11.02.2018 德國西南地區聯賽 第 24 週 Kickers Offenbach - SV Elversberg Stadion am Bieberer Berg 賽果 3:0 (0:0) 入場人數: 5.056 (80 名作客球迷) 更多相片
Stadion am Bieberer Berg 係我第一次跟 Elversberg 作客所到既球場，而 Kickers Offenbach 係我第一次睇西南地區聯賽時既其中一隊波。雖然事隔已經一段時間，但唔知點解呢個球場係我既印象入面特別深刻。
呢個星期係嘉年華週末，係 NRW 北威洲同埋德國西南部重要既節日。 以前啲人係復活節前既四十日起禁食同禁慾，所以就係禁食前拎哂所有就快過期既食物出黎狂歡一次。 較為人認識既就係科隆同埋緬恩斯既大型嘉年華活動，其他大大小小既城市同小鎮都會有各式各樣既慶祝活動，而唔同地區就會有唔同「咒語」，例如科隆會叫 Alaaf （我估大家係普度斯基既 Facebook 上面成日都見）；緬恩斯附近就會叫 Helau 等等， 而莎蘭人就會叫 Alleh hopp （通常會有人先帶頭叫 Alleh，然後大家一齊回應 Hopp）。
德國既嘉年華就好似萬聖節咁，個個都會扮鬼扮馬咁走街。今場波由原定星期六上演被改至星期日，撞正沙蘭各大城市既巡遊慶祝節目，原本諗住應該好多人會為左去玩而唔去睇波，點知最後球迷巴士竟然滿座！ 球會通常會係作客比賽前一星期左右開放巴士報名，等球會知道有大約幾多人想跟車去，然後要向巴士公司預訂巴士，通常會預 44 人巴士，如果太多人就可能會改訂更多座位既巴士或者訂多一架；呢場波亦都如常一星期前開放報名，我地一早打左電話去 Fanshop 留名，而朋友們就有張紙報名。
去到比賽前一日，球迷大使發現因為有一張額外既報名表未有交到球會手上，而經 Fanshop 留位既名額亦一早已經爆滿，即係最後幾乎所有球迷組織既成員都無巴士搭！ 好在係德國每人都有架車，最後就分左幾架車一齊向 Offenbach 出發。
我地係巴士乘客，但車內得返幾個朋友，原本諗住大家可以一齊係巴士內慶祝嘉年華，最後因為小小溝通問題搞到大家要分開，即刻變到好無氣氛！出發前因為落大雪，我地好擔心場波會因為大雪而取消，好在 Offenbach 既球場算比較先進，草披有暖氣可以幫助融雪，所以比賽可以如常進行。
Offenbach 係法蘭克福隔離，坐巴士大約兩個半鐘左右。 巴士內既廁所因為沖水系統結左冰所以無得用，司機唯有每次見到公路休息站都停低黎個 Pipi-Pause 比大家去廁所！ 我地出發時大約 -1 度，係落雨中出發，去到 Offenbach 時應該有大約 3 度，不過當時一直落住雨粉，後來仲越落越大，體感應該得 -5 度！
冬天係歐洲睇波真係要做好準備，呢啲天氣行出街其實唔係好凍，去睇波最大既問題係係場內坐或企定定兩個鐘唔郁只會覺得越黎越凍。上次返香港時，我地係 Uniqlo 買左件 最平既 Heattech 打底 （太厚的話係車內會熱死）加一件衛衣，落雨既話會著多件 T-shirt，多一層保下暖之餘又可以太熱時要剝衫都仲有件可以見下人既衫。 有時會著 leggings 係褲內，不過對腳其實唔會太凍，最凍係腳板，暫時我都仲未諗到方法解決腳板冰凍問題！再加件大褸，係歐洲著大褸一定要著件可以擋風同防水既，球場內成日有怪風，如果件褸唔防水的話遇上落雨或雪就會更加凍。
我自己覺得著幾多都係假，入到場最緊要買返杯熱飲黎暖胃同埋一定要食得夠飽，要由內暖外先會真正暖！ 同埋食飽左先可以飲啤酒時唔覺凍！！入場後我地想買雞肉 Schnitzel，點知佢話要等 10 分鐘，但當時已經得返 10 分鐘就會開波，所以我地只可以半場先再買野食…
主場既球迷看台同其他球場最唔同既就係，龍門後面並唔係站立看台，佢地既站立看台係主看台對面。站立看台即係平價門票，所以佢地大部份球迷（包括球迷組織）都係聚集係主看台對面。 作客門票通常都同主隊既站立看台同價，呢場波既作客飛竟然係 11€！！！！！ 完全係禁住黎搶囉。 佢地上季因為破產而一開季就被扣九分，可以因為咁樣佢地要係球迷身上揸返啲錢返黎幫補下。
Offenbach 係一隊比較老牌既球隊，可惜光風不再，早幾年降班後一直無力爭升班，係去到今季先至表現唔錯排係第二。而佢地既球迷亦都比較傳統同保守，球迷組織相比起其他大球隊（例如死敵 Waldhof Mannheim）黎講可以話十分之細。 打氣歌黎黎去去得幾首，同埋通常都係隊波踢得好先會多人大聲唱歌。
我地係作客區有大約 80 人，台上有老虎、小丑、礦工同墨西哥人等等，個個都五顏六色令到我地個看台好色彩繽紛。 上半場 Elversberg 有多次埋門機會但就係差最後一腳，面對住聯賽次名可以話踢得好好。雖然一直都未開紀錄，但去到半場休息時大家都仲係好樂觀，覺得今場唔係好似上場咁一面倒。
下半場一開波，著紅白衫既 Offenbach 就靠傳中接應射入，1：0。 十分鐘後佢地再黎一個傳中接應射入，2：0。 上半場既攻勢完全無哂。 又唔知點解可以比人咁輕易傳中接應到。 去到臨完場，又黎多一個傳中，一個日本球員頂入網埋齋。 大家都好嬲，係咁問點解防守可以咁差。球證未吹雞完場，主隊已經開始大叫 Sieg! 贏波；而我地亦都開始收旗執野離開。
完場後，雙方球員各自向自己既球迷行去。Elversberg 球員慢慢走過黎時，有幾個球迷走左落去看台底想鬧下啲球員，而球迷組織既成員等到啲球員行到過黎就即刻走，話比佢地知呢場波完全唔可以收貨。 班球員好安靜咁企係看台前捱罵，完全無反駁球迷 （以前總有一兩個球員會鬧返轉頭，咁叻你黎踢丫！），亦都唔係過黎 hea 下拍下手就轉身走人。 當中亦都有人大叫 唔緊要，下場我地再黎過啦！ 企左大約兩三分鐘後佢地先拍手離開。
回程時，大家係巴士上一開始都講返場波，結論係，踢得幾差都好都已經完左，下場波繼續囉～ 然後大家無啦啦進入慶祝嘉年華模式又唱又飲咁玩到返 Elversberg。