03.07.2023
挪威足球超級聯賽 第 12 週
Stabæk IF vs Strømsgodset IF
Nadderud Stadion
賽果：0:1 (0:1)
入場人數：3262 （約 350 名作客球迷）
門票： 300 NOK
更多相片

星期日經歷左連場暴雨後，新一日個天氣終於好返啲，又太陽又間唔中有陣風咁好乾爽～ 天氣預報話旁晚會開始落雨，只好希望場雨係我地入場之後先落啦！

朝早我地如期去到 Munch Museum，就咁講個名未必有人識，但 Edvard Munch 既名作你一定識：吶喊！毫無藝術細胞既我地 up 得出吶喊但 up 唔出係出自邊個既手，如果唔係同事話我知佢係奧斯陸見到吶喊原作我都唔知原來佢係來自挪威！ 難得有一幅認識既畫就當然要去參觀下～ 估唔到最後我地係入面花左近兩個鐘，仲要一啲都唔覺得悶，真心推薦～～

黎到先知原來吶喊有三個版本， Munch 有好多畫作都有幾個版本～ 後來上網再睇返原來吶喊係有四個版本！ 其中一個版本以超過一億美金賣出，而呢筆錢就係用左黎呢個全新既 Munch Museum，成為奧斯陸海峽既其中一個新地標！吸收完啲文化氣息之後我地就係市中心行街行到夠鐘就搭地鐵向東出發。

呢程車要沿住海邊上山搭大約廿分鐘，去到市外一個叫 Stabaek 既地區。 落車後跟啲球迷行大約十分鐘到球場，好好彩個天等到我地入場先開始落雨！ 更加好彩既係我地買飛嗰陣㨂左上層有蓋既座位…. 無貪平㨂下層有蓋等如無蓋既位！

入到球場見到對面揚起左幾枝旗，當中既挪威國旗處於下半旗既狀態， 因為主隊既其中一個教練係賽前一日突然離世，係咩原因我地都唔清楚，只係知道係場外賽前本來既活動全部都取消哂。 等到球員入場時大家都企起身為教練默哀一分鐘。

兩方球迷都企係我地對面既看台，一左一右咁分隔開。 為教練默哀完後，佢地就拎返啲旗同口號大字報出黎掛起。呢兩隊波都唔算係啲咩大球隊，主隊係 80 年代由低組別慢慢咁踢到上黎頂級聯賽，十幾年前更加贏得頂級聯賽冠軍威風一時～ 而客隊都只係挪威南部既其中一個小型球隊，有超過三百人黎作客都算有啲驚喜！佢地既打氣方式無咩特別，只係開波無耐場暴雨終於來臨，我地十分慶幸無因為慳錢而㨂下層。

對面看台既所有球迷係暴雨下仍然堅持企係自己既位置上打氣，有一少部分開遮，有啲人著起便利雨衣，但大部份人係連帽都無笠起就咁企係雨中睇波。 我估呢場雨呢啲維京人黎講只係碎料？ 加上佢地難得夏天可以出下街，一定覺得落雨又有咩好怕！ 今場波更加吸引既係啲海鷗…. 佢地知道有人類既出現就有野食， 有幾隻雀不斷係天空徘徊，有幾隻就係咁由看台既右至左咁飛過，瞄下邊個手上有野食，邊度地上有食物殘渣…. 一唔留神除時會比佢地由手上搶走野食！

今場又係客隊以一球小勝贏波，好在有海鷗既表演分下心，如果唔係我可能會睇到訓著._. 完場後冒住毛毛雨返去，第二日一早就出發去機場返法蘭克福～ 回到日常生活，返工放工期待德乙開波！！