中國超級聯賽 第三週 北京國安 對 上海申花 北京工人體育場 賽果： 2:1 (1:1) 入場人數： 53,056 （約 1,500 名作客球迷） 門票：免費 （原價 RMB220）
我決定用返口語打字，因為感覺貼地好多，肚裡無墨水就係無墨水，用書面語扮斯文硬係覺得差咁啲！
北京。我已經講過幾次下次無咩特別真係唔會再黎北京。點知每次都硬係有特別事要去北京！細個第一次去北京係跟父母去工幹順便旅行，大個左去北京係去上暑假班學德文（！！比起係香港學更平更有效率，順便學埋講普通話），過多幾年又去左北京實習兩個月，然後又借轉機二十個鐘入境探朋友。今次就係因為男朋友未去過大陸又想睇波，我又未睇過中超（只係係工體睇過荷蘭作客），中國航空既機票又平，咁我地就走左去北京啦。（係北京睇波之外做左啲咩會另外再寫，有興趣可以留意 Outside the Stadium）
雖然去過幾次北京，但對北京啲路無乜印象，好似周圍都一樣咁。我淨係記得由三里屯（類似蘭桂坊既酒吧街）可以行到去工體囉。好在我地有人可以車我地到球場，因為一啲私事最後賽前半個鐘先到達球場外圍。係北京你睇地圖以為一個街口好近，但其實要行十分鐘先去到下一個街口！！！！！我地係工體南路（好似係）落車，要行去東路先有門口入，過左一大堆安檢之後又要走去西閘入口，最後入到場坐低時已經得返十分鐘。
係場外見到好多著左代表國安既綠衫球迷，仲有好多小檔賣國安既紀念品，Philipp 買左條球迷頸巾做紀念，只需 30蚊人仔！係歐洲買條頸巾起碼 15€！買完頸巾我地就拿拿聲入場。安檢前會有人係閘口搣飛，然後就排隊安檢，要放隨身物品入 x 光機，然後行過佢部假既金屬探測機（完全唔明呢部機係大陸到底有咩用），然後被 hea 搜身。入場後經過南看台，當時南看台既大門已經全部關上，門外仲有一隊唔知軍隊定警察整齊排列好咁，入到場先知原來南看台係作客球迷區，申花球迷一早已經入左場，所以關閉南門以免有人入去搞事。
我地張飛係 17 區看台上層第一行。拎左飛之後我地睇過座位表就知呢個係靚位黎，前面唔會有人阻住我地睇波！好開心咁入到17 區，出到去見到有人坐左我地個位。有人坐左自己個位係球場內其實好普遍，我地都成日見到靚啲既位無人坐就走去坐，有人黎既話就會比返個位人。點知大陸果然係大陸～我地行去個位比佢睇張飛，話比果幾條友知呢幾個位係我地既，點知佢地只係用眼尾望下我地，然後就話「這里是先到先得」就擰埋一面唔理我地，我地諗住搵場地保安叫佢叫班人讓位，點知個保安話「這里是這样的」就走左去。最後我地搵第二個位坐就算，當自己唔識規矩。（完場離開時發時看台門口有張由「首都精神文明建设委员会办公室」發出既大字報寫住「请对号入座」！如果比我賽前見到呢張紙我識搣落黎隊比佢睇同佢地講：你偉大既祖國一定為你感到驕傲呀文明人！！）
搵到位坐之後就開始影下兩隊波既球迷，對面既東看台球迷賽前打開左寫住「续写工体八连胜」既海報，原來申花對上七次作客北京都未贏過！好快雙方球員就開始入場，第一次睇聯賽賽前要聽國歌，佢地啲文明人一定真係非常非常愛國！主場球迷仲會拎部電話出黎開補光燈「照亮工體」，有少少睇頭。除左作客區，成個球場都被國安既球迷染綠。東看台台前有一張寫住「北京球迷協會綠色狂飆文明球迷拉拉隊」，見到文明呢兩隻字就知係官方球迷會啦。賽後係百度搵到關於一啲拉拉隊既資料：
在1995年成立的北京國安足球俱樂部球迷部，當時主要負責俱樂部球迷活動的組織及現場觀賽助威。2001年，一些思想超前的球迷效仿歐洲球迷配備了定音鼓等助威裝備，並統一服裝，統一動作，統一口號，以全場站立的方式為北京國安隊助威。2002年，在北京國安足球俱樂部的支持和幫助下，綠色狂飆啦啦隊正式成立，並組織招募了上千球迷為國安隊助威。2004年，北京球迷協會正式成立，綠色狂飆啦啦隊從此成為獨立的球迷組織，並於同年組織啦啦隊球迷觀看在北京舉行的亞洲盃的比賽，將北京的聲音傳到了世界。2007年，綠色狂飆啦啦隊進行了大規模的重組，已經有一支激情、時尚、專業的啦啦隊並在賽場上發揮積極的助威作用。
百度百科入面仲有列明一堆入會標準，其中一條係「請者需文明觀賽，不喝倒彩，不提前退場，拒絕京罵等不文明現象。」京罵好似係爆粗咁解，但明明當日全場齊呼申花傻逼～不過呢啲係人地既文化，我當見識下世界就算。
除左呢個文明啦啦隊之外，係北看台有另一隊同國安別名同名既「御林軍」球迷組織。佢地全部人著上黑衫，好容易就可以係綠色既人群入面分到御林軍出黎。網上既資料指佢地係 2005 年脫離綠色狂飆，兩年後係北看台自立門戶，以 Ultras 方向發展。
我地既西看台上層偏北都有一個小型球迷組織「閃亮工體」，網上資料唔多，不過佢地微博介紹自己話係「工体第一个实际行动抵制黄牛球迷团体」。
你以為有三個球迷組織係三個看台座陣，造出黎既氣氛會震撼啲？咁你就錯啦。以一個 Groundhopper 黎講，17 區係個靚區黎，三個球迷組織都可以清楚見到。好可惜，三個組織都分別唱唔同既歌，各有各打氣，所以我地個位根本聽唔清任何一區既打氣聲。加上場內好多球迷都有氣笛，好似 10 年南非世界盃果啲 Vuvuzela 發出既噪音咁。
比賽期間都有幾次只有一個組織出聲打氣，但唔知係球場太大（有田徑賽道），定係班球迷把聲根本唔夠響，無論係御林軍好，定文明啦啦隊又好，我地只係聽到啲斷下斷下既節奏，乜都聽唔清 :\ 諗起早兩星期睇日職時場內得萬幾人，仲要無上蓋，但把聲係大幾倍！只可以話，對有五萬三千人入場既賽事黎講，我地係有啲失望。
上海申花球迷區係南看台正中，有多個區域將班作客球迷同主場球迷分隔開。我係 YouTube 睇過短片講呢兩隊球迷之間既恩怨，本來都有啲期待申花球迷既表現。點知佢地只係係看台上掛左幾塊橫額，無大旗無鼓（應該係被禁止帶入場？）。所有申花球迷都係著藍色衫，但打氣既人看似唔係好多。要睇有幾多人打氣睇有幾多人會舉高雙手就知；全場可能有兩三次佢地真係一齊打氣，但大部分時間都係得十幾二十人。
球場上，兩隊都有幾位外援，比較出名既有踢過德甲既 Renato Augusto 同踢過英超既 Carlos Tevez，不過我地入場唔係想睇球員，所以無特別留意呢啲身價幾千萬既球星踢成點。整體黎講，申花完全唔夠打。上半場比國安禁住黎攻，國安先射入一球後，申花靠國安既一個失誤回傳先成功追和。
半場休息時，看台周圍都好多人鬧交仲幾乎出埋手。好多人都會話：「啊，打架啦！！！快看！！」，「那边也有，快看！」我地身邊既球迷全部都勁好中氣，係咁叫傻逼同黃牌定唔知乜，唔明點解啲球迷組織出黎到無聲既！！！！下半場節奏快左好多，呢面攻完到果面攻，球員都多左碰撞，多左人咆哮同大叫申花傻逼。完場前幾分鐘，其中一個外援為國安射入第二球，最後國安果然可以续写工体八连胜！
完場後我地都留左一陣先有，不過賽後無咩特別事發生，只係佢地一完場就係咁播「赛事已经完结，请收拾自己带来的垃圾离开，做个文明球迷」之類既廢話，得，即刻文明地離開！
最後仲想提下工體既背景，如果你怕去死過人既地方，咁就唔洗去北京睇國安啦。係文革期間，工體舉行過多次批鬥大會，槍斃過唔少反革命份子。當然，除左搞批鬥大會之外，工人體育館（室內）同工人體育場都搞過好多體育同娛樂項目啦，當中包括全國運動會、亞運會同奧運，仲有大大少少既演唱會，係北京既地標黎！之前工體門外有田有平房，不過中國開放後就開始發展附近地區，而家工體附近都係餐廳酒吧，仲有club，北京人去睇波已經唔再係平價消閒既節目了～