31.07.2021
德國丙組聯賽 第 2 週
FC Viktoria Köln - FSV Zwickau
Sportpark Höhenberg
賽果：1:1 (0:0)
入場人數： 2098 （約 150 名作客球迷）
門票：19€
更多相片

自六月開始生活開始慢慢回復正常，不過咁岩又開始暑假所以只係屋企附近搵啲低級聯賽盃賽睇下。等下等下新既聯賽賽程都慢慢更新，各地又開始放寬限聚令，球迷終於可以再次入場睇波支持愛隊。只係德甲乙仍然禁止作客球迷隨隊入場，而德丙就無限制～

過去呢一年半時間每日都好無聊，返工放工都係屋企，日日都好一成不變好漫長咁。 而家諗返又覺得好似過得好快咁，完全唔知呢段時間自己到底做左乜？？ 我地六月中打哂兩針，再加多兩個星期睇疫苗正式生效就終於做返一個自由人。 等唔切要離開德國去西班牙小島一星期做廢人，仲特登㨂一個無波睇既島仔可以每日淨係要擔心幾時有飯食同抱怨又要搽太陽油。

去完旅行返黎見到德丙開 league 有幾場都睇落好吸引，就決定近近地去科隆睇 Zwickau 作客。而家買波飛最主要係要實名制，但唔洗話要打左針或者當日驗左無肺炎先可以入場，同埋唔洗入場前填表申報個人資料。 唯一限制就係入場人數同埋要係自己座位以外既地方戴口罩。 因為條件都算正常，所以有啲球隊既球迷組織都願意再次入場打氣。

Viktoria Köln 暫時只限三千人入場，但平時佢地既入場人數都係差唔多，所以有無限制對啲球迷黎講都無咩分別。 我地㨂波睇都係主要㨂得啲平時無咩人入場既去睇，咁就唔會因為入場限制而蝕左。 我地最怕既只係作客球迷最後都係㨂唔入場。

科隆離法蘭克福大約兩個鐘車桯，我地一早仲可以買埋餸先出發。 同一條高速公路可以直達科隆，不過離開法蘭克福之後沿路有數之不盡既整路工程…. 好在我地預既時間都 ok，兩個半鐘後到達球場附近既停車場搵到最後一個免費車位。 落車後行五分鐘左右就到達球場門口～

入場時仍然要過安檢，但佢地唔會再搜身，只會叫你打開個袋佢地望同埋拉褲袋衫袋出黎比佢地睇入面有啲乜。 過埋就即刻去小食亭買野食，好多野都先進左咁。 而家有部機係用腳踏去唧啲醬汁出黎，唔洗再用手！！！點解唔早啲有咩咁既野？？？不嬲都覺得自己用手去落醬好嘔心… 關於食物既限制就係唔可以企係小食亭前面食，一定要埋位先可以食。

呢個球場由舊既運動場改建成而家四四正正既足球場。 我地坐既主看台就地地方方咁，左邊龍門後面係 VIP 餐廳（？） 見到果座野背後係舊看台，右邊龍門就好似臨時看台咁用鐵通搭出黎。班主場球迷就係企係鐵通看台上面，間唔中會有人一齊唱幾句打下氣咁。

我地㨂既位係正作客球迷對面，一路食一路睇住佢地係度掛橫額。 呀！！！！年輕既德國仔呀 :-))))) 好期待聽佢地出聲～～～ 主隊其實無咩球迷，科隆已經有三隊，FC, Fortuna, Viktoria，成個 NRW 大把球隊，呢啲廢隊都好難吸引到好多球迷。 佢地本來都有一個球迷組織，但因為比 Fortuna 球迷偷左枝旗所以被迫解散。 而家只可以散亂咁係球場後用英式打氣法（求奇有個人帶頭大叫唱歌）

作客球迷 Red Kaos 帶埋用俄文寫住 Ultras Zwickau 既橫額入場，當佢地既鼓聲響起，我開始有少少毛管戙！當然佢地唔係好多人，但成個作客區入面既人都有一齊出力打氣。 好開心終於可以聽到年輕力壯既德仔打氣聲，哈哈！ 早兩年曾經係 Würzburg 睇過 Zwickau 作客， 論球迷打氣既投入程度，來自東德既 Zwickau 絕對唔會比其他東德大球隊差得去邊。更何況佢地既死黨就係 Dynamo Dresden. 唔多唔少應該都係好兄弟度學到啲野卦？

大部份時間我地對眼都係望住對面班作客球迷，因為球場上面真係無咩好睇。 我都唔知佢地做緊乜？？無技術無組織無策略，好似廢鬥廢咁。 埋門一腳全部都無力既，龍門可以輕鬆接波清波。仲有一兩條友覺得自己技術高超可以一個扭十個然後浪費左勁多機會。我唔係球迷我都睇到勁嬲囉！！去到 70 分鐘終於由主隊開齋，落後既客隊好似終於醒覺咁開始有啲想強攻既姿態，攻下攻下終於成功追和。

完場後我地出發去 Düsseldorf 搵朋友食飯，聽佢地講早兩星期水災點樣浸左佢地間屋個地牢。返到屋企發現全德國今日只有七場波有球迷組織入場打氣，呢場就係其中一場！