05.05.2019
德國足球甲組聯賽 第 32 週
史浩克04 對 奧格斯堡
Arena Auf Schalke
賽果：0:0
入場人數： 59,841 人 （約 700 名作客球迷）
門票：41,5€
更多相片
搞左呢個網站超過兩年，一直都係當佢好似細個用 Xanga 咁做日記記低唔同既事，同朋友分享一下睇波既經歷。另一方面，德文版果邊就真係好多德國人都對 Groundhopping 好有興趣，間唔中都有人會同我地聯絡，比左唔少動力我地去運作呢個網站。而我真係無諗過會有朋友以外既香港人睇呢個網，最主要一來德甲無英超咁受歡迎，二來我一季先睇兩三場德甲，其他低組別比賽都可能無咩特別。直到幾個月前有位讀者 e-mail 我地話有睇開呢個網，計劃五月去德國想約我地一齊去睇波！唔知佢知唔知，但我當時真係好開心！！！
但當時因為季尾既賽程一直都未定日期同時間，要等到三月左右先真係決定到可以去睇邊場。臨近季尾，我地都想去睇 SVE 既最後一場主場波或者重要既比賽。最後我地見到史浩克係呢個比賽週星期日踢早場，完全岩哂我地星期六作客 Waldhof 之後星期日再北上。
決定左去睇史浩克之後就緊係即刻買波飛啦。雖然史浩克今季奇廢，但佢地既入場人數無話大幅下跌。睇左幾日啲平價位都係得單丁位，然後有日搵到 41€ 既區域山頂果行仲有連位淨，好快手就買左三張飛。 雖然張波飛好貴，但可以去睇史浩克都仲算可以既～ 話哂都已經有兩年無去過。
呢場原本以為會係護級大戰，點知有三隊波更加廢。雖然紐倫堡係好朋友，但真係佢死好過我地死………. 早一場打比大戰又唔知做乜無啦啦上哂身贏黃色果隊波，然後黎到今場大家只要和波有一分就護級成功。
星期日我地一早八點半左右出發，進入 A3 高速公路後一路向西，離開公路後轉兩個彎就到達目的地。下次再去睇史浩克應該唔洗用地圖都可以搵到路～一如以往我地將架車泊係火車站後面既停車場。 係火車站同我地既讀者 Darren 見面後，就一齊搭地鐵去球場。
以為預早左好多時間，點知去到球場已經得返一個鐘左右就開波。見入口未有大排長龍，就拿拿聲入左場先，然後我地就先去個廁所再係自己個位會合。 入到球場見到北看台準備左 choreo!!!! 睇舖排應該係向三個月前病逝既傳奇領隊 Rudi Assauer 致敬。
AufSchalke 球場要買野食既話只可以用預售卡交易，前年開始佢地仲可以用有植入左晶片既波衫黎比錢（呢個真心唔知係點work）。Anyway，我地拎住張卡去櫃台諗住 check 下有幾多錢，點知佢話我地果張係舊卡已經唔再用得！！！佢地有新機係可以就咁拍卡，但我地果張仲係要插入讀卡機….
之前我都有張法蘭克福既預售卡，後來因為間公司破產執笠所以我無得拎返啲錢。好在史浩克有自己既管理公司去搞呢啲交易卡，佢話我地今季完結前仲可以寄張卡去球隊既餐飲公司度退返錢。嘩，唔去睇呢場波我咪無啦啦又蝕左最少10€？？既然舊卡唔用得就只好要張新卡，新卡唔洗比按金（舊卡要 5€ 按金），我地話要入 15€ 就有 15€ 可以用～ 然後就去買 Currywurst ，可樂同埋芝士條～
係呢啲巨型球場睇波既話可以話個個位都係靚位，即使我地坐最高果行，望落球場個 view 都係好清好靚。但係…… 由於坐得太高太接近屋頂，我地既望向主客看台既視線都被阻… 北看台都還好，但作客看台真係完全見唔到。 所以我地走返落去企係度等開波，等睇開波前既 choreo。
開波前，球迷先一齊唱礦工歌，然後一齊唱會歌。早幾個月，當地既最後一個礦場正式關閉，史浩克當時搞左個好大既感謝儀式向所有礦工致敬。礦場礦工對呢隊波黎講好重要，當年無工人既話就可能唔會有呢一隊波；無呢班工人既後代去支持史浩克的話真係唔知隊波會唔會今時今日。
唱完歌之後，北看台就慢慢展示佢地準備好既 choreo，先用黑白旗去砌成 RUDI! 字眼，然後由高層看台放開大字橫額：Malocher, Macho, Manager － 用三個字黎形容 Assauer：工人，硬漢子，領隊。 點解會用工人黎形容佢？因為史浩克係 kumpel and malocher club，係一隊由老友同工人組成既球隊，稱佢為工人即係稱佢為自己既重要一份子。另外果兩個字唔洗解釋啦，就佢果份麻甩同真男人既氣勢。
係旗海兩邊有兩塊大海報畫出佢捧德國盃。過左一陣黑白旗海變成藍白旗海，中間拉起由球迷畫出黎既 Assauer，一邊抽住雪茄，一邊將 1997 年同史浩克一齊贏既歐協獎盃捧係膊頭上面，一齊回味當年風光年代！
等到 choreo 差唔多完結我地就比保安趕返去自己個位度坐，咁我地就行返上山頂…. 作客球迷開波前大約 10 分鐘先到場。 好在我地埋位前可以影到幾張相。 奧格斯堡既球迷無咩特別，呢場波又唔再重要，成場波聽到佢地既鼓聲，但完全聽唔到佢地唱歌。同上次去睇佢地作客科隆一樣，始終人唔夠多…
場波…. 睇比數就知係悶和。兩隊波明顯唔洗搞咁多野，分享果一分齊齊留係德甲就算。今季我幾乎完全無係週末睇過電視正播，所以我都無機會留意到底史浩克係場上踢成點。 今場係我第一次正正經經咁睇史浩克踢波 ._. 亦都係我今季睇過最無聊既一場波（只以場上黎計）。
雖然我無睇直播，但都有留意場邊新聞。上半季班球迷真係好嬲班球員，覺得佢地唔肯用心出力去踢波。上季史浩克以聯賽亞軍資格去踢歐聯，球迷當時超開心超激動，向隊長 Fährmann 送上自製既隊長臂章，上面印有北看台既公仔，代表戴住呢個臂章既球員除左係球隊既隊長，亦都係北看台既隊長，大家一齊作戰。黎到今季真係唔球隊踢乜，係主場對 Düsseldorf 大敗後，兩位球迷組織成員走左落場，走去副隊長 Stambouli 面前，搶走左佢當時戴住既由球迷所送既隊長臂章，同班球員講：唔好以為球迷既愛戴同尊重係垂手可得，無鬥志又唔想出盡力去為史浩克比賽既話就唔配做球迷既隊長。
有唔少史浩克球迷覺得佢地過左火，但 Fährmann 都話理解點解球迷會咁嬲。雖然佢地好嬲，但咪都係一路跟住隊波去到天涯海角。如果唔 care 隊波既話就唔會嬲啦… 唔通真係可以降班都仲拍哂手咁讚你做得好好？一季時間可以由爭歐聯變爭護級…. 唔發火仲可以點？
看台上面除左有開波前既 choreo 之外，仲有唔少著住紅衫既球迷企係北看台，即係有紐倫堡既朋友到場助陣。佢地仲不時一齊唱 Schalke und der FCN。唯一令我有啲意外既係成場波佢地無唱歌慶祝打比贏波，只係去到完場後先開始叫下 Derbysieger。 仲有恥笑佢地贏唔到聯賽冠軍～同埋賽前一日係球隊成立既 115 週年都係乜野都無… 可能留返最尾果場先黎慶祝？
完場後，佢地有廣播話史浩克二隊來季會升班上返北部地區聯賽，到時會以史浩克既前主場 Parkstadion 作為二隊既主場。 我以為佢地會完全拆左 Parkstadion，但原來會保留一邊看台，算係留返啲歷史係度。 黎緊可能可以計劃同一日去哂 Glückauf-Kampfbahn 同埋 Parkstadion 睇波，了解更多關於呢個礦工城市既歷史！
離場後跟住人潮向地鐵方向行，等左一班車就上到車返去火車站。 係火車站食個 Döner 就去拎車返屋企。雖然週末3點半係最好既開波時間，但有時有 1 點半波都幾正，我地返到屋企先 7 點，仲有成晚可以做自己野！
黎到呢度，今季已經慢慢進入尾聲…. 呢個月都係得返一兩場地區聯賽，再加盃賽或者附加賽。 開始有少少期待暑假可以用週末去買野或者終於可以認真咁裝修下間新屋！！