02.02.2020
德國足球丙組聯賽 第 22 週
SV Waldhof Mannheim - 1.FC Magdeburg
Carl-Benz-Stadion
賽果： 1:1 (0:0)
入場人數：11813 （約 1800 作客球迷）
門票： 31€ （坐位）
更多相片

今個週末原本諗住睇兩場波，但尋日場熱身賽因為天氣關係取消左，好在仲有今日呢場。 如果今日都被取消既話我真係會喊，因為我期待左好耐要再睇 Magdeburg！ 對上一次睇佢地係佢地前季升班前，等到佢地升左上乙組後無機會見佢地，今次等到佢地有史以來第一次作客 Mannheim，算係去見證下歷史。

自從新年之後都無去過莎蘭，原本就係諗住返法蘭克福時可以去睇埋呢場波。我地係Mannheim 既秘密泊車地點仲未有人發現到，咁多次我地都係泊係球場後面近萊恩河既電視塔附近。由果度行去球場都唔洗十分鐘，最重要係離場時唔會塞車，一開車轉個彎就走得！

唯一恐怖既地方就係要經過作客入口，今次經過時見到一車車既白衣人行入球場。我地不停講英文等佢地唔好覺得我地係黎睇波，行多幾分鐘就到底球場正門。咁大個球場佢得三個入口。一個係作客入口，一個係呢個正口入門，而今季新增既係 Otto-Siffling-Tribüne （即係球迷組織看台）入口。佢地加左呢個入口之後即刻感覺安全好多，佢地平時會派一大班人檢查入場既人，如果比佢地發現你唔係真球迷既話就會踢你出場（我有朋友中過招），而家隔開左佢地，我地就可以自由自在咁食下花生。

今次我地㨂左坐主看台靚位，可以望哂兩邊既球迷～ 左邊係主場球迷，幾乎全黑色，而右邊就係白藍色既作客球迷！ 賽前雙方已經係咁借歌對罵。等到球員出場，大家就開始各自為自己既球隊打氣。

我對兩邊既球迷既期望十分之高，望住作客看台見到近二千個作客球迷都一齊舉高雙手拍手打氣，真係覺得好震撼。 佢地上季升左上乙組，可能唔夠班做升降機跌返落黎丙組，但球迷仍然不離不棄。

相反，主隊 SVW 就係今季既升班馬，賽前係聯賽榜排第四，一直都有機會爭直接升班既席位。 佢地既球迷功力絕對唔會同 FCM 差太遠，主看台 Otto-Stiffling-Tribüne 幾乎企滿，同樣過千人一齊打氣。看台上得幾枝旗人同一枝大旗，其餘都係由球迷既手臂！

我地後面坐左幾個小朋友，全場波吱吱喳喳咁講足全場。最好笑係佢地跟住啲大約唱 你地同 FCK 一樣屎，其中一個小朋友問，邊隊係 FCK 呀？ 另一個答，唔知喎，科隆 （FC Köln）呀？笑死。 仲有問和波完場之後係咪射十二碼，然後另一個又答，唔係囉，要加時先架。

上半場無入球， SVW 下下都迫得好緊，去到下半場開波十分鐘左右，終於比佢地迫到個入球！場波睇落真係唔似會有大比數既錯過，主隊係迫得緊，但客隊都無咩點犯錯。去到近完場時比客隊追和返。 然後終於帶返起作客球迷打氣既動力。

最後有兩個入球睇都唔算差，而球迷既表現就叫做符合預期，唔知係咪期望太高所以覺得只係一般般。離場後我地又要穿過班作客球迷行去秘密停車場，完全唔洗塞車就可以上公路返屋企！

如果你地黎到德國有時間既話真係可以考慮下去睇呢兩隊其中一隊，氣氛方面一定唔會差得去邊。可以用十幾二十歐就感受到德國球迷文化，真係超值架！！！