今日係五月十七日，我對上一次入球場係三月七號，即刻已經兩個星期無入過球場。三月尾我開始 home office，除左去過兩次 Saarland 之外都無離開過自己條村。

如果一切如常既話，到今個週末大大小小既聯賽都差唔多係最後一個比賽週。然後我地就會話唔想睇歐國盃，所以走去愛莎尼亞避暑。係呢個被肺炎破壞左既現實世界，德甲德乙無啦啦重開，有一堆 onon99 既新規例，最討厭既就係 Geisterspiel… 閉門作賽。

我有朋友尋日入左場去報賀芬咸果場波，我話咁樣既比賽免費播我都唔會睇囉。事實上， 餓左咁耐波而家無啦啦電視有波睇，我都係開左電視睇既。Sky 好好係免費既 Sky News 台免費直播 conference，平時 conference 都係要收錢既，佢會同時直播進行中既賽事，邊場緊湊啲或者有入球既話就會轉過去比大家睇。

睇左幾分鐘就覺得周身唔自在。錯哂，足球唔係咁架。而家睇緊友賽定集訓？無年輕既德國仔唱歌，背景聲只有回音，無正常既入球慶祝聲。 聽講正常既收費台佢地會播罐頭打氣聲，即係好似打 Fifa 咁，入波就按粒制播 YEAAAAHHHHHH；比賽期間會播平時球迷會唱既歌咁。務求做到最迫真既氣氛。。。

ok， 當你可以播罐頭打氣聲，咁啲空櫈呢？ 睇左唔夠十分鐘就熄電視走返去花園睇雀仔算。

我都好想足球可以繼續，但唔係咁樣夾硬黎。我朋友話 the business has to continue 喎。 一見到 business 呢個字我都火都黎。 你話足球唔繼續既話好多人會無飯食。咁而家閉門作賽，球場小食店係咪可以開門？球場門口係咪仲有保安做安檢？球迷係咪可以入酒吧餐廳搭哂膊頭咁一齊睇波？ 小販係咪可以繼續係球場門口賣 cheap 頸巾？

德甲德乙因為要收埋最後果筆轉播費所以要繼續比賽，唔係好多球隊要破產。咁而家收到轉播費之後，啲錢最後可能只會用黎填返今年蝕左既錢，最後點樣幫到員工同無得入場又收唔返錢既球迷？有買開季票既球迷可能連工都無，唔係個個都可以話當捐錢幫補下球隊架。

「疫情之下都無計啦，大家既健康行先。」 咁仲踢咩波？佢地係球場鏡頭前有保持距離姐，你知係更衣室佢地都會保持距離？佢地係酒店會一直保持距離？已經有無腦既球員拍哂片係訓練基地周圍走，又有領隊私自離開酒店去超市買野。佢地返工好危險，其他人每日搭交通公具返工放工唔危險？到底咁樣繼續既意義何在；到底真係為左足球去娛樂大家，定係為左盤生意？

球迷到底重唔重要？主場之利講就講得多，而家數據話比你知，無球迷入場既話主隊係唔識贏波既。18 場比賽入面得 3 場係由主場贏得三分，勝率係17％。相比去上年同前年，主隊勝率係 45％ 左右。

對我黎講，足球最吸引既地方就係球隊同社會之間既聯繫。而家電視直播到底有咩值得睇？低組別啲球隊如果無球迷入場既話佢地根本生存唔到，所以低組別球隊寧願腰斬今季賽事，等到球迷可以如常入場先重新黎過。呢啲先係正常既足球生態。

史浩克話買左飛既球迷可以㨂退現金卷遲啲再用黎買飛，或者退現金。如果㨂退現金既話，可能要等兩年先收得返錢。球會話如果你真係好等錢洗既話我地可以幫你盡快辦理，但請你解釋點解等錢洗同提供「低收入證明書」。

本來見佢地好中意擦中国贊助商鞋我都扮睇唔到，繼續默默咁做史浩克球迷。可能我條根植得未夠深，或者條根唔夠健康。Sorry，叫自己既球迷同自己乞錢既一隊波我唔係好支持得落。

足球原來係咁脆弱？ 脆弱既係商業足球同「顧客」之間既關係，係足球商業化帶來既惡果。