07.08.2017 德國西南地區聯賽 第二週 SV Waldhof Mannheim - SV Elversberg Carl-Benz-Stadion 賽果： 3:0 (2:0) 入場人數： 5.061 (70 名作客球迷) 更多相片
一開季就黎連續兩場硬仗，上場對 Saarbrücken 都仲頂得住，今場對 Waldhof Mannheim 真係完全被技術性擊倒。呢場波因為要就電視直播所以被迫由星期日下午改去星期一夜晚；同上季一樣都係開季第三場波夜晚作客 Mannheim。
我第一次睇西南地區聯賽就係去 Mannheim 睇打比戰對 Kickers Offenbach，覺得好震撼。當時有個 Groundhopper 列左張 list 出黎比我㨂想睇邊場波，而 Mannheim – Offenbach 後面佢寫住 (Violent derby!!!)，我就㨂左呢場去睇啦。果陣對地區聯賽無咩認識，無諗過第四級別聯賽都可以咁 q 多人去睇！震撼既係完場後球場外卦哂路要等 Offenbach 球迷係作客區遊行出黎。場外有條一大馬路， 馬路中間有兩條電車軌；Offenbach 球迷係電車軌既對面，一路有 N 隊警察小隊護送佢地行去火車站。我無諗過一場第四級別聯賽都會有咁多球迷，令到地方政府要出動到咁多警察，除左警車仲有騎警同防暴警察個個又高又壯，而我呢面就係一大堆 Waldhof 球迷無理班警察跟住班作客球迷係咁撩交打，仲好多人放響炮彭彭聲係咁嚇到我彈起。
呢場波令到我對 Waldhof 既印象好深，今次跟 Elversberg 再次去到 Carl-Benz 球場既作客區，反正我而家都唔諗住打氣，索性企高少少享受下 Waldhof 球迷既打氣聲。佢地個 capo 有高級聲響，個喇叭勁靚聲 echo 勁正，大聲到我地呢度都聽到！開波前個個都坐哂係度，到球員入場時係龍門後面既球迷就即刻企哂起身準備打氣。
同時佢地係看台前打開一大塊寫住「Nein zu Regionalliga Fernost」既黑白橫額，意思係「向遠東地區聯賽說不」，之後仲有一塊「 SV Waldhof = Widerstand」 － 「SV Waldhof = 反對」。佢地係三支反對同中國 U20 作賽既其中一隊波，好羨慕佢地可以大大聲聲咁話「我地唔要中國啲臭錢」。
開波後佢地就唱 “Steht auf, für der SVW” 叫場內其他球迷為 Waldhof 企起身鼓掌，全場球迷都即刻企係身！！！心入面忍唔住嘩左聲。好多時啲人入場都係覺得你打氣關我咩事，我淨係想入場睇波。但當日場內既球迷全部都會一齊打下氣，唔唱歌都會拍下手咁… 有呢啲球迷真係好難得！
嘩完之後幾分鐘，佢地就入波… 佢地又彈返哂起身慶祝。賽前大家對呢場波都無咩期望，已經差唔多五年未試過作客 Waldhof 贏波。Elversberg 開季兩場波踢得好差，呢場亦都唔例外，再加上 Waldhof 真係踢得好好，佢地每個球員都跑得快過 SVE，身位又贏哂。SVE 全場不斷面對面交失波，傳波又無人接應，個人技術唔夠人好，就連球隊組織都無，真心唔覺得一隊踢到成 pat 屎既球隊可以走去爭升班。
作客球迷自從失第一球後就已經無心機打氣，輸到第二球就直情聲都無埋，好難先捱到去上半場完。下半場開波後主場球迷繼續唱歌打氣，望住佢地龍門後面個個一齊跳住唱歌，同一首歌可以唱足五分鐘，真心佩服！Waldhof 係低組別聯賽徘徊左咁耐都仲有咁多係背後支持既球迷，當然如果佢地升到班的話會有更多人入場，但係第四級別，對住鄉下隊 Elversberg 都有五千人入場睇波，呢啲唔係愛係乜？
當主隊入到第三球，作客球迷都認命了，好多人好無奈咁坐係地下睇埋餘下果十幾分鐘。去到尾段，對面看台突然大叫「 Scheiß DFB」，叫德國足總食屎，原本坐低左既人都企返起身回叫「Scheiß DFB」來回叫左幾次，場上大家雖然係敵對，但德國足總係我地既係場外既共同敵人，Krieg dem DFB。
完場後我地就上巴士離開，有警車為我地開路，仲有幾個警察騎電單車係前面幫我地封路，等我地架巴士可以直行直過唔洗係市內塞車，勁好待遇！
之前都係用 “Elversberg 球迷” 既身份一齊唱歌一齊打氣去睇波，最近借抗議唔打氣而企遠少少靜靜咁睇波，反而睇到唔少我之前睇唔到既野（特別係關於球迷文化方面）。 Waldhof Mannheim，希望佢地今季可以同 Elversberg 一齊升班！
睇埋呢場波我就要執行李返香港，要過多兩個月左右先再可以睇德國波啦～～～