03.11.2023
德國足球乙組聯賽 第 12 週
SV Elversberg - FC St. Pauli
Waldstadion an der Kaiserlinde
賽果：0:2 (0:2)
入場人數：10150 （2100 名作客球迷）
門票：季票
更多相片

不敗左七場波之後，今個星期返到主場迎戰榜首既聖保利，幾隻字可以形容哂：技不如人，抵輸！

今個比賽週末我地再次被安排係星期五夜晚出賽，對手週中既足總盃第二圈係主場踢左史浩克出局，三日後就要遠征到莎蘭作客。其實星期五踢主場波真係唔錯，收工就可以去睇波然後仲有成個週末可以去玩或者休息，對於要山長水遠作客既就未必咁開心。好多黎自漢堡既球迷一朝早就要出發…

我地就提早三點收工出發，星期五既繁忙時間比平日早啲開始，路上遇上幾次小塞車，最後五點左右可以泊低架車，拿拿聲去個廁所就行去球場。 今日我地先係場外買埋野食可以一路排隊一路食，唔洗入到球場再排多次隊。

入場後得返一個鐘就開波，同大家打個招呼傾幾句計就已經無左半個鐘。今日 Kaiserlinde 再一次掛紅旗，所以 Block C 迫到爆，我要預返啲時間行去主看台再行落去球場。去到主看台我一停低影張相就即刻有人黎叫我影完相就好走 >_> 煩到嘔！ 落左草皮之後就等球員入場。

今次係兩隊波第一次係聯賽上對戰，但早兩年係武肺肆虐期間，我地係足總盃首圈首次相遇。 只係當時因為疫情措施而未有作客球迷隨行，我地亦只係企係場外既斜坡上睇波。當時仲係地區聯賽既我地以 4:2 擊倒德乙既聖保利！

望住個作客看台….. 只想講佢地整到個看台好醜！！！ 首先就係佢地係看台頂掛起左 Südkurve St Pauli 既大橫額，但佢地掛左成個鐘都掛唔起，最後只係打斜咁半天吊。 另外就係係圍欄上既旗全部都好似亂掛咁，好隨心所欲。 開波前我企係近中線既位置，想聽下班作客球迷既打氣聲。估唔到佢地咁快已經拎左近期 AC 米蘭好興既打氣歌 Sarà perché ti amo 黎用，但佢地既歌聲唔算大，我只係靠間唔中聽到一兩句而估到佢地唱呢首歌。 後來我企返去 Block C 前面就更加聽唔清聖保利球迷既打氣聲，明明見到佢地個個係企位看台上都有動作，看台內既旗海睇落亦都好正，但聲勢同視覺完全唔 match？？

好多人因為聖保利所謂既獨特文化而支持佢地，但係球迷圈黎講佢地係煩膠一名。左翼大愛 ok， btw 佢地既左翼聯盟朋友拜仁、標準列治同特拉維夫今日都有黎到撐場，但佢乜都要投訴，認為自己企係道德高地要走去批評人。今日佢地要投訴既係我地既傷殘人仕門票價錢，原來我地賣緊 20€ （另加手續費），其他球隊大部份都係賣緊 10€ 連陪同人仕同車位。 當我地去作客要比 15€ 都已經鬧緊好貴既時候，佢地黎到要比平時雙倍既價錢，呢樣又真係抵鬧，唔知 SVE 會唔會檢討下呢？？

佢地 Südkurve St Pauli 掛左一陣就收左皮，因為佢地完全擋住企係看台頂既球迷既視線…. 等佢地班球迷可以見證到佢地既第二個入球！ 老實講，今日場波睇得出對方既技術同策略真係高一班，我地就算踢得出水準都完全無哂符！

下半場我入返去 Block C 企係人群取暖，同埋落後緊想加入一齊幫手打下氣～～ 八月我地係主場大敗 Düsseldorf 慘吞五蛋，聽人講當日既氣氛十分之差，失左兩球之後大家已經無心打氣，成個主場寂靜一片。 今日大家就算輸緊波都異常地亢奮唱足九十分鐘，下半場既氣勢更勝上半場！ 我估今日同上次大敗既分別係：上次係升班之後仲未贏過一場波，咁樣比人大炒令大家開始懷疑自己係咪唔夠班。 黎到十一月已經了解到自己隊波既水平大約係邊，再一次迎戰榜首既球隊知道自己無可能一直贏波，輸波完全正常，最重要係見到班球員肯追波肯繼續出力，。 最後場波係一個好歡樂既氣氛下完左，尾段我地係度唱 Allez Allez Allez，球證吹雞後 Block C 仍然繼續唱，唱到班球隊行到黎看台前。

佢地個樣一啲都唔開心，被迫要企係度拍手唔知點解我地唱到好似贏左波。 唱多兩 Round 大家就一齊高舉雙手拍掌叫口號，叫完又一齊拍手鼓勵班球員。 呢個時候班球員好似開心左啲，意會到大家係真心開心，睇得出佢地由本來係度9拍手變成一個回應多謝球迷支持既拍手。 最後大家「慶祝」左幾分鐘先肯放班球員走！賽後係網上面既留言全部都勁正面，大家都話過去兩年

下場我地作客史浩克，又係歷史既新一頁！！！！！！ （去到今日已經確定會有十一架球迷巴士出發，其中兩個作客看台已經售罄！！）