16.12.2023
德國足球丙組聯賽 第 19 週
SC Verl - SSV Ulm
Stadion an der Poststraße
賽果：0:3 (0:2)
入場人數：1893 （約 100 名作客球迷）
門票：26€ （坐位）
更多相片

呢場波既主隊係我地上年係德丙其中一個對手，當時佢地正擴建球場而要借用 Paderborn 球場黎作賽。 Verl 附近又無吸引既地方可以去一日遊仍然順便去睇場波咁，一直都覺得去唔到佢地既迷你球場好可惜。

點知黎到年尾，另一半既公司會係 Verl 附近既大城市 Bielefeld 搞 workshop 同埋聖誕 party，我地就萌起去附近睇場波既計劃。 好好彩 SVE 作客 Karlsruhe 場波被安排係星期日上演，我地可以搵場星期六既比賽去睇～～而唯一係附近既就係 Verl 對升班馬 Ulm。Verl 係上季德丙來自西部既對手，而 Ulm 就係我地曾經係西南聯賽碰過面既對手。 我地升班上丙組嗰年就係同佢地爭崩頭去到季尾嗰幾場佢地臨尾香先令到我地早佢地一年成功封王直接升班！

星期六一早我獨自出門口去到法蘭克福火車站搭個半鐘高鐵去到 Düsseldorf 轉地區火車，再搭多兩個半鐘車就去到 Bielefeld 同另一半會合，然後再由 Bielefeld 揸大約 20 分鐘車程就到 Verl 既市中心泊低架車再行一陣就去到球場。

個球場勁細成個盒咁，四邊看台每邊都係得十行左右。 Verl 主席講過佢地有得踢德丙已經好心滿意足，會為左附合德丙既要求去擴建球場夠用就得，如果將來有得再升班就唔會考慮再去花錢擴建。可能你會覺得佢地無咩大志，但我覺得佢地夠現實同知道自己既能力係邊。你估個個都好似賀芬咸咁咩以為自己係第二條村起個大球場就係大球隊。 場內好多都係阿叔阿伯，唔知大城市既球隊咁有好多小朋友同年輕人；佢地既球迷組織都係得幾個後生仔咁。最神奇既係我地見到有一個小朋友竟然戴住 SVE 既冷帽！！！？？？？ 呢個一世都解唔開既謎，到底小朋友係同我地一樣山長水遠黎睇場波？定係係來自 Verl 既 SVE 球迷？ 定係根本唔識 SVE 只係求奇執頂帽黎戴？？

一入到球場我就即刻衝去買野食，因為我由朝早上第一班火車前食左個豬柳蛋漢堡之後就無再食過野。 係咖哩腸配薯條同炸雞扒包二選一，我㨂左雞扒包，係我係球場內食過最好食既雞扒包！！！ 係其他地方食過通常都係唔新鮮，塊扒已經出完汗濕哂又或煮放左黎耐乾哂同凍哂，但呢塊係新鮮又脆又暖又夠味！！ 如果唔係諗住夜晚都係食快餐既話我會食埋咖哩腸…..

食飽同飲完杯熱紅酒暖新之後就去入座，主場球迷係我地既左邊，作客球迷就係右邊。 Ulm 雖然過去破過兩次產又一直係低組另聯賽沉輪，但佢地仍然被認為係一隊有歷史既傳統球隊。掙扎左差唔多廿年終於上返職業聯賽，好多球迷都有跟住隊波去出戰德國各地。 只係估唔到今日只有大約 100 人到場，當中仲有唔少來自佢地盟友 RWO 黎幫手助陣，有少少失望…. 可能對手同地方太唔及引？

開波後兩邊一齊靜默 12 分鐘一直向德足聯抗議，然後就各自各開始打氣。 客隊開波無耐就已經搵到機會射入第一球，然後又再搏到十二碼拉開比數。 望住左邊龍門後既主場球迷就覺得感受到 SVE 未升班前既打氣氣氛大約係點：弱。 淨係計人數唔會少，但一齊打氣既就只有核心成員，其餘只係入場睇波。佢地又會嘗試叫其他看台既人一齊企起身拍手，但我地身邊啲阿伯全部都無咁好氣坐足全場。

Ulm 球迷就因為一早領先所以氣氛超好，去到下半場仲有好多人興奮到赤裸上半身（當日氣溫大約 4 度同埋勁大風） 好啦，算係彌補左咁少人既失望，有啲肉體可以睇下～～～ 下半場中段主隊有球場兩黃一紅被罰離場，客隊搵到空位再射多一粒大炒人地三球完場！

完場後因為勁凍所以我地勁快就走人，係強風之中跑返去架車度取暖…. 揸大約三個半鐘頭車返屋企沖涼訓個覺，第二日去迎接今季最後一場波～