09.09.2023 歐國盃外圍賽 第 5 週 安道爾 對 白俄羅斯 Estadi Nacional 賽果： 0:0 入場人數：1.026 門票：30€ 更多相片
歡樂既時光過得特別快，兩星期既旅行好快就完結，回程我地同樣要經法國同瑞士返去德國，不過我地一早睇中左今個週末既國際賽程，咁岩安道爾將會係主場出戰，我地就決定「順路」經過安道爾去睇返場波。
由渡假屋出發去安道爾既車程大約係 600 公里，沿住西班牙東部既海邊北上，去到迎巴塞隆拿就轉向向北直上。 我地朝早七點半就離開渡假屋，計劃大約 200 公里之後會入一入油，然後再揸多一陣再搵地方食 lunch。 入完油之後我地就搵下路上有咩地方值得停低，但係 Google maps 見到由 Tarragona 一段路之後去到 Andorra 都係農地咁既樣，唔係啡色就係綠色完全唔似有鎮仔。
我地穿過一個叫做 Mont Blanc 既鎮仔之後，兩邊既風景慢慢開始轉變成好似沙漠咁，令我諗起好多年前同朋友由馬德里搭巴士去巴塞隆拿途中都見到呢類風景，兩邊都係無樹既山邊，啲石係紅紅地橙橙地咁。 一個鐘後終於見到多人啲既地方，有間當地大型超市 Mercadona 泊低架車借廁所同行下超市伸展下對腳。休息左廿分鐘就繼續出發，兩邊既山越黎越高，開始進入安道爾附近地區。
安道爾位於法國同西班牙邊境，佢既存在價值應該只係比法國同西班人人走去買免稅煙同入平油，仲有冬天去滑雪。 我地穿過幾座山之後就到底安道爾既首都 安道爾城 Andorra la Vella。 係 Expedia 搵到間 70歐一晚連早餐既酒店過夜，同埋泊車費比較平 （呢度無免費泊車呢回事）。 去到酒店搵唔到停車場入口，咁就係門口泊低架車去 check-in 先。 佢話停車場已經滿左，要去兩條街後面既停車場， 20€ 一晚。 去到佢講嗰個停車場，人地收 26€ 一晚囉。
間酒店睇相唔錯，但入到房好似返左八十年代咁。 有啲酒店舊得黎個感覺係 classic，但呢度只係殘舊，就連想充電既插頭都無！ 休息左一陣我地就出去行街同向住球場方向行過去，首先想去買磁石做手信～ 買完手信就繼續行街，雖然安道爾勁隔涉，估唔到都有咁多遊客走黎玩！ 只係條街完全無野好行…. 同香港一樣每隔幾間舖就係藥妝店或者賣電子野既，大大隻字寫住 tax free 個感覺得伏。行左大約一個鐘就去到一個蚊型球場。當時場內已經有大約十個白俄球迷，唔知佢地係呢個時勢由邊度黎？
我地坐係主看台，左右兩邊都係高山，對面既後備席後面有啲主宅同酒店，個景係幾特別。 我地早兩星期係網上買飛時得返一個區㨂，以為今場波會有好多人入場，點知最後原來得一千人左右。當地人應該中意睇籃球多過足球，或者佢地對安道爾無咩親切感？又或者今場只係白俄羅斯，有咩好睇？ 的確場波真心無野好睇…. 連入球都無。
完場後我地行返去市中心食飯，然後搵酒店試下當地釀既啤酒。 太陽落山後氣溫由 30 度跌到落 16 度，凍到完全唔想係條街度逗留… 早啲返去酒店休息第二朝又要一早出發。 食完超難食既酒店早餐後，我地就繼續上路向法國出發。 要去法國就先要爬上某個山頂，海拔超過 2000 米！ 上年聖誕揸車去阿爾卑斯山都無上到咁高。 差唔多上到山頂想泊低架車睇風景時，車後面突然傳來「卜」一聲，以為架車出事，原來係其中一包薯片受唔住氣壓爆左 😀 同時我地架車唔知做乜自己重設變成法文，然後撻多次架車個芒又唔著？？
入境法國後我地就穿過一啲小鎮，大約個半鐘後終於上返公路。 去到大約 4 點當時 38 度，我地係 Montelimar 停低去買當地名產白紐結糖，想坐低食飯但啲餐廳話廚房七點先開。。。。 但我地離目的地仲有大約四個鐘車程等唔到咁耐，最後去麥當勞醫肚就算。 今晚我地會係瑞士邊境過夜，再次住係 F1Hotel，30€ 一晚連廁所～ 平過南法係因為佢無冷氣。。。夜晚得 20 度開住窗都訓到既～ 去到旅程最最最最後一日由瑞士出發，大約七個鐘後終於返到法蘭克福。呢兩個半星期既假期好完美咁完結～