03.03.2018 德國甲組足球聯賽 第 25 週 奧格斯堡 對 賀芬咸 Schwabenstadion 賽果： 0:2 (0:1) 入場人數： 27,100 (約 400 名作客球迷） 更多相片
呢兩個星期都無咩運行，有幾場想去睇既比賽都因為落雪而取消，諗住三月可以有個好開始，點知等左兩個月既演唱會都因為主音病左要延期，仲有山長水遠去到 Augsburg 諗住去睇場地區聯賽見下奧格斯堡球隊既舊球場，最後又係因為大雪而要延期。
一月尾左右，Kinder 同德國火車公司 Deutsche Bahn 一齊做推廣，買 Kinder Duplo 同 Hanuta 既產品就可以有 10€ 既火車優惠卷，每張訂單每人可以用一張，同一張訂單最多可以四個人用四張，即係每程最多可以平 40€。呢張優惠卷只可以仲係長途火車，即係唔可以用係我地平時搭開既地區火車或者日票之類，同埋訂單要最少 29€ 起。
我地就上 DB 個網度睇下有咩抵搭既長途車，睇中左由 Saarbrücken 到 Augsburg 有直通車，搭四個鐘左右，最平可以去到單程 30€ 左右。頭先講到每張訂單每人可以用一張，我地有兩個人即係可以每次用兩張，然後將去程同回程分開買，咁就可以用盡個優惠平到 40€，最後我地兩人來回連優惠只係 50€，仲要係直通車，真係超抵！不過時間就一般，去程係 3 月 2 日朝早五點半出發，回程就 3 月 3 日夜晚六點三…
3 月 1 日原本要去盧森堡睇演唱會，啲演唱會閒閒地都十點幾十一點先完場，完場後仲要塞車，我地預左應該一點幾先可以訓覺。 最後演唱會取消左，我地可以訓到飽先起身。係收到演唱會延期通知前，我地原定 3 月 2 日星期五夜晚想睇既 奧格斯堡二隊對紐倫堡二隊 都因為天氣問題而延期。 即係我地一連兩日既行程都係我地出發之前已經泡湯。
奧格斯堡二隊既球場係一隊既舊球場，一隊係呢個 Rosenaustadion 用到 2009 年就搬左去新起既 Schwabenstadion。 2012 年前既第三級別聯賽只有分南北兩個地區聯賽，當年既奧格斯堡同 Elversberg 係一個聯賽參賽，所以好多 Elversberg 既老鬼球迷都有去過呢個球場，可以話係一個回憶！Rosenaustadion 係一個好經典既體育場，我地睇新聞見到話有人提議拆左佢用塊地黎起樓，所以我地想去見呢個球場最後一面。 由於球場係由市政府擁有既，暫時黎講市政府都未有意想賣球場，希望佢地可以保留呢個咁靚既球場啦！
好啦，都叫做仲有場德甲波睇，德甲就好少因為天氣問題而延期，係驚佢突然落大雪搞到要延遲開波，最後我地一係就要提早離場，一係就趕唔到火車。 （Touch wood） 點都好，一早買左飛又一直都好期待去旅行，就算無波睇都要出發架啦！
星期五一早去到 Saarbrücken 火車站，好在呢個站係總站，所以架火車一早已經係月台。 上車後搵個靚位就等開車。 搭火車一定會發生既就係火車遲到，但無諗過總站開出既車都可以遲。 我地上車無耐，車長就已經開咪話 Mannheim 既路軌有問題定唔知乜，要遲半個鐘先開始。 好在我地唔洗係月台等車，如果唔係就要零下幾度又大風既天氣下白白等車！班車最後終於六點出發，中途有七個站，經 Mannheim, Stuttgart, Ulm 等等，十點幾左右就到左 Augsburg （搭多一個站就會到 München 啦）。
我地訂左係火車站附近既 Ibis 酒店，諗住第二日睇完波係酒店拎完行李就可以好快去到火車站。到埗後就先去酒店 check in，但我地太早到所以未有房，咁我地就放低行李係酒店 luggage room。我地原先準備左保暖底衫同打底褲諗住第二日睇波先著，但架火車去到 Bavaria 時我地淨係見到雪，而 Augsburg 亦只有 －7 度，我地放低行李前拎返哂啲衫同褲出黎著上身，換完衫就出去做遊客。
Augsburg 市內其實無咩野好做，我地原先都只係預左幾個鐘係市中心行下，睇下啲名勝同飲杯咖啡，然後就去睇波，而家場波取消左我地就多左好多時間周圍行。一開始我地就去左 Rosenaustadion 隔離既公園行，諗住睇唔到場波都想去望下個球場。 行完公園就去行市中心，雖然無咩野行，但我好中意睇呢啲好舊既城市，以前既建築真係好有味道！四點左右就返去酒店 check in 同休息一下。
Check in 十分之順利，唔洗一分鐘就搞掂，然後我同佢講仲有個背包係 luggage room，個職員就去開門比我地去拎行李。一開門，個背包唔係入面，佢都即刻碌大左對眼望住我。 我話 我個背包放左係度架喎。 佢就好驚咁走去搵人幫手，然後經理就好緊張走出黎睇下咩事，問我地洗唔洗飲杯野，問我地幾時放低行李，記唔記得係邊個職員之類，然後就叫我地上房等。
大約十五分鐘之後，經理就上黎道歉，問我地背包入面有無貴重野。 真係好好彩個背包入面只係有衫褲同護膚品之類，有時我會嫌啲電子野重會放低，但今次個背包完全無位塞其他野所以我一直放係手袋自己帶住。 經理叫我地出去買返我地背包入面既野，之類會賠返錢比我地，問我地啲野大約值幾錢。我地一時之間都無特別走去數，話大約 200€ 左右卦。 佢話 ok， 總之比返收據佢佢就會即刻比返現金我地，然後比左張免費餐飲卷我地。
果一刻真係好無奈，雖然話無值錢野姐，但底衫底褲果啲點呀？我有好多野都係係香港用開帶過黎，唔值錢但係而家臨時臨急買唔到啦，坐低回一回魂後就開始寫低有咩要買。 好在保暖底衫一早拎左出黎著，唔係第二日去睇波實會凍死！ 六點左右我地就再出發，啲店舖八點就關門所以我地要把握時間。 係呢一刻突然覺得好在場波取消左，如果唔係因為呢單野搞到我地去唔到睇波的話會更加嬲囉！ 同埋好在今日唔係星期日，亦都唔係係所以商店關門後我地先發現背包失蹤，如果唔係就要反轉條底褲著多日。
最先我地見到藥妝店就入去買梳妝用品，然後經過電訊商就入去買充電插頭同線，淨係呢度就已經差唔多成百歐。然後就去另一間藥妝店買我用緊既護膚品， 因為我有皮膚敏感，有啲護膚品係普通舖頭買唔到，我要逐件睇下啲成份搵返啲類似既代替品。我都知女人特別麻煩，有時成份岩但搽上手試下個質感又唔係好中意又買唔落手，花左最多時間就係係藥妝店，再去百貨公司買底衫褲同背包。最後我地花左差唔多 400€，原本真係以為自己啲野好平 -.- （又或者原來德國啲野真係好貴！） 同埋好在我地只係住一晚所以已經唔算帶得多野！！
到而家我地都唔知個袋去左邊。我地搵哂酒店附近既垃圾桶同偏僻位都搵唔到有野。 我地個背包真係完全無值錢野，到底拎黎做乜 T_T 我地仲有另一個小袋裝滿哂零食用黎搭火車食，連呢個袋都比人拎埋。啲零食係朋友係日本買比我架…… 你知唔知日本而家離我地有幾遙遠！！！！ :'(((((((((
返到酒店，職員好緊張咁問我地買唔買到我地要用既野，我地話買到，但無諗過加加埋埋會咁貴。 佢話唔緊要，最緊要買得返。 我地比哂啲單佢，佢就計下幾多錢，佢要問清楚經理同得佢批準先可以拎公司既現金比我地，最後真係全數比返錢我地。 返到上房就即刻拎啲內衣出黎洗，呢個突然既 shopping tour 令到我地既時間大失預算，係條街度流連左成日，返到酒店已經 8 點幾，休息一陣 9 點幾再出去餐廳食飯時對膝頭同腳板已經開始痛！
黎到德國南部一定要食既就係 Käsespätzle （芝士刀削麵），我地去左當地好出名既 Riegele 啤酒廠食飯，Menu 都唔洗睇就叫啤酒同 Käsespätzle。 佢地用既芝士係德國既 Bergkäse （阿爾卑斯山芝士） 好甜好好味！！！！！食飽後就開始超眼訓，呢一日真係好漫長，由四點鐘起身開始到呢餐飯已經十點幾，返到酒店差唔多十一點。 兩條底褲仲未乾，用左成個鐘用風筒吹乾佢 -_-
第二朝訓飽就落去食早餐，因為尋日太累，所以賽前完全唔想出街，check out 後係酒店飲熱朱古力暖身，坐到一點先離開酒店。今日暖返好多，好感動有 3 度！ 離開酒店後我地去火車站搵 locker 放低背包，向電車站出發搭電車去球場。
去到星期六終於一切如常可以睇波
奧格斯堡呢隊波同自己個城市關係好密切，而呢樣係可以係好多方面睇到出黎。 球隊既會徽上面寫住 FCA 然後下面背竟係紅白色有一棵果仁樹，拎走左 FCA 呢三個字其實就係呢個城市既市徽。 去到比賽日，市內既電車既車頭全部都會掛起一細塊 FCA 既旗仔，話比大家知今日有波睇！每逢比賽日都會有特別班次既電車來往火車站同球場，車程只需大約二十分鐘。
由球場站行去球場要大約五至十分鐘，得一條路唔會行錯。 我地大約兩點就已經到左球場，買左張預付卡買完野食就拿拿聲退返錢，因為完場我地無時間排隊。 球場頂雖然有好大個牌寫住 WWK Arena，但呢個只係冠名贊助商既名，每幾年轉一次，當地既球迷會叫自己個球場做 Schwabenstadion，Schwaben 地區雖然已經被分做 Württemburg 同 Bavaria，唔再正式存在係地圖上，但 Schwäbisch 既文化一直都被當地人好好保存。
球場既外觀就係一堆鐵通痴上去無咩美感，外牆有幾條光管，每當球隊贏波的話球場外牆就會變成綠色慶祝。 場內都係好簡單一層看台，容納人數大約三萬人，係德甲黎講算係好細！佢地既球迷看台係 M Block，球迷組織既地盤係 M Block 既上半層。
開波前我地約左一個奧格斯堡既球迷係場外飲返杯啤酒，交換下資訊，我地先知原來奧格斯堡極之唔妥緬恩斯，所以佢地好希望緬恩斯會降班！傾傾下又發現原來佢既爸爸係莎蘭人，不過佢對莎蘭既認識就唔係好多。 我地搵班球迷組織買球迷頸巾同貼紙，支持下組織活動。 係每個看台入口佢地都有拎住個紅白綠既罐頭為準備 Choreo 籌款。 差唔多夠鐘開波佢就返去佢既 M Block，我地就要去球場既另一邊 A Block 度搵自己個位。
我地坐係第 34 行既 13 12 號位，坐低先發現….. 呢個球場同香港仔運動場一樣，係看台上面有好多條柱，我地個位咁岩唔阻我地睇波，不過影相時永遠都影到條柱就好礙眼囉！ 呢個時候仲有十分鐘左右就開波，主場球迷係正我地對面，而作客球迷就係我地右手邊既角落。開波前當然要唱會歌啦，會歌內容同自己既城市有關，其中一句係 我地係奧格斯堡，然後場內既球迷就會唱下一句既同時會指向作客球迷大叫：但你唔係（我地一份子）！
唉，又係睇賀芬咸。 點解我地睇波成日睇黎睇去都係同一隊波？好耐之前係咁睇 Aue，然後又睇左三場 Leverkusen，返到香港又睇三次東方（黎緊又係睇東方），上星期去完 Hoffenheim 而家又要睇佢地班大佬。 點解唔可以連續睇 Dyanmo 或者 Magdeburg 之類 :/ Anyway… 一望過去右邊即刻嘩左出聲，成個作客看台幾乎吉既。 我地唔係睇緊德組別喎，而家係睇緊德甲喎，德甲都會有咁少人既作客看台 ._. 完全覺得可以拎佢地同 Elversberg 黎比。 但原來…. 佢地既球迷組織唔知因乜原因遲到，開左波大約十分鐘先入場，超忙咁掛起啲橫額大旗等等，仲有塊新既抄 Ellesse logo 既 “nordbaden” 大橫額。 個作客區即刻多左大約 200 人。
Nordbaden 即係 北巴登，上次講話 賀芬咸想成為 Baden-Württemburg 既代表球隊（甚至係代表城市），但其實一講 Baden 無人會諗起佢地囉。而家佢地好似突然搵到自己既地理位置價值走去自封為北巴登代表係想點？ 塊布仲要拉唔直，比中間既欄杆擋住左，好心就搵個靚啲既位先掛啦。 仲有！佢地人少要企係看台中間扮人多唔緊要，但唔明點解佢地既 Capo 成都要企係進佢地幾米遠既 Capo 台度?? 好型??
奧格斯堡既球迷看台雖然滿哂，但完全無咩聲勢。 佢地既企係 M block 上面會一齊打氣既可能只係得一兩千人左右，同埋好多時候會有 Dead Air。 上次係科隆睇佢地作客既時間幾乎完全聽唔到佢地唱歌，原本以為係因為我地離佢地太遠同埋食哂主場球迷既聲所以聽唔到，不過今次黎到佢地主場同樣令人失望。佢地係看台前掛左一塊黑白色既橫額： Kunstprodukt “1899” niemals akzeptieren，永遠唔會認同賀芬咸呢隊無傳統既假球隊。 係開波前佢地拉起一塊紅綠色既橫額： Samstag 15:30 schlägt das Fanherz höher，意指 星期六既三點半睇波開心好多！
佢地係比賽期間唔同時間仲有拉起幾條紅白色橫額，包括：Für immer Reichshofstadion， Reichshofstadion 係一隊奧地利球隊 SC Austria Lustenau 既主場，google 時搵到好多關於清折球場既新聞，估計佢地同 Lustenau 係朋友，所以舉橫額支持佢地。 第二條 Gute Besserung Marco und Frambo 為受傷或者重病既朋友打氣。
第三條係 Wir lassen hier die Puppen tanzen – Alles Gute zu 70 Jahren Puppenkiste，呢個亦都係球隊同城市關係密切既一個例子。 Augsburg 既 Puppet Show 係德國好出名，佢地既 Puppenkiste 劇場今年慶祝 70 週年，球迷借左個看台黎慶祝佢地鄉下既特色！最後一塊就係關於政治既，主要係關於警察既新例。
奧格斯堡既球員我地唔係識好多個，多個德國球員之中我地識既係…. 佢地既隊長 韓國球員 Koo。 我地唔係韓粉，只係好中意睇 Running Man，而佢係某一集既嘉賓所以記得佢！ 奧格斯堡既朋友話間唔中都見到有韓國人特登黎睇佢。 不過呢位 19 號球員今場已經踢得麻麻 （其實成隊波都踢得好差），今場波有個叫 Kilian Jakob 既 20 歲小朋友第一次為球隊上陣，不過下半場被換走時，我地身邊既人都係度感謝主終於換走佢。
上半場賀芬咸有個攻勢就無啦啦入左波，我地兩個都唔知發生咩事，淨係見到班球員停左落黎，然後右邊傳黎微弱既歡呼聲。睇真啲先知原來入波???? 班作客球迷就當然即刻好開心咁係咁唱歌啦。呢場波除左場上 22 個球員之後仲有十幾隻鴿係咁飛黎飛去，佢地一直企係球場頂度睇波，等到啲球員走哂去某一邊，佢地就會飛落球場啄塊草地搵地。 （係呀，又係鴿，上場波啲鴿就死既，今場生鴿好睇好多 :p)
去到半場我地就搵第二個位坐，平時保安只會上半場查飛，呢度去完廁所返入看台佢地都要查飛，所以我地要由自己個 A Block 入看台，係某一行穿過十幾廿個球迷走到去 C Block 搵吉位。 我地問一個伯伯個位原先有無人坐，佢話無呀，放心坐啦。 點知佢個孫就搭嗲話 有呀，明明頭先有人坐。 我碌大隻眼好驚咁望住佢話 咪玩野喎！ 佢爺爺就話：咪聽佢亂 up 啦。 然後個小朋友就笑住走左過黎同我地坐係咁同我地傾計，問我地頭先坐邊，又話場波唔好睇之類。
係場內場外見到唔少人戴利物浦既頸巾或者冷帽，係德國去睇波好少會見到啲球迷著兩隊波以外既衣物，通常都係小朋友著住拜仁或者遊客著唔知咩衫，又或者係同主隊結左盟既球隊。 係喎，奧格斯堡上次係歐洲賽遇上利物浦，啲英國人好中意同啲外隊球迷做朋友，利物浦同慕遜加柏既 friendship 就係咁黎。 當日我地仲聽到有個戴住利物浦冷帽既英國人話 「我上一次黎已經係三年前啦～」。
下半場開波，唔知點解身邊突然多左勁多小朋友，淨係聽到小朋友係度尖叫打氣同 fing 旗。 換位後我地睇波既視線靚左好多，但只係睇到賀芬咸射入第二球。 佢地當中有條友剝哂衫咁勁興奮，但我地就好無奈睇住佢地好開心咁唱歌慶祝。 不過咁，雖然我地好唔中意賀芬咸，但佢地今場波一直打氣到完場係要講下既。下半場奧格斯堡追返一粒… 不過比球證吹左越位，慘！
去到尾段，我地睇下火車有無 delay，如果有 delay 就唔洗趕住走。 我地班車六點三開出，場波五點半完場，由球場行去電車站要十分鐘，加二十分鐘車程同可能要塞車（好驚好似科隆咁），得九個字其實唔係好多時間！ 我地班火車會 delay 大約 15 分鐘，但我地都係怕完全後太多人同時走會上唔到車，最後都係 決定 90 分鐘就離場 （真係迫不得已先提早走人架 /.\）
離場時，呢兩日最開心既一幕出現啦！！！！！佢地係閘口派 Müllermilch 榛子朱古力奶，唔係一杯仔，係一大樽！唔只閘口有，由球場到電車站既路上都有人派。朱古力奶係老少咸宜，如果派啤酒淨係可以大人飲，原本輸波唔開心既球迷都即刻開心返，好多人拎完一枝即刻收埋然後再去下一個人度拎多樽，但其實佢地唔會理你拎左未，總之行埋去佢就會比你，仲有人成盤拎走！哈哈哈哈，上到電車每人手上都起碼有一樽奶，返到市中心望下邊個拎住樽奶就知佢岩岩睇完波！
Müller 係德國奶類制品公司，佢地既總部就係係 Augsburg！唔洗講都知佢地有份贊助隊波啦！唔知會唔會有一日維他奶會贊助香港波，完場後派維他奶呢？ 😀 搭電車返火車站時完全無塞車，雖然呢度人同車都比科隆少，但呢度既交通系統完全可以收科隆皮！ 六點未到我地就已經係火車站拎返背包，然後就去月台旁既麥當勞食野～ 呢度既麥記有復活節活動，每日有唔同優惠，今日係 4€ 買 20 粒麥樂雞，好開心！！！！食飽後班火車就到，飲住朱古力奶坐四個鐘車就返到莎蘭。
呢兩日係 Augsburg 既時間好漫長，但同時又覺得過得好快。 雖然星期五超級黑仔，但都算有不幸中既大幸，好在我無放低副眼鏡，好在著哂啲衫上身，好在場波取消左之類，最後星期六可以安安樂樂咁睇返場波，場波不如所想，但最後有免費朱奶又令我開心返好多。 仲有！原本我地為左去 Augsburg 而放棄 Elversberg，點知佢地又因為大雪而要延期，即係最後我地咩都無 miss…. 唔洗比人鬧唔去睇波～～