31.10.2021
德國西南地區聯賽 第 16 週
SV Elversberg - SG Sonnenhof Großaspach
Waldstadion an der Kaiserlinde
賽果： 6:0 （2:0）
入場人數： 1433 （ 12 名作客球迷）
門票： 8€ （企位）
更多相片

早兩星期第一次跟隊波作客 Aalen 見到隊波踢得好好， 大家都好開心。 但緊接兩場波就離奇失分，今場波我地都唔敢有太大期望，覺得一定輸一球飲恨，一係就大炒。

對方剛由德丙降班落黎，本來係一隊靠錢買成績既球隊，玩左幾年終於無錢要面對現實。 五年前我曾經跟朋友一齊去 Großaspach 作客，當時跟佢地坐七個鐘巴士落去勁得閒，第一次見識德國人既 away days。 到而家都印象好深刻～ 果場波最尾好似 3:3 完場。

今日黎到球場，完全唔洗出示任何野，連卡都唔洗打，一切就好似兩年前拎張波飛就可以入場。 全德國得莎蘭先有既莎蘭模式～ 同朋友傾下計，笑下對面得一小班人黎作客就差唔多開波。

開波後完全唔知自己賽前擔心啲咩，當然一定踢左幾年德丙，但落到黎一啲德丙影子都無，完全係任我地魚肉。 開波十分鐘左右我地就先射入第一球。 第二球我到而家都唔知球波點入既。 領先兩球去到半場，下半場開波時，球迷們都仲興奮， 好耐無試過有其他人一齊走埋黎唱歌，仲要唱足成場波！

換邊後，SVE 向住我地個向台攻，係我地眼前送多四個波入網。 到我地入到第四球時，班球迷球迷已經收左旗。 到我地入到第五球仲執包袱走人… 隊波踢得差啲球迷執野表示不滿都算常見，但人都走埋真係第一次見…. 唔可以陪球隊捱到最尾既算係咩球迷？

如果今季場場波既組織都可以咁流暢，而班球員可以同今場波一樣咁有信心既話，我真係敢講今年一齊輪到我地升班。 可惜佢地表現唔夠穩定，間唔中失一兩分，失下失下要去到季尾爭關鍵一分…