02.02.2019 德國乙組聯賽 第 20 週 1.FC Heidenheim 對 Dynamo Dresden Albstadion 賽果：1:0 (1:0) 入場人數：11,200 (1500 名作客球迷） 門票： 7€ (企位） 更多相片
上個星期要搞搬屋既野（係呀，仲未搞完，要去到二月尾先真係可以完全脫離舊屋），所以完全無事間睇波。今個星期原先諗住去 Paderborn 對 Fürth 既，但硬係覺得戲碼唔夠所以唔係好想去。睇下其他賽程見到 Heidenheim 今個星期有主場，同 Paderborn 一樣都係三個鐘內既車程，但佢地既對手係 Dynamo Dresden!!! 佢地一把聲可以蓋過十把聲！！
睇中左呢場波之後就即刻睇下球場座位表，睇下買邊區好，座位 30€ 一張，而企位只係 7€。德乙都只係七歐，只係貴我地平時睇開地區聯賽一歐！！？ 我地其實好少㨂企位，因為企位通常即係同啲球迷組織企同一區，亦即係唔可以一次過睇哂兩邊既球迷區。但 Heidenheim 既企位區延申到去禁區頂左右，如果我地去到最遠既話就雖然會有欄杆阻住望草地既視線，但睇球迷黎講完全係 Perfekt!
德乙既週末開波時間通常係係一點鐘，我地要揸兩個半鐘車去既話就要 8 點鐘出發，最後 11 點半到達，拍係山腳一個屬於 Hartmann 藥廠公司既停車場，佢地係 FCH 其中一個主要贊助商，係比賽日會開放停車場比球迷免費泊車，然後對面馬路可以轉乘接駁巴士上山去球場。
佢地既球場現時被 Voith 機械／電子公司冠名贊助，但同 Hartmann 一樣，佢地唔只係本地公司，更加係來自 Heidenheim 既公司，淨係有呢兩間本土大水喉都已經唔洗憂！仲有德國嬰兒毛公仔名牌 Steiff 都係來自同一個地區，所以佢地球隊既吉祥物係一隻超可愛既啤啤熊！！呢隊波既背景其實同 Elversberg 好似，而佢地亦都同 SVE 好有淵源。多年前係 Elversberg 贏波首次升上丙組，而家穩步上揚而家係乙組打滾仲要長期表現唔錯。SVE 可以話以 Heidenheim 既故事黎當做目標，希望可以以一隊小小地區隊慢慢變成高組別既參賽隊伍！
我地對上一次睇 FCH 係作客史特加既同州打比戰，當時對佢地企滿成個作客看台，仲準備左代表球會顏色既藍紅 choreo，聲勢浩大咁為球隊打氣。而睇 Dresden 已經係兩年前復活節既事…. 無諗過時間得咁快！！！！對上一次睇德乙就係上年既復活節….
如果你無留意開乙組或者無留意開球迷新聞既話，我可以好簡單話比你知 Dynamo Dresden 有啲咩特別，第一，佢地係德國足總最怕既球隊，第二，佢地係德國足總最憎既球隊，第三，佢地係無睇落好和善既球迷。上個月佢地既球迷組織宣布會教球迷 Boxing，要做到全民好打……….. 而我就好欣賞佢地不畏強權，不段挑釁德國足總，第一隊波向足總「宣戰」，仲成日好有創意咁搞唔同主題既 choreo 或者遊行。佢地既 K-Block 或者作客看台內既球迷幾乎全部都會一齊打氣，好多人都會認同佢地係德國其中一班最有氣勢既球迷。佢地向足總「宣戰」後，迫到足總終於肯坐低聽各大球迷組織既訴求，一開始都有啲進展，令到足總讓步話唔會集體處罰（例如罰關閉看台／閉門作賽）之類；但傾傾下又傾到談判破裂。所以今個週末有一個新口號：DFB/DFL, es hat gerade erst begonnen…; 足總／足聯，戲肉而家先岩岩開始…
主場球迷組織大約開波前9個字先入場，佢地大約 30 人戴住一樣既紅色冷帽係看台分工掛起橫額。看台上有幾條長繩掛左係度，諗住佢地會有大型 choreo，但如果真係有 choreo 又無理由咁遲先入場，最後佢地真係無用到條繩… 可能係為左下場係足總盃對利華古遜時用？ 除左組織橫額大旗之外，佢地仲忙住係圍欄前掛起藍字白底既超大字報，上面寫住：「Vermummt Aggressiv – Kein Freund – Kein Helfer」用警察宣傳既口號用反話黎寫鬧警察。事源係上場歇冬後第一場主場波，佢地唔知乜事比警察扣查，就連球會都係官網維護球迷，要警察比個交代！開波前，看台上仲有幾塊大字報，同樣都係鬧警察，以當中用既字眼黎睇，睇黎警察上場波關起緊急逃生門唔比球迷離開？
反正大家都知警察既處事方式係常人永遠不能理解，佢話乜就係乜。 Anyway，主場球迷開波時就唱一首佢地好出名既歌，SVE 都有拎左首歌黎用，早兩季季尾不斷狂loop 希望可以做雙冠然後升班。聽到呢首歌就令我地諗起當時球隊腳風超順，真係差少少就可以脫離地區聯賽…. 但 FCH 球迷把聲好快就比作客球迷蓋過，雖然 Dynamo 既人真係大聲，但最大既問題係，主場球迷除左東看區中間一少部份球迷之外，其餘都只係跟住拍手，完全唔會跟住唱歌。我地企果區更加係 8 成都係中老年人，肯拍手已經算係咁。
睇 Dynamo 既球迷就好似睇表演咁，佢地除左用把口仲會有好多手部動作，例如有首歌佢地唱 “Ja wir sind da, das ganze Jahr” 時佢地會係咁揮手。另一首歌佢地會唱到 Dynamo 時會分開三區分別唱 Dy, na, mo. 當日佢地唱既時候，有 dy, 有 na，但個 mo 好似滅左聲咁，呢個時候我地先發現原來係我地既看台既另一盡頭仲有一區都係劃左比作客球迷，但由於佢地既聲向唔係向住我地，所以 mo 就好似無左聲咁，只係得 DY! NA! (!)
我只可以話今場波我大部分時間都係望球迷，但場上真係無咩特別…. 兩隊波都係度拉鋸，主場好好彩咁上半場入左一球，但雙方都無咩入肉既攻勢，入到禁區只係亂射，唔知有無中過龍囉！！
下半場剛開波時，主場球迷吶喊呢度係屬於 FCH 既！然後 Dynamo 佢地集氣超大聲回應 呢度！係！屬！於！DYNAMO！ 當佢地大叫「呢度」既時候我地即刻笑左，因為果一刻真係完全反客為主！作客球迷係作客區拉起白底黑字既大字報，叫球迷既管理層「專心管理球場合組；訓練場地同埋領導下屬」，而佢地既 K-Block 先係「負責球場氣氛, Choreo, 同教育青少年」。
比賽去到尾聲，場波終於開始變得緊張，主場球迷都好驚會臨尾香失分，身邊既球迷開始係咁鬧球員係垃圾！仲係咁係禁區頂犯規，隨時比客隊一個唔該就執返一分。客隊上場領先三球最後被反敗，今場波睇落都唔似有運可以執到分。就係咁，球證吹雞完場！球迷們即刻鬆一口氣慢慢離場。
我地等雙方球迷去到自己既球迷前致謝後就離場行返落山，然後行大約 20 分鐘到市中心，呢個城市意外地靚！ Heidenheim 位於 Schwaben 地區，其中一邊山上有一大座城堡，而市內既屋舊式得黎又好乾淨！呢個地區有咩出名？就係芝面刀削面 Käsespätzle！ 另一樣出名既係類似餃子既物體 Maultaschen。如果你地想試既話，經過 Stuttgart, Freiburg, Augsburg, Karlsruhe 等附近既地方一定要去試！我食過既暫時黎講 Augsburg 某間酒廠既 Käsespätzle 係最好食既，因為佢地係用來自阿爾卑斯山既芝士黎煮！！！！ 而今日我地就上網搵啲多人推介既餐廳，佢有分大份同細份；包沙律同唔包沙律，我地叫左兩大份加沙律，每人一杯野飲，最後叫多杯咖啡，連埋 tips 只係 27€！！
大部份聯賽終於慢慢開 league，黎緊幾個週末我地都已經有哂計劃周圍去睇波！兩星期前北上，今次南下，下星期向東走，再下星期就向西走…. 完全用盡哂法蘭克福既地理好處～～仲有，下個月會去柏林一日遊 😀