14.05.2022
德國西南地區聯賽 第 38 週
SV Elversberg - FC Homburg
Waldstadion an der Kaiserlinde
賽果： 2:0 (1:0)
入場人數： 4533 （約 100 名作客球迷）
門票： 8€ （企位）
更多相片

上場波作客 FSV Frankfurt 後已經劇透哂下季升班… 不過點都要踢埋最後一場令機率由 99.9% 變成 100%。 今日就算輸波，只要我地唔失多過十球，人地又入唔到十球波既話 SVE 都可以贏地區聯賽。

SVE 曾經係 2013 年歷史性升過上德丙，可惜 2014 年就做升降機落返地區聯賽。 當年仲有升班附加賽對 1860 慕尼黑二隊，SVE 先係主場以 3-2 領先，然後星期日去慕尼黑作客 （當時 60 仲係同拜仁共用緊球場！），點知果日就落暴雨… 一大班 SVE 球迷入左場先被通知場波因為暴雨要改期。 堂堂一個德甲球場竟然去唔到水？ 場波改左兩日後上演，幾乎無人可以臨時同公司請假… 最後只有少數球迷可以係慕尼黑現場親眼睇住球隊臨完場絕殺 1-1 ，以總比數 4:3 升班。大部份球迷當時只可以係酒吧電視前慶祝…

後來又曾經晉身過兩次升班附加賽，一次係對東德球隊 Zwickau 係次回合慘敗，另一次係對來自慕尼黑既 Unterhaching， 又係次回合慘敗… 黎到今日可以話係球迷們第一次經歷同球隊球員一齊升班，再加上賽前已經知道今場只係例行公事，有超過四千個球迷最後一齊入場，仲要可以係正同州死敵面前升班，心情極好！

本來都唔諗住對面會有好多人黎睇呢場波，估唔到少到得果一百人入場… 可能唔想入場睇自己隊波輸然後又要睇住我地捧盃升班？ 佢地開波後係作客看台前掛左塊大字布叫隊波係莎蘭盃盃賽決定出全力，因為下星期我地又要係莎蘭盃決賽碰面啦～

要升班上德丙唔係贏冠軍就得，仲要有錢註冊同埋有符合德丙既規定。 第一次升上德丙既球隊有兩年時間去 upgrade 球場，直至今季球場要能容納一萬人，但由於武肺搞到好多球隊有財困同埋最近多左細球會升班，足總就改例話容納五千人就得。 SVE 自第一次升班後就一直有計劃地翻新球場，首先係擴建 C1 看台增加容納人數，然後係主看台上面加 VIP 看台，而家就準備緊主看台對面既翻新。 而我地想左好耐既 C1 看台上蓋，球隊一直都話升到班先可以有瓦遮頭！ 上場波贏左之後，球隊就已經宣布踢埋今場之後就會即刻動工加建看台上蓋，預計來季開波前完工。 😀 即係突然之間今場波係最後一次我地頭頂見到太陽？！

終於黎到開波一刻，我地無咩準備特別既打氣方式，只係希望可以能夠聚到更多人一齊唱歌。 呢幾場波多左好多後生仔走埋黎想唱埋一份， 果然係有成績就有球迷～ 希望呢個小小組織都可以慢慢咁擴大。 今場第一球波去到臨完上半場先出現， 由我地既角度係完全唔知個波點入，大家都慢左半拍見到球員慶祝先知入左波！！！（後來睇返係右邊禁區外窄位抽入，個個都已經個波係龍門後面～～）

下半場我地有好多機會但比人地個龍門救哂，去到 60 分鐘我地射入埋第二球，搞掂！！去到 80 分鐘，對面啲球迷已經執野離場，去到90 分鐘球證一吹雞… 大家即刻衝到看台前湧入球場草皮！ 計埋今場波 SVE 已經係連續第十七場不敗！

我地執好野都走落去踩下草， 搵個靚位等睇頒獎禮！ 頒完獎就即刻衝去拎啤酒飲～～～ 球隊一早宣布今場會有免費啤酒，仲請左本地樂隊黎開 show 唱到八點，等大家可以一齊好好慶祝！其他德丙對手見到我地呢隊鄉下隊升班應該會反白眼，下季山長水遠要去莎蘭兩次 😀 但對我地黎講，我地超級期待下季可以出戰全國各地，要去東德，要去北部，要去魯爾地區之類！！！好想佢快啲出賽程呀！