12.10.2022
德國足球丙組聯賽 第 17 週
SV Elversberg - SC Freiburg II
Waldstadion an der Kaiserlinde
賽果：3:0 (2:0)
入場人數： 5659 （約 100 名作客球迷）
門票： 10€
更多相片

上年呢個時候我地對升班無咩特別希望，當時係地區聯賽排第四表現不過不失。 完全無諗過幾個月後我地成為冠軍升班，去到而家以九分領先德丙…. 由一開始覺得只係負碌去到而家被大家睇好會直接升班，一切都仲係好唔真實。

2022 年最後一場德丙返到莎蘭主場迎戰弗賴堡二隊。 繼 1860 連輸三場之後，呢場無啦啦又變左頭兩名既對戰。 睇返 SCF 既比賽精華見佢地既表現都好好，呢場一定唔易打。 最近 SVE 表現咁好，係主場吸引到愈黎愈多球迷入場，今場波雖然只係對 U23，但係主看台既波飛竟然賽前已經賣哂！

天氣開始凍，通常去到冬天就會少好多人入場… 凍都算，仲要大霧到同上個月對波琴場波差唔多。 好在今次係日頭夠光，大部份時間都仲見到成個草皮，只係比較難集中搵波同埋見唔到作客球迷…. 弗賴堡既球迷組織間唔中都會去支持下自己既青訓，前題當然唔可以同一隊撞日子啦。

今個週中佢地杯葛作客紅牛就留左係 Freiburg 支持二隊對 1860，開心過睇一隊輸波！ 而呢個週末一隊星期日先有比賽，所以一直都有傳佢地會黎到莎蘭同佢地來自瑞士既朋友相會。 聽球隊講佢地話會有一兩架巴士到場，預二百人。 最後我地係霧中見到的確係有一堆人企左係個看台上面，間唔中聽到佢地唱下歌咁。 但真係好似見鬼咁完全唔知佢地既真身到底係點？ 最後只可以靠其他人影既相推差應該係有一百人左右….

我地係賽前準備左幾張大字報，看台前掛起 Wintermeister ’22 – 2022 年冬季冠軍！ 等到球員入場時係看台上舉起： Auswärts ungeschlagen ’22 － 2022 年作客不敗；Bester Aufsteiger － 表現最佳既升班馬； Südwestmeister ’22 － 2022 年西南地區冠軍； Saarlandpokalsieger ’22 － 2022 年莎蘭盃冠軍。

開波後，對方好主動咁搶攻搵到唔少機會，過左 20 分鐘都仲未有入球我地又開始荒！！ 講左無幾分鐘， 係對面既雲霧入面見到一個好高大既球員射左個波入網！！！ 見到啲球員同聽主看台啲人歡呼我地先慢半季歡呼～～ 再望下計分牌果然係借將 Woltemade 入波！！ 幾分鐘後我地再向對面攻過去… 又係見到啲球員慶祝加主看台既歡呼聲我地又一齊慶祝！！ 後來睇返賽事精華呢球係靠快開界外球突圍再挑高笠死龍。

下場半佢地終於向我地呢邊攻， 有啲時間佢地係對面我地又睇唔清楚，見到有人起腳然後佢地個龍門又拍哂手咁搞到我地以為佢地入波。 反而咁樣咩都睇唔清大家更加投入去唱歌！ 下半場中段我地搏到個十二碼，球王 Koffi 搶左黎射點知比個龍門撲出左。 呢個時候球證竟然吹雞話要重射，原因係 Koffi 掂到個波前有幾個客隊球員已經走左入禁區。 今次改由防中 Jacobsen 操刀射入網！ 然後大家就一齊開始唱 Der Zug hat keine Bremse – 我地呢架火車無迫力唔識停！！！ 😀

最後十五分鐘，大家一齊唱近期最中意既打氣歌唱到完場。 三比零，呢三分確保左我地成為首循環冠軍，現時領先八分，就算下年作客 Wiesbaden 同主場對 Ingolstadt 輸波，我地都仍然會領先係榜首。 過去十四年既德丙冬季冠軍只有兩隊最後未能升班，而我地最後結局會係點呢？ 升到班當然會開心，因為咁會代表我地末來兩年都可以遊走全國出賽。如果最後飲恨留返係德丙，咁我地原先既目標亦已經達成，來季繼續係德國各地出戰！

九年前升班我地踢左全季最後以 40 分降班。 今季過左17 週我地拎左 41 分。 我地唔知下半季會點，但我地一定要把握呢個咁完美既時刻好好享受 2022 年既成果！！！ 出年繼續一齊再戰！

題外話： 今年咁早歇冬就係因為黎緊既世界盃，係過去幾個比賽週，德國大部份球迷都響應杯葛卡塔爾世界盃既行動。 主要原因係：呢個國家無人權無言論自由，咁多年既準備期間死左超過一萬五千名工人。 話要注重環保，冷氣球場都廢事講，到訪球迷竟然係要每日由位於其他國家既 fan camp 飛去卡塔爾，環保呢？？ 呢個冬天會好漫長…. 但好在我地既好朋友係一隊冰曲球隊。 今個冬天可以睇多幾場冰曲～