02.07.2023
挪威足球超級聯賽 第 12 週
Lillestrøm SK - Tromsø IL
Åråsen Stadion
賽果：0:1 (0:0)
入場人數：6637 （約 200 名作客球迷）
門票： 240 NOK
更多相片

本來㨂黎挪威係想避暑，點知黎到頭兩日都好天到日日有太陽高照，下午最熱有成 28 度。去到星期日終於比我地等到變天，由大太陽變成暴雨….. 朝早想等雨細啲先出門口，最後去到博物館 d timeslot full 哂，要等到一點先可以入場，但如果夾硬入場的話我地就唔可以慢慢睇。 星期日又無舖頭開門，其他想去既地方全部都係戶外…..

最後去左歌劇院呆望雨，坐左半個鐘之後見到雨細左就想拿拿聲衝去火車站。 好好彩佢真係停左雨，我地搏佢短時間內唔會再落雨，成功行左上歌劇院既屋頂打下卡同影相～～ 浪費左成個朝頭早終於都算有啲收獲。 影夠相之後就去返中央車站搭十分鐘火車去 Lillestrøm～

Lillestrøm 只係 Oslo 其中一個近郊鎮仔，平時應該無咩遊客會特登去呢度玩。 但呢個鎮仔有隊算係比較出名既足球隊～ 佢地既球迷大部份都係來自 Lillestrøm 自成一角！ 我地計劃左開波前兩三個鐘會去鎮中心既一間手工啤酒吧度食晏/下午茶同飲下當地既啤酒！ 當火車離開 Oslo 後，迎接我地既係另一場暴雨…

由 Lillestrøm 火車站行去間酒吧十分鐘腳程都唔洗，但場雨勁到係過條馬路都會完全濕哂。 最後我地係站外又企左半個鐘先搵到機會急步衝去目的地。 沿路見到唔少餐廳都係門口掛起左代表 LSK 既黃黑相關物品～ 我地想去既酒吧門口亦如是！ 入面坐左幾枱球迷。 我地㨂左啤酒之後就想叫野食，點知佢話今日廚房唔開………. 佢今日第三次返工，第一次返星期日都無諗過竟然會今日唔開廚房 T_T 佢即刻叫我地去附近啲外賣店買野拎入黎食！ 係對面買左個漢堡包同 pizza 就返過黎坐低品下酒，坐到差唔多時間就起程行去球場。

個球場外圍奇醜無比，好似英國咁外面係被住宅包圍。 但英國通常一係係舊式排屋或者新樓，排屋雖然睇落舊啲但起碼係英國特式。 呢度既住宅係好似東歐既公屋咁，係啲屋既露台外面掛起一個巨型既球場名牌…. 估唔到咁有錢既挪威都會有啲咁樣既建築物。 但住係度既好處就係比賽日可以免費睇波～

係球場門口有間蚊型 fan shop，有成十幾個人排緊隊。 當時仲有大約二十分鐘就開波，中間有啲當地球迷走黎叫大家唔好再排隊唔係會錯過場波，完場後仲有機會可以慢慢買！ 排左三個字終於買到手信然後就衝入場。 我地㨂左個看台係無劃位，入到看台已經望唔到邊度先有空位，最可以㨂最角落既位置見到吉位就拿拿聲入去。 好在個視線都唔太差，只係唔太望到右邊龍門後既看台，但係可以正望主場球迷同埋望頭另一邊龍門後面既作客球迷。

無諗過今場竟然會有球迷黎作客，仲要有近 200 個人！ 客隊 Tromsø 來自挪威北部，仲北過瑞典既最北！ 佢地黎作客既距離仲遠過我地由法蘭克福飛黎奧斯陸！！ 但我估好多人係係奧斯陸住既 Tromsø 人～ 同埋挪威周圍都有機場，同埋內陸機有政府補貼，對當地人黎講搭飛機唔會太貴同埋方便過自己揸車或者搭火車～

呢個球場既附近就有一個小型機場，球場正正位於係升降路線！ 為左唔會影響機場平時既運作，佢地既球場射燈平時係會九十度摺埋，去到比賽日先會企返起身，同埋係比賽前後都唔以有飛機由東面降落。 場波同啲球迷都係無咩特別， 又係客隊入一球完場，成場波睇完好似無睇波。

成場波最深刻既係，接近完場時好多人已經離座慢慢離開看台聚哂係近出口既場邊，就好似係旺角場咁個個準備球證一吹雞就可以即刻離場。 咁既場面都算見過同見慣所以都仲接受到，更深刻既係完場後唔知有無十秒佢地就即刻熄左部大電視同埋球場射燈，超級有效率！！？ 唔夠幾分鐘成個球場已經得返勁少人！ 我地一直以為法國人離場係最有效率既（完場後去完廁所出黎已經有保安等住送我出門口）….

離場後我地行返去火車站搭車返去 Oslo 市中心，然後去一間酒吧朝聖～ 又再一次佢地話今日廚房唔開。。。。 嗚，心情即刻又即刻變到勁差，搭車嗰陣已經㨂好哂想食啲咩，點知又無得食。 最後淨係飲左幾杯就返去間屋度食呢兩日食剩既野算…. 到底點解可以咁黑仔？？挪威既景點係好玩好靚，但真心無啖好食…..