10.04.2023
德國丙組足球聯賽 第 31 週
SV Elversberg - FC Viktoria Köln
Waldstadion an der Kaiserlinde
賽果：3:2 (2:1)
入場人數： 6121 （約 150 名作客球迷）
門票：10€
更多相片

復活節快樂～ 今個比賽週末我地被安排係星期一出賽，一開始以為紅日會係下午開波，點知佢照舊係夜晚七點先開波，完全理解唔到點解要咁做！！ 向好既方面睇，我地可以用盡復活節既長假去第二度睇波～

今日同平時唔同既係，我地由比利時 Antwerp 出發～ 一朝係酒店食完早餐就揸四個鐘車南下，穿過盧森堡入油同買咖啡再到莎蘭食件復活節蛋糕，飲幾杯野休息下。

本來我地係連續兩個星期作客，但上星期作客 Duisburg 場波因為大雨而要延期，最後有成兩個星期無波睇～ 唔明點解一個德甲水準既球場既排水系統可以咁差… 搞到變左要係月尾週中補賽 -_- 又向好既方面睇，如果唔係場波要延期既話，我地上星期兩個龍門都傷哂要用青訓龍門… 而我地後防最近又麻麻地，有多一個星期比我地既龍門養好傷都好。

係賽前傳來消息主看台既門票售罄，而 C1 看台既飛都賣得七七八八～ 所以我地都早啲入場避開人潮。 係看台上面睇住人愈黎愈多～ 仲有好多來自鄰村既球隊 SG Hassel，好多一家大細戴住 SG Hassel – SV Elversberg 既頸巾我地先知原來自上年開始， 球隊同 Hassel 合作培育球員。 唔知今日係請佢地入場定係佢地自己搞活動日黎睇波，不過都係時候搵啲機會吸引下啲新血，等啲細路知道莎蘭唔係得一隊波！

今日我地有兩個主力都因為紅黃牌缺陣，造就左其他球隊上陣既機會希望可以變下陣改良下過去幾場膠著既踢法。 點知開波唔夠兩分鐘，對方第一個機會就入波。 Viktoria 近況大勇連贏幾場波，唔通我地真係翻唔到身？

不過咁早失波好似反而令到我地班球員更加醒神同落力，十分鐘後我地靠中場搶攻同底線靚傳入波追和！ 最近成日都病病地咳唔斷尾，今日就諗住企遠少少可以安靜睇下波養返好個喉龍，但最後都係忍唔住走左落去看台底，唔想聽啲球場阿叔9up…

上半場大部份時間由我地主導，客隊有一兩次有威脅既埋門，去到完半場前我地入多一球反超前，睇黎我地真係回魂？！ 下半場開波無耐開始落雨，企係看台底既我地依然乾爽～ 對面嗰大約 100 個球迷好慘咁要淋雨！下半場我地依然有唔少攻勢，啲組織造得好好睇，只係埋門一腳差啲運。 有一段時間我地連續有幾個角球，心諗我地上幾場波就係連續有幾個角球時失波，今日輪到我地未？ 果然係第三個球角就成功輕鬆係遠柱頂入，拉開成 3:1 !! 大家叫做可以鬆一口氣，可以唱返啲比較複雜同開心既歌！

去到 90 分鐘補時四分鐘，場波去哂對面半場咩都睇唔到，淨係知班作客球迷係度慶祝先知佢地追近 3:2。 中場開波後我地保持個控球權到完場，三分已袋！ 呢三分唔係淨係為左要爭冠軍爭升班，更重要係幫班球員脫離信心危機！！完場後 C1 看台仍然企滿人一齊同班球員唱 Allez Allez Allez 慶祝。

拎埋呢三分，我地踢少一場但仍然領先附加賽位置十分。 剩返八場波，只要贏四場就可以升班，然後今季就唔洗再發夢！！ 下星期要作客同樣狀態大勇既 Osnabrück － 希望我地可以壓得住佢地贏波保持優勢。