02.09.2023
西班牙足球乙組聯賽 第 4 週
Elche CF - Real Racing Club Santander
Estadio Manuel Martínez Valero
賽果：1:1 (1:0)
入場人數：13.051 (150 名作客球迷)
門票：35€
更多相片

係西班牙既第一個週末去完華倫西亞之後，接落黎既幾日我地日日唔係係屋邊既泳池就係去唔同既沙灘。因為岩岩落完雨又打風，頭幾日啲沙灘好大浪好好玩～ 我地去左既城市仔包括 Moraira, Xabia, Denia, Calpe… 呢幾個地方都係德國家庭中意去既，所以環境都幾舒服，唔會有好多 party 友周街大叫咁。

去到第二個週末，我地㨂左南下去 Elche 睇西乙，順便去見下被納入聯合國文化遺產既棕櫚樹花園。 滿心期待咁食完午餐就出發，係棕櫚樹花園外泊低架車就入去散步。 個花園係有好多唔同品種既棕櫚樹，但行左大約十分鐘後就已經覺得悶，慢慢向舊城出發。

有一樣野我地唔記得既係西班牙南部係有午休時間 （Siesta），因為當地下午太熱，好多舖頭都係二至五點關門休息，啲人就會返屋企訓覺休息，條街就得返啲 on9 遊客係度 9 行。Elche 唔係熱門旅遊地方，我地大約四點去到條街真係無咩人，得啲雪糕店同 cafe 開門咁，同我地原先期望既有太大落差，就算食完雪糕心情都係麻麻地。 最後過河兜左個圈之後就返返去舊城度搵間酒吧坐低嘆冷氣… 總算有啲野令我地開心返少少～

反正係市內無野做，我地提早少少去球場。唔知點解我地成日都好好彩撞正作客球迷到場，要跟住佢地隊尾去球場！ 今日兩隊波既主色都係綠白色，一開始我地以為係主場球迷，但啲普通球迷唔知點解望住佢地好訝異咁，後來睇返相先知原來佢地係作客球迷。 估唔到來自西班牙北部既 Santander 都會有過百名作客球迷到場！！！

我地係 fanshop 買完手信之後就去買波飛，天氣預報話一個鐘後會開始落雨，而西班牙既球場係絕大部份都係無上蓋既…. 我地以為今場波無咩人睇好易買到飛，去到售票處個人話有上蓋既嗰兩行都已經賣哂。 上層雖然平好多，但明知黎緊會落雨無理由為左錢而令自己變落湯雞，唯有比 35€ 㨂下層頭行，落起雨黎我地應該可以走去看台後面避雨。身在西班牙先會理解到點解佢地要有午休，點解要咁晏先食飯同點解咁夜先開波！ 呢場波夜晚九點先開波，就係要等到入黑唔再有太陽涼返少少。

Elche 既主場係 1976 年建成，係 1982 仲做過世界盃球場！ 自建成以來，佢地從來都未進行過任何翻新工程… 唔怪之得個球場外面霉爛到咁！！我地個位位於第三行，入場時仲未落雨我地就坐係度等個看台慢慢坐滿～ 開波前大約三個字開始有啲雨點滴落黎，我地二話不說行到最後…. 然後企左係出口位置可以有風吹下。 好在我地反應夠快，轉個頭個天就開始倒水！！！ 有唔少人都即刻搵地方避雨，但更多既係照坐係原位睇波，真心 respect!

我地呢邊都仲有選擇可以㨂避定唔避雨，而係我地右上方既作客球迷佢地只可以企係雨中繼續為球隊打氣，又係另一個 Respect! 我地既左邊龍門後既南看台就企左一班核心打氣球迷，當中有人用掛耳無線咪經喇叭帶領唱歌，第一次見 capo 可以懶到咁 ._. 你話如果佢兩手揸住野都算，但佢係雙手垂低咁好輕鬆咁係度唱。 話就話去得西班牙睇波就唔係為左睇球迷打氣既氣氛… 但黎到見到有組織既打氣都只係一般般咁硬係有少少失望。

場波我都唔係好記得有咩特別事發生，淨係記得上下半場各入一球，去到尾段兩邊無啦啦都發力狂攻，可惜唔夠時間最後都只係和波完場～ 場雨係下半場停左一陣，去到最後又開始落雨… 好在我地醒目將架車有咁近泊咁近，反正我地放緊假大把時間唔洗急住開車走人～ 離場後轉個彎就上車，等啲人散得七七八八我地先出發返去～