德國巴戈利亞地區聯賽 第 23 週
SV Viktoria Aschaffenburg - SV Wacker Burghausen
Stadion am Schönbusch
賽果： 1：2 （1：1）
入場人數： 1,078 （約 70 名作客球迷）
門票： 8€ （企位）
更多相片

今個比賽週 SVE 要到星期一先有比賽，代表我地星期六日都好得閒～決定近近地去附近既城市睇地區聯賽。咁岩作客既係巴戈利亞地區難得有球迷組織跟隨既球隊，係時候要去見識下！

星期六一早訓飽食夠做埋家務買埋餸都仲有時間剩～ （又話德國啲人都去超市搶米搶廁紙既，但我附近既超市貨源超足，你一板板買佢地未缺貨！！）一點就開車出發到鄰州／鄰市 Aschaffenburg 。 開車唔洗十分鐘我地就已經離開 Hessen 邊境進入巴戈利亞洲～

Aschaffenburg 同法蘭克福一樣位於 Main 河旁，我地搵到河邊有個免費停車場，行去球場或者市中心都係十分鐘內可到達！ 泊低架車後，唔識路兜左個大圈先到球場，繞過作客區就去到另一邊既門口可以買飛入去企位區。

巴戈利亞地區聯賽現時由一隊來自慕尼黑既土耳其球隊（sor 唔識點形容，講名都唔會有人識）遙遙領先，佢地升左班都唔知有無球場比佢踢。 今日既主隊賽前排第四，而客隊 Burghausen 就係下游要搶分護級。

佢地帶左大約 70 個作客球迷一齊搭起碼 4 個鐘車程黎作客。 幾乎所有人都企埋一齊全場為球隊唱歌打氣。 佢地唱既歌有唔少都係平時好少聽到既節奏。 開波無耐佢地竟然想放煙，但啲警察企係佢地旁邊極速收左佢地皮 sosad

就咁睇聯賽榜上既積分差距，諗住主場會可以輕鬆贏波。主隊好快就入波，龍門比人笠死，以為今場終於可以睇多啲入球啦。不過睇耐啲就唔知兩隊有咩分別，好似廢鬥廢咁。 最主要係球員個人水平廢，帶波甩腳，傳波唔準之類。完半場前客隊搏到十二碼，但完全無人知個十二碼係點黎，我地睇到既係客隊自剷自己友….

下半場客隊球迷就加入反德國足總戰團，舉起大字報抗議。上個比賽週最大爭議就係拜仁球迷寫大字報「侮辱」賀芬咸班主，然後球證吹停左場波。德國足總話不能接受侮辱性詞語喎。 但係球迷日日夜夜分分秒秒都係度侮辱對家架啦，咁多年黎足總無講過啲乜，而家走黎保護個有錢佬？ 最重要係，拜仁班球迷投訴既係足總唔守承諾，明明話唔再集體式處罰，而家竟然罰多蒙特球迷唔可以跟去賀芬咸作客？ 仲有唔好以為威脅腰斬場波就會嚇到球迷啦，佢地真係要侮辱你有千萬個方法啦。 你咁樣做更加證明有錢班主既恐怖之處，人地玻璃心唔gur 就可以令我地最愛既足球比賽唔可以如常進行。到底係邊個既問題？？

Anyway，今日既客隊球迷列左一堆球壇既仆街出黎～ 然後一齊叫足總食屎！ 最後佢地有意外回報，就係佢地既球員係佢地眼前射入第二球波反超前！ 最後全取三分。

完場後我地行去市中心做下遊客，然後去食飯～ 黎緊我地都應該只可以睇低組別聯賽… 我地一早計劃左下星期去睇史浩克二隊＋荷蘭波，平時史浩克二隊可能睇幾百人去睇，而家班球迷無得去睇一隊，可能會去哂睇二隊～～ 希望到時場波仲踢得成！