25.01.2026
德國足球乙組聯賽 第 19 週
SV Elversberg - VfL Bochum
Waldstadion an der Kaiserlinde
賽果：1:1 (0:1)
入場人數： 9307 （1500 名作客球迷）
門票： 季票

波琴早幾年已經黎過作客，當時係十月頭既足總盃第二圈，嗰場波喺濃霧中進行，連點輸波都唔知，淨係聽到佢地慶祝既聲音喺霧中傳過黎，我地無「親眼見過」對方黎作客；季初我地作客又無入場，今日先終於睇得清對方個樣。

今日我地由法國出發，喺酒店食飽之後，穿過 Grand Est 大道上既濃霧回國。 入到球場仲有 45 個分鐘就開波，天氣一凍成個人既心情就完全唔同咗，歇冬後黎到第二場都完全唔期待場波，淨係想佢快啲完等我可以返入室內暖身。 感覺上其他人都係一樣，手腳被冰封咗咁唔願郁，大致氣氛只係一般般。

上星期被絕殺後希望可以今日借聯賽榜下游既球隊黎出氣，開波後既表演的確係有板有眼，有唔少突擊機會埋門，只係差少少少運，中咗兩次門楣唔入！！！！ 然後就有劇本出現：對方第一次埋門就成功喺混亂之中篤咗個波入網，雖然係右邊傳中，但又係喺龍門靠左既位置射入。 我前面客隊啲工作人員好開心咁慶祝，心入面好想炳佢地兩拳再倒啤酒落佢地部電腦度。 哼！

作客球迷今日有好朋友黎助陣，波琴同拜仁係好朋友，喺看台前有塊紅旗之餘，看台內亦有唔少紅白頸巾黎表示一家親。 比賽期間仲有大字報祝福拜仁其中一個球迷組織週年紀念。

今日大部份球員既表現都唔錯，係諗返轉頭時就醒唔起見過新加盟既前鋒 Mokwa 有無掂過波。 總之我印象中佢好似隱咗形？ 下半場返入去 Block C 先被告知佢地準備咗張大字報去祝好朋友 EC Bad Nauheim 冰球隊成立 80 週年。 佢地要相咁我就返去主看台幫佢地影相，然後太懶唔想再行就留喺主看台算。 好在無走，如果唔係就睇唔到 Petkov 靚射追和。

打後時間都係拉鋸到完場，全場控球比數係 7:3 ；射門又係 22:7 ，當中我地只有六次中目標！！ 下場我地去上山作客，呢場波會喺免費電視上直播，希望我地可以一戰成名 xD