29.09.2019
德國東北地區聯賽 第十週
Steigerwaldstadion
FC Rot-Weiß Erfurt - BSG Chemie Leipzig
賽果：0:0
入場人數：4882 
門票：18€ （座位）
更多相片

一早計劃左今個星期要向東行去睇東北地區聯賽。 東北地區有唔少有號力既東德球隊。 今場波主客兩隊視對手為死敵，再加上各自既朋友助陣，仲有唔知球會同球迷之間既政治就知道今場波一定有好多野睇。

由屋企出發要揸大約兩個半鐘既車程，大約 11 點到達 Erfurt 市外，再轉搭電車入城。入城之後發現今日係購物星期日！ 德國既週日同埋紅日都係好似死城咁，因為除左餐廳之外，所有商店都要休息。不過一年有大約 4 日可以有一個特別既星期日容許商店開門做生意。咁岩比我地撞正 Erfurt 既購物日，等睇完場波之後可以行陣街先返屋企！

我地通常對東德既城市都有好大期望，德國統一前東德比西德窮，又有唔少地方係二戰時被摧毀，令人覺得東德城市一定又殘又舊。但統一後，德國政府花左好多錢去修復重建東德，重點係佢地唔係將啲建築物拆左佢再起過一座新樓就算，而係盡量保留原有面貌。Erfurt 既市中心好靚，我地穿過內街行行下又行到另一個小中心，有一條好多小店既街仔，行到見到另一個電車站就搭車去球場。

Erfurt 係 Thüringen 既首都，球隊雖然唔係州內之首，但球迷組織係州內規模最大。我地揸車未離開 Hessen 就已經見到佢地開始 mark 地盤，幾附一路去到 Jena。

入場唔洗排隊，一入閘就係我地既看台，㨂左個唔洗起身比人過既位～ 可以安樂睇哂兩邊既球迷。入座前買左野食先，起大份既 Currywurst 同埋第一次係球場食 Gulasch!! （類似炆肉） 主客企位看台都幾乎全滿！ 東德既球隊通常都係咁，有兩三千人入場，八成都係企埋一齊，唔打氣都起埋聚個勢出黎！

Erfurt 既看台前有一大塊黑底白字既大字報寫住 Gegen alle Materialverbote，向球會抗議打氣物資禁制令。 底下仲有一句 Freiheit statt Einschränkungen – Dank der Kurve lebt der Verein auch in schweren Zeiten! 有球迷先有球隊，有球迷先可以令球隊捱過低潮時刻。 佢地準備得呢一塊大字報，我地就知佢地一定有啲特別野準備左黎「扭計」 （球迷就好似小朋友咁，你越唔比佢做佢就越要做） 不過無打氣物資亦無阻佢地用把口黎為球會打氣。 全場九十分鐘無間斷唱歌，仲要超有氣勢！

佢地對面既作客球迷亦都係唔野小。開波前佢地拉開白底綠字既大字報 Wir sind lässig，大約係是9但啦 既意思。 中間有班球迷頭上蓋上幾塊布，然後就放出七彩顏色既煙！到開波後雙方各自為球隊打氣。

Chemie Leipzig 既好朋友係法蘭克福。早幾個星期佢地先係法蘭克福搞左場友誼賽為 Chemie 籌款。而 Erfurt 既朋友係 Chemie 同市宿敵 Lok Leipzig. 佢地既朋友都有入場助陣，種種關係令到呢場波更加有火藥味！！

場上面就無咩特別好睇。主隊幾乎控制哂成場波，但兩邊一球都入唔到。差啲都唔記得呢場波係地區聯賽，仲要係中下游既對戰，對比賽質素真係唔敢有咩要求。

下半場開波前，主隊球迷打開左幾塊細布，然後有一班蒙面走到看台最前…. 放出紅白紫既煙。好靚！！！！一場有兩次 pyro show 睇！作客球迷都即刻作出回應，但佢地唔係放煙，而係係看台前展示佢地從主場球迷偷返黎既（小）組織橫額。

我地後面班阿叔無啦啦都開始發嬲，叫作客球迷食屎。偷得塊橫額返黎，就當然唔係淨係比你睇下條屍啦，無人會想帶返屋企嘛。 所以就係主場球迷眼前一把火燒左塊橫額。 所有主場球迷就嬲上加嬲，瘋狂大鬧，唱歌話佢地同 Jena 一樣咁廢。 作客球迷就小學雞咁用同一首歌唱應佢地 你兩佬去睇 Jena~~~

場波就係咁係對罵聲之下完結。完場後，Chemie 球員先走去球迷前致謝。呢場波係一隊真正由球迷而建既球隊，由最低組別一層一層咁爬返上黎。趁個天開始落雨前我地離場搭車返市中心再去行街。然後心滿意足咁返屋企～～