05.05.2018
德國西南地區聯賽 第 37 週
FC Astoria Walldorf - SV Elversberg
Dietmar-Hopp-Sportpark
賽果：1:4 (0:2) 
入場人數： 258 （30 名作客球迷）
更多相片

五月五日係偉大既馬克思生忌，上年中國話要趁今年係佢 200 歲生日，要整一個銅像送比佢既鄉下。佢鄉下係邊？德國近盧森堡邊境既小城市 Trier。呢個城市同十個香港人講，十個都應該唔會識。我識，係因為我就係住係 Trier… 而我都係搬左黎呢度住我先知呢度原來有個偉人。試過出城睇完醫生見到一堆大陸人係間屋前面係咁影相，心諗間屋有乜好影？原來係馬克思博物館。

呢一個星期，甚至呢一個月，當地新聞同電台都係咁講呢單野。當中國話要送銅像黎既時候，市政府話佢同過好多唔同部門傾過先決定收呢份禮物喎。講到尾，就係因為可以吸中國人既金先想收呢份禮。我想知如果有一日可以用希特拉個名黎搵錢，唔知德國又會唔會走去整個銅像去吸金？？？

Anyway，原先我地真係諗住去食下花生，順便趁佢開幕時同一眾同胞 mau 係地下影下相，點知原來要跟 SVE 去今季最後一場作客～～Walldorf 位於 Hoffenheim 隔離，同 Hoffenheim 掛得上關係就即刻又係同 Dietmar Hopp 有關。

今次車程大約個半鐘，可以話係短途作客。原本大家諗住今季最後一場作客，不如自己渣車早啲去球場門口 bbq，不過人地個球場外無作客停車場，所以無位比我地b。 巴士出發後大約半個鐘，係 Kaiserslautern 附近塞車，有人就叫司機行第二條路，點知第二條路仲塞，塞左九個字之後司機決定原路折反上返公路塞好過，最後係公路上面塞上十分鐘就過左，但最後浪費左成個鐘係呢一小段路上面囉！！！！！

好啦，終於去到 Walldorf 之前最後一個公路口，見到仲有二十分鐘，應該仲趕得切。點知司機轉錯彎變左向南行！ 未有人發現轉錯彎時，我開左 google maps 出黎睇諗住睇下仲有幾遠，但見到上面藍色果粒點向南邊，我以為 GPS 未 load 到。最後見到路牌變住去 Karlsruhe 先知真係行錯路！！！！咁又花左十分鐘先真係去到 Walldorf，入到條村個司機又迷路搵唔到球場！！！！兜左個大圈，當時已經兩點鐘，架車到達球場時，我地見到班球員已經進場，一字排開咁企係球場中間！！！

大家即刻奔落車向球場跑，好好彩主隊今場開波前花左大約五分鐘向球迷宣布邊個球員會離開，竟然咁都比我地趕到開波前入場。

不過我一入場後就衝左去廁所，個半鐘車程變左三個鐘！！！去完廁所就 join 返大家一齊係太陽下曝曬。由於呢個只係賀芬咸既三隊，所以球場無咩特別，看台只有三級樓梯。不過我地就企正係球隊後備席後面，搞到唔敢亂咁鬧爆我地既領隊。有時真係講下笑咁忍唔住恥笑下自己啲球員比佢地聽到，班球員自己都有偷笑架！！！！

近幾場波我地開始放棄球隊之時 （和波當贏波），佢地又開始落力踢波贏返一場。 今場波佢地都比之前上力踢。上半場，SVE 球員 Benno Mohr 因傷退下，換入前鋒 Koffi，佢一落場就即刻入波為 SVE 領先。 完場後仲領先兩球。

下半場 SVE 都禁住黎攻，雖然主隊追返一球，但我地後來再射入多兩隊好輕易咁拎走三分。 呢三分對聯賽排名無咩影響，但對球隊士氣有好大幫助，球迷們完場後一直唱歌希望球隊可以今年贏莎蘭盃。

離場時要經過小食亭，老闆話仲有幾條腸賣淨，話送比我地唔收錢，班餓鬼就即刻立哂啲野食，連埋枝芥辣醬一齊拎走～～