05.05.2024
德國足球乙組聯賽 第 32 週
SV Elversberg - Hertha BSC
Waldstadion an der Kaiserlinde
賽果： 4:2 (1:1)
入場人數：9502 （1600 名作客球迷）
門票：季票
更多相片
呢個星期發生左好多事，最重要既係我地祈求左成季既願望終於成真… 我地成功護級成功來季繼續出戰德乙！！！其他球隊係星期六失分就造成我地係電視前面確定護級成功！！變相黎緊三場波既賽果都唔再重要…. 呀唔係，都仲要爭下分爭下排名，等我地下季可能可以係星期六晚免費直播時間亮相！！
SVE 賽前排第十仲有三場比賽，同榜尾相差 15 分，同尾二相差 9 分，同升降附加賽席位相差 8 分。直接降班就無可能，因為計埋得失球差呢度都當有一分。 最驚只係會甩碌要買附加賽～ 係餘下三場入面，排名低過我地既 Wiesbaden 同 Braunschweig 仲未碰面，即係呢兩隊其中一隊點都唔會拎到九分可以爬我地頭！！ 當球隊宣布我地護級成功之後，好多人一開始都唔明點解得八分相差都叫護級成功，但原來仲要睇埋其他球隊既賽程黎計既～～
然後我地諗住話： yeah 下季可以再去作客史浩克～～ 但即刻比人打斷話：我地護級成功但史浩克仲要搶分，今季仲未完架！ 哈哈～～ 佢地本來都可以係星期六定生死，但係佢地要去作客既對手 Osnabrück 無啦啦係星期一話巡例檢查球場既時候發現球場上蓋有結構性既危檢，經多方面專家相討之後被指因為有隨時倒塌既危檢所以唔可以再係呢個球場上進行比賽。 史浩克嗰邊個個都嬲到爆，仲話唔會接受改期同改場地既建議。 大佬，雖然佢地唔係踢得好，但本來個個有團火要搶分護級而家咁樣無啦啦蝕左道氣！ 然後 Osna 附近既 Paderborn 佢地睇唔上，嫌個球場太細，然後 Bielefeld 因為降班後拆哂 VAR 裝備又唔符合資格，最後竟然要係去到聖保利度踢，仲要係閉門出賽。
啲球迷即刻鬧爆 Osna 搞到咁，然後佢地又發稿話我地有提議過可以容許球迷入面既球場架，係史浩克反對建議咋，要賴就賴史浩克啦～ 幾個鐘後又到史浩克經官網反駁 Osna 明明係佢地一早知球場有問題但等到最後一刻先通知德足聯，搞到無時間去搵後備方案，你覺得週中要去漢堡作客之餘仲要無閉門係佢地想要既結果咩？？ 最慘係啲球迷，我肯定佢地本來準備左好多野黎係原本既比賽日 5 月 4 號，即係史浩克既 120 週年正日係球場慶祝….
同一個星期六比賽日係丙組既冠軍誕生： SSV Ulm，佢地同我地一樣由西南地區聯賽升上丙組然後直升上乙組！佢地廿幾年前曾經出戰過德乙，後來因為財困破產一度踢落第五級聯賽，踢左十幾年地區聯賽之後上季終於重回丙組，下季同我地一齊出戰乙組～～ 但直升既問題係：球場。 佢地個球場係典型既運動場，即係得一邊主看台有上蓋，唔附合德乙球場規例。 另外佢地今季已經因為草皮無暖氣搞到冬天賽事要移師到 Aalen 出戰，而家就要睇佢地既管理層點樣整份可以說服德足聯比佢地例外有幾年執好個球場～ 同時仲有德甲其中一個始創成員 MSV Duisburg 確定由丙組建班落西部地區聯賽，係自德甲成立以來首次跌落非職業聯賽…
講返 SVE ～ 賽前因為確定護級即刻心情無咁緊張，一身輕咁迎接比賽日。 星期日既開波時間係一點半，可以有多少少時間食早餐先再出發。 我地大約十一點半就同其他人係場外既小食亭會合，當時有幾個來自柏林既球迷特登黎打個招呼交流下，佢地話今朝先出發，只係花左四個鐘左右就由柏林黎到… 四個鐘？？單程七百公里喎，佢地全程揸 200 ？？ 呢樣真係得德國境內先可以做到。。。。
好多柏林球迷都係一早入場，球迷組織等人都好早入場安置 choreo!!! 哈化柏林既主色係藍色，但佢地今日既 choreo 係以市／州旗既紅白色為主，見到佢地係看台前接起紅白橫額，然後看台後有多塊寫左唔同球迷會既迷仔紅白柏林熊旗仔，看台內仲有幾塊一樣樣既大旗咁。 等到球員準備入場，佢地就開始展示佢地既 choreo，原來看台每人都有塊柏林州旗造人柏林熊旗開，看台前大字寫住 Hurra! Hurra! Berliner die sind da! （柏林人黎啦～）
啲柏林熊個個都係向我地左面望，但比我搵到看台入面有最少三條友發夢將塊旗反轉左，變左隻熊向右望！！！好想搵人踢佢地走 T_T anyway，呢千幾隻熊只係開始，重點係球員入場後佢地係看台內點起過百枝紅色煙火， wow! 多謝首都人比鄉下仔們大開眼戒一下～～
開波後我地有幾次埋門機會，去到 18 分鐘終於由隊長接應角球頂入！！！十分鐘後就到對手靠角球混亂借我地德乙第一個烏龍球追和。 過多幾分鐘我見到 Block C 有人好緊張咁衝落看台底然後搵保安同急救入看台，呢個時候 Block C 既打氣就停左落黎。 班柏林人就個個搭哂膊頭左右搖咁集緊氣準備大聲唱歌，但佢地好快留意到主場看台入面有緊急情況，佢地都即刻靜左落黎。 呢樣係球迷界入面其中一樣基本既尊重～ 不過總會有啲係主看台唔係睇開波，平時又唔會出聲，去到呢啲靜左落黎既時候先無啦啦9叫下想帶氣氛。 大約五分鐘後受傷既球迷被抬離場，Block C 球迷先向作客看台拍手致敬，作客球迷同樣拍手回應。
上半場主場既打氣聲只係麻麻地，好似個個心情太輕鬆無哂力咁。 下半場一開始仲想試下唱新歌，帶左大約十分鐘個成果只係麻麻地就放棄左。好在有隊長入多一球為我地再次領先帶熱下個氣氛，Schnellbacher tor 終於再次出現！！！！然後柏林又再入多球追和大家都無再理。。。然後又唔知做咩又有人係看台入面受傷要叫急救入黎，成個球場又靜左落黎。 反而之後大家突然開始落力打氣，成功令到第三個入球出現！！！ 由 Paul Wanner 射入～～～ 黎到季尾，大家又開始討論啲借將既去向， Wanner 係度表現得咁好大家當然想佢留多一季，反正佢得 18 歲將來仲有大把發展機會。 但有人話拜仁話左想借佢去德甲球隊吸收多啲經驗。。。德乙有啲屈就佢 T_T
去到比賽尾段球王 Koffi 被換入黎。佢今年已經 37 歲，季尾完約可能就退休。 上季佢間唔中有神來之筆為我地射入多個入球，今季我地都好希望可以有啲時間可以比佢落場甚至入波。 我地由季初已經開始話，最正常就係我地對史浩克或者漢堡呢啲大隊，一係就一早比人大炒無得追，換佢落黎亮下相，或者和波要靠佢既奇腿絕殺對方。 今日係主場迎戰柏林，呢一幕終於上演啦！！！！！！ 佢今季第九次後備上陣，終於係門前執到射入佢職業生涯第一個德乙入球！！！！！成個球場唔係為左第四球波而慶祝，而係為 KEVIN KOFFI FUSSBALLGOTT 慶祝～～～～
可以係主場用三分再加球王入波黎慶祝護級成功，呢個結局實在太完美～ 完場後班球員好快就黎到看台前同我地一齊唱 Allez allez allez， 然後我地今日又有壽星公，但佢地來自法國既借將我地要唱法文。 莎蘭人係學校要學法文，生日快樂歌呢啲基本野唔會難到佢地～ 最後大家將高路托尼之歌改為 Kevin Koffi，球員門推佢上前接受我地為佢唱歌，佢自己都係度跳舞好好感受球王時刻！
諗起十二月初冰天雪地去到柏林作客仲要大敗五比一，佢地既領隊係賽前話如果入到五球就請大家食佢匈牙利家鄉名菜 Gulasch （類係炆牛肉咁既野食）。你留返比自己食啦～～～～下星期係今季最後一場作客，我地將會到紐倫堡，會有最少五百人一齊出戰，對方亦都會準備一個超大型 choreo，好期待！！！