03.03.2024
德國足球乙組聯賽 第 24 週
SV Elversberg - SV Wehen Wiesbaden
Waldstadion an der Kaiserlinde
賽果：0:3 (0:1)
入場人數：8071 （約 500 名作客球迷）
門票：季票
更多相片

進入三月既賽期既對手全部都唔算太吸引，首先就係今日主場迎戰另一隊升班馬。 開波前我地仍然係表現最佳既新手，對住榜尾有驚無險咁贏波，就算上場作客漢堡輸左我地今日都仲有啲信心既，但無諗過最後會輸得咁慘！

歇冬之後我地陣中既重心球員傷既傷、病既病，今日我地一個後防因為已經有五張黃牌所以要被罰停賽，另一個又因為感冒病左踢唔到。最後個後備席出現左個無人識既青年軍都坐唔滿人。 今日對住近期表現都係一般既對手我地應該頂得住卦？

賽前我地收到風對手申請左帶 choreo 入場，開波前我就去左搵靚位黎影相。 過去兩場我都去左坐傳媒席，今日決定走去而家吉左既舊作客看台前搵一個新既角度黎睇波。無左班作客球迷我就可以安心係 Block C 對面龍門後自由走動唔洗驚會比人鬧，而家仲可以一眼望哂三邊看台。 但唔知點解成個球場睇落細左好多咁～～

等到球員出場時，作客球迷就拉起 1926 四隻大字，係佢地始創球隊既成立年份。 佢地仲有係看台上拉起紅白布再放紅煙。 有紅睇係開心，但今日有咩特別要特登黎到整個 choreo?? 由於我企得近佢地，聽佢地幾百人既打氣聲都仲算清楚，去到大約 20 分鐘佢地突然收哂旗靜左落黎。 聽講佢地既球迷攝影師同我一樣係龍門後影完相諗住返去作客看台時比警察攔截話佢影左作客看台放煙既相，要沒收佢相機既記憶卡睇下認唔認到人。 （今日見到佢地放到相上網就應該最後無交卡）

我企係龍門後望住 SVE 向住我黎攻，有幾次見到如果中場睇得穿交直線就比 Schnelly 有機會埋門，但好多次佢地都㨂左橫傳勁激氣！！ 去到完半場前係我面前有角球 （今場唔知點解啲角球全部開得勁差），又送左個波比人反擊，由佢地既後場到入波都唔知有無五秒。 去到開波前個預感都仲幾正面，見到呢球波之後就覺得今日唔會係我地贏波。

下半場我走返入 Block C，淨係見到對手入左個世界波遠柱死角破網。 之後仲入左球詐糊，最後都係比佢地射到到第三球，係三月三號入三球拎三分。 嗚，點解要對住 Wiesbaden 輸得咁慘？ 下半場我地好似係零射門，仲要再傷多一個後防要搵攻中去踢後衛頂檔。 年尾對柏林失五粒都無咁唔憤氣，今次真係完全輸自己。

完場後班球員都苦口苦面咁黎到看台前，我地用大聲公同佢地講輸波已經事成，最緊要知自己衰咩下場再繼續啦，大家會同你一齊走落去既！ 然後一齊舉起雙手拍掌打氣。

順便想講下德甲今個比賽週有另一隊波都係慘敗食五蛋，輸得比我地更慘。賽後有一位球迷代表走左落場好激動咁訓話啲球員，呢個畫面比鏡頭影哂然後有唔同外國媒體拎黎報導。 係德國呢啲場景好普遍，不過通常都係大家係班球員走到看台前聽看台上既球迷講野，今次係場上面比人鬧比較少見。 最得意係好多外國人留言問個球迷以為自己係邊個，你估班球員真係會聽佢講咩～ 我想講有時就係要比班球迷當面鬧啲球員先會醒覺，上季史浩克差啲創聯賽表現最差既新歷史，最後一班球迷係球場鬧完之後一齊去睇集訓，目的就係想同佢地講贏定輸都唔重要，隊波踢德甲乙丙都唔重要，最重要係佢地肯出力去比賽，之後就終於開始和到波同甚至贏波。 達斯泰達既球迷同樣當然會鬧9班球員發夢踢屎波，但最重要係要班球員記得佢地要為背後既球迷負責。 唔夠班輸波唔緊要，但你要肯跑肯追波肯試先得架！