佢地都係只係普通球迷所以無咩特別狀況發生～ 佢地只要唔好係 Block C 出現就得 ^^
作客企位看台底下去到近開波都仲係吉左一忽，我地打聽到漢堡既球迷組織係搭火車轉車既路上遇上同樣要南下既多蒙特球迷，雙方係火車站打交好有可能比狗禁止佢地繼續行程… 搞到我地好擔心會唔會無咩氣氛。 好在佢地最後趕及開波前入場，趕頭趕命咁掛起哂啲橫額同大旗。 （另一邊廂聽講多最後有成二百人被警察留難，要逐個查身份證，最後錯過比賽）班作客球迷一準備好就開始 HSV HSV 咁叫，然後個個都舉起哂手打氣，視覺多超好睇～ 超期待出年去作客親眼見下齊人時候會係點！！！ 企滿哂人既 Block C 都係球員入場時開始出聲～ 公道講句，企係中線既我唔係好聽到 Block C，好多時候要好專心聽先聽得出佢地唱緊咩歌。 不過都無計，人地淨係企位看台都有過千人真係會叫唱足90 分鐘，而我地仍然慢慢發展緊…. 但後來聽過 Block C 內既人講，佢地係區內既氣氛好好，完全聽唔到客隊既打氣聲！
話就話好肯定漢堡今場會輸波，但暗地裡都幫自己打定個底，贏輸都唔緊要，最緊要踢返場好波，唔好又比人大炒就得！開波三分鐘，睇住對方將個波推入禁區瞄住遠柱… 入波。 心諗，ok, 睇黎我始終都係要親眼見到隊波比人大炒一次。 但係入波之後個個仲企係原位咁，作客球迷開始唱 Scheiss DFB. 仲傷心緊既我呢個時候先發現原來 VAR 緊。 雖然我唔想失波但 VAR 真係好 on9!!!!! 我地又要唔知吹返轉頭既原因係咩？？ 最後個入球因為越位唔計，啲人後來拉返條線出黎話其實係平排。 VAR 個原意係想令到判決更加公平公正，但我唔明點解 VAR 完大家都仲可以勁多問號！！
幾分鐘後，明明我係睇緊場波，但完全 process 唔到發生咩事。。。 突然間見到個白衫友單刀射左個波入網，然後全場歡呼！！！！ 我地領先 1:0，我地領先漢堡一球！！！！ 漢堡既後衛同我一樣係度發緊夢，比 Rochelt 一迫就甩波，一偷到波就已經射個波入網！！ 好癲，好 HSV～～ 係作客看台上面有枝門旗寫住「每個失誤都係特登造成的」 笑死～ 然後漢堡又入波，但又再因為 VAR 被判唔入，後來睇返先知原來係中場犯規先搶到個波… 去到完半場前我地食左個越位詐糊，當然又係要等 VAR 判。 好煩呀成日浪費啲時間係度等等等。
半場休息時我上返去搵朋友… 我本來同佢講我行落看台底影幾張相就會返上黎，但後來場波勁緊湊完全無時間比我可以背向球場，好驚一擰轉頭就錯過左重要時刻。 諗住下半場會留返係上層，但班作客球迷係看台前準備緊 choreo，我又走返落去搵靚位準備影相，然後就係下面企到完場。
下半場如常換邊 SVE 向 Block C 攻。 開波唔夠十分鐘，我地搏到個十二碼，然後又再黎一個 VAR 改判。唔緊要～ 五分鐘後 Rochelt 落底線傳中，Schnellbacher 係門前腳夠長踢左個波入網，我地領先漢堡 2:0!!!! 之後仲有幾次有威脅既埋門，把握力好少少少少應該可以入多幾球！ 去到尾段漢堡突然開始發力，完場前五分鐘仲追返一個…. 呢個時候開始有各種最懷情況係腦海出現，每次比人搶到波都要食返粒救心。 但睇得出班球員無之前咁手忙腳亂，仲係識得一味諗住攻， 開始識得拖下時間，拖到有啲驚佢地會再食多張黃牌。 補時六分鐘，呢六分鐘緊張到氣都唔敢抖，好驚又再上演一次 Rostock 惡夢。 好在我地有神龍上身，漢堡既最後一擊係門前有連續三次必入機會都比 Kristof 護住左，賽後個個都話佢尾段既多次神救同黃金時期既紐亞有得比，仲問點解佢係奧地利人唔係德國人～～ 最後補左起過七分鐘，球證吹雞完場！
我呢邊既作客球迷極速離場，主場球迷就超開心歡呼！！ 第一次係德乙主場贏波～ 第一次遇上漢堡贏波～ 第一次係德乙連贏兩場～～ 賽後班球員圍繞球場一圈，去到 Block C 大家呼喚 Kristof 走到看台前戰獨慶祝一圈先！ 今場無佢就一定守唔住呢三分！ 然後再同所有球員一齊慶祝。
我地既「預言」亦都應驗 (H) ，狀態大勇既漢堡對住升班馬鄉下隊落敗！ 今場完左好好享受一兩日又係時候要放眼將來，我地離護級之路仍然有一大段距離，希望隊波可以繼續今日既表現繼續贏波！