26.09.2021
捷克甲組聯賽 第 9 週
SK Slavia Praha - FC Hradec Králové
Eden Aréna
賽果： 4:1 (2:0)
入場人數： 10.213 (53 名作客球迷)
門票： 210czk （坐位）
更多相片

布拉格係我永遠都唔會嫌悶既城市，一來勁平，無論由香港過去定德國過去都可以唔睇價錢 😀 一蚊＝2.5 克朗左右，即係餐牌上面既銀碼同香港差唔多，200 克朗一份主菜（已經算貴）除左 4 先係港幣價錢.. 一杯大啤酒 1 歐左右… 二來布拉格有好多開心回憶，咁多年再去都好似無咩點變咁可以逐一回味下～ 三來球場有好好食既燒香腸 Klobasa.

今次去布拉格睇波係其次，主要係想帶屋企人去睇下我最中意既城市～ 四日三夜自駕遊。本來諗住睇兩場波，可惜另一場波改左時間，最後只可以睇一場波，就係我支持既 Sparta 既死敵 Slavia Praha.

現時係歐盟境內遊走都無咩特別限制，特別係打左針既人可以話完全自由。 只係出入境時可能要預先網上填表申報逗留時間同地址，方便有咩事可以追蹤到你。老實講，絕大部份時間都無人係邊境度 check 你係咪真係填左表.. 因為歐盟境內本來就可以自由出入唔同國家。 餐廳都係「盡量」跟足現有條例去 check 你係咪真係打左針或左有證明… 但我地係捷克除左係球場就無人問過我地。

而講起球場我就嬲。 星期六朝早出去做遊客，去左好多地方打卡，5 點半左右就出發去球場，諗住去到球場仲有一個鐘時間夠哂買飛同買紀念品。 事前我地都睇哂有無咩要注意，官網話賽前只會係四號售票處賣飛， 咁我地去到球場就先去四號售票處， 當時已經有一條人龍，大約左廿個人係我地前面。 排隊時有工作人員黎問我地有波飛未，我地話未，佢就 ok 就走左去。 雖然唔知佢問黎做咩，但心諗就係無飛先要排隊買飛架啦？？

排左十分鐘左右終於到我地，同佢講要四張飛。 點知條友話：我地呢度唔賣飛架喎，淨係比網上買左飛既人黎呢度比我地驗證武肺證明… 買飛要去球場另一面既二號窗。 好波，咁官網比 fake news wor. 仲有頭先個工作人員知我地無飛又比我地繼續排隊係想點？？

好啦，即刻急急腳行去另一邊，見到有三條長龍…. 六個窗口只開左三個，條隊仲要龜速咁郁… 當時得返 40 分鐘，但前面仲有勁多人！！ 仲有啲人借啲意想插隊，心情越黎越差。 好在後面個人聽到我地講德文就用爛德文問我地係咪德國黎，然後話聽日大選喎，投左票未呀？你地係咪都有黎睇上場對柏林聯呀？ 傾左一陣緩和下心情，排左半個鐘終於到我地… 原來即場買飛既話佢要你出示埋武肺證明先會出飛，佢地仲要係證真會 scan 你個證明認真假。 最後得返十分鐘唔夠要行返去四號窗果面入場… 竟然趕得切開波前坐低！！！！ 不過就無時間買野食…

Slavia 既主場原名叫 Eden Stadium，位於布拉格既東南部。 現時所用既球場近年落成，由一間中国公司全權持有… 所以球場而家以果間公司命名， 波衫正中既贊助商亦都有四大隻殘体字。 佢地既主色係紅白色，但我地入場望到對面看台時，咦… 啲旗黑白色既？啲旗倒轉既？ …. 原來佢地搶哂作客球隊 Hradec Kralove 既球迷橫額。 係 Ultras 球迷世界入面，你成功搶到人地既大旗就當然要對外宣布勝利： 倒轉掛係自己看台前。 呢刻即代表失去橫額既球迷組織要解散。

作客看台入面有大約 50 人，唔知佢地已經係全體到布拉格作客既球迷，定係只有部份人入場，而其他人因為輸左場交所以唔入場？ 不過入左場果班都有間斷地唱歌打氣，佢地聲細微弱，係主場球迷歌與歌之間既一刻先會聽到佢地既打氣聲。

今場可以話係難得一場波好睇過球迷既賽事，節奏明快，要組織有組織，要入球有入球，仲要係靚助攻靚入波，睇到嘩嘩聲！ 唔怪之得佢地上星期可以輕取德甲既柏林聯 :-))) 半場我地衝去買野食，可惜買錯左唔辣既 Klobasa… 不過都仲係好好味！！！ 食飽就返上看台繼續睇埋下半場。

完場後我地去球迷組織商店度買頸巾。 唔同國家既球迷文化真係好唔同。 係德國就算你識人係球迷組織都未必買到球迷組織出產既物品，但呢度球迷組織有自己一間舖頭，任何人都可以入去課金幫補下。 買完就搭電車去返市中心飲返杯啤酒去完結漫長既星期六～