歐霸外圍賽 第一圈次回合 FC Progrès Niederkorn - Rangers FC Stade Josy Barthel 賽果： 2:0 (0:0) 入場人數： 5,534 (約 1,500 作客球迷) 賽事相片
各大聯賽開波前，最令我地期待既就係歐霸外圍賽！歐洲足協抽籤簽宣布第一圈既賽程，我地見到盧森堡既其中一隊波會對格拉斯哥流浪呀！！！德國附近國家既聯賽既級別都比較高，即使佢地要踢外圍賽，講緊既都只係最尾果兩圈，盧森堡既聯賽水平較低，但總共有四隊可以參戰歐聯或歐霸外圍賽，對手都係其他國家既冠軍或亞軍！
蘇格蘭既球迷聽就聽得多，但有得親身既睇下佢地點打氣對我地黎講真係幾難得～ （我地暫時都未有計劃去英國 :\）當 Progrès Niederkorn 出左售票資料後，我地只想盡早去買飛，怕呢場波有機會會賣哂。上星期四去睇 Fola Esch 其實某程度只係因為要去佢地隔離市買飛。Niederkorn 上年年尾我地已經去過佢地主場睇波，如果你地有睇過果篇後記既話，可能記得佢地個 up dup 球場只有一個大門口，無閘口可以分開主場同作客球迷。佢地個球場因為各方面都唔符合歐洲賽事既標準，所以佢地要係盧森堡國家隊既球場出戰。
我地買飛前睇座位表㨂左理想區域，要最平又要同雙方球迷既主要區域保持距離，咁先可以睇到兩方既打氣情況。事前官方宣布會有 2500 張飛分比格流，佢地既區劃左係主看台既對面同角落，而主場球迷區會係另一面既龍門後面 (M區），我地就㨂左 M 區隔壁既 L 區，最平又岩心水～
比賽當日我地為左避開繁忙時間所以走左好多出門口，最後真係完全無塞車超早就搵定位泊好架車就係球場附近散下步。上星期去 Fola 時場內因為要配合歐洲足協啲 on9 條例唔可以用明火煮食定唔知乜，所以只供應唔熱既食物，我地怕今日場內又無熱食所以一早整左韓式飯卷帶去球場食！
去到球場門口時只係六點鐘（開波時間七點九），大閘都未開。但門口已經有唔少格流既球迷，同時有一班 Niederkorn 球迷拎住鼓排頭位準備入場。個鼓一望就記得上次去睇佢地踢聯賽果個有半個人咁高既巨鼓，仲有條友用丹田唱出超響亮既聲勢 AAAAAAAAAAALLEZ PROGRES。望多兩望，點解佢地會同我地用同一個閘既？主場球迷唔係應該用另一個閘入場去 M 區咩？
入場後去到 L 區，只見到一大班著住黑衫既 Niederkorn 球迷係度佈置看台，即刻心知不妙，我地同球迷組織同一個看台！我地唔係怕唔打氣會比人打，係我地根本唔熟於呢度，同埋佢地既丹田同巨鼓打氣方式我地覺得有啲煩囉。我地問企係 M 區同 L 區道閘中間既實q 叔叔可唔可以出我地過去，點知佢話淨係識講法文就收左我地皮。不過我地唔肯放閘，走左去門口售票處問另一個識講英文既哥哥，我地直接同佢講唔想同主場球迷組織一齊坐，問佢可唔可以幫我地換區，佢就帶左我地過 M/L區中間道閘，再搵 M 區既售票處職員幫我地解釋同換票（因為有劃位，要比返個位我地）。好開心，講左好多次 MERCIIIIIII！不過我地最後只係企左係看台既最後，係正積分版下面，可以睇哂兩面既球迷～
Progrès Niederkorn 上星期四作客格拉斯哥時只失一球輸波，今日返到自己地方仍然有反勝既機會。Niederkorn 上季聯賽排第四因而得到佢地第七次出戰歐洲賽既資格！過去六次係歐洲賽只入過一球波亦從來未贏過波。而今仗係 Rangers 自球會 12 年破產重組後第一次重反歐洲賽事，第一次作客歐洲！作為蘇格蘭球壇既傳統勁旅，好多人都睇好格流可以輕鬆打入小組賽，無人諗過 Niederkorn 會有機會贏波。
首回合係格流主場 Ibrox Stadium 全場滿座，有超過五萬名球迷入場。我地諗住今日一定超多作客球迷到場，入場後見到多係好多，但唔係超多…. 有朋友睇到相之後都問我「格流唔係好大架咩？點解得咁少球迷跟作客？」拿，雖然我話唔係超多，但其實都有成 1500 作客球迷 （我一心諗住果 2500 張會賣哂架嘛！）。佢地除左有人，仲掛左超多枝旗。德國人好中意笑英國人成日將啲旗周圍亂咁掛最後搞到唔見左（歐洲 Ultras 好中意偷旗，被偷旗既組織就要解散），成個作客區比大大小小既旗包住哂。
主要作客球迷區有枝我地留意得最多既就係寫住 “UB” 既大旗，上網搵下 UB 點解，原來係自稱 Ultra 組織 Union Bears （格流其中一個花名係熊仔～）仲搵到有一個格流球迷論壇討論 UB 既 ultra 打氣方式到底係咪真係對場內氣氛有幫助，亦都有討論佢地需唔需要 Ultras，有人認為歐洲有 Ultras 唔代表佢地要有。係場內我無逐個留言睇哂，但係似乎 Ibrox 既氣氛其實麻麻 。我無去過蘇格蘭親身睇波所以唔可以作咩評論，係電視上或 Youtube 睇到既片段都未必可信，可能你睇到佢地又唱又跳，但其實只係開波頭五分鐘既事。
而係佢地作客氣氛黎講，我地只可以話真係無咩特別。作客球迷一堆堆慢慢入場後係有跟住喇叭播既歌唱下拍下手咁，間唔中仲唱一啲歐洲比較流行既打氣歌。開波後都聽到佢地弱弱既打氣聲（我地的確離得比較遠，但聽得出真係唔算大聲），開波半個鐘後就連聲都無埋。
Niederkorn 球迷準備左一個小小既黃底白 P 字，驟眼望落去好似太陽蛋好有喜感！！球員入場後佢地都開始打氣，每人拎住一忽仔 choreo 舉高放低咁玩左一陣就「認真」打氣。一開始佢地無乜聲，好多人係區來都係坐係度睇波，係最底果班小朋友先勁有活力，後來唔知邊度黎左個 capo 企左上欄杆帶住啲球迷打氣，大家把聲終於聚集起黎有返啲氣氛！
我地為格流而黎，除左因為想睇下蘇格蘭既球迷，我自己都有小小情意結。話說細個每年都會同朋友去睇七人賽，當時格流每年都會派青年軍黎出戰有留意下咁～年年都認下邊啲球員上年有黎講咁。當年有黎講既球員而家都唔係格流了，不過格流而家有位球員大家一定識： Niko Kranjcar。佢無踢英超後已經唔知佢咩樣，但我想話佢咁多年都仲係果個髮型，一望就認到佢囉。
上半場無咩特別事發生，但 Niederkorn 的確係有啲驚喜，有幾次埋門都起到腳，仲要都幾近磅，完全無比格流禁住黎攻。下半場先係戲肉既開始！雙方都開始踢得越黎越前，格流出盡力想拎作客入球，同時Niederkorn 都想盡快追和！果然第66 分鐘，Niederkorn 靠角球破網！！！！！全個主場區都一定跳起慶祝，當中包括我地都好自然同盧森堡人一齊慶祝，佢地既打氣聲都開始越黎越大。十分鐘後，主隊再次成功接應角球反超前！！！！！！！如果比數到完場維持不變的話，Niederkorn 將會歷史性首次晉級第二圈！
但係格流知道佢地只係射入一球就可以以作客入球優勢踢 Niederkorn 出局，所以佢地係最後十五分鐘轉全攻形，仲制造到超驚險攻勢！有幾次個波都好似玩波子機咁係龍門前面彈黎彈去，有一次彈地以為入硬啦，點知個波向上撞向門楣彈出！仲有幾次格流係禁區內混亂下亂射，但最後只係正正落入主隊守門員懷中。呢啲時候場內既盧森堡人一直都為 Niederkorn 打氣，我地知佢地唔係 Niederkorn 球迷，好多人著住盧森堡其他球隊既波衫，但都好開心咁一直打氣。呢樣令我諗起香港～～ 作客球迷果面我一來聽唔到佢地打氣，二來連動作都唔見佢地做 （例如舉起雙手拍手之類既 “ultra” 打氣方式，或者英國球迷好多時唱歌都會舉起手）。落後係會失望無心機打氣，但佢地隊波一路都攻緊睇落仲有機會入波，唔明點解佢地好似無乜反應咁？？
補時兩分鐘後，球證一吹雞完場，係後備席既職球員衝哂出球場攬住班球員慶祝；同時主場球迷瘋狂尖叫慶祝，唔少人舉起國旗狂 fing ，而球迷組織就放代表球隊既黃色 pyro ～ 唔少人即刻影積分牌留念。後來球員走向球迷組織向佢地致謝。
真係完全無諗過呢場波最後會咁刺激！鼎鼎大名既 Glasgow Rangers 竟然係外圍賽第一圈就出局，唔少媒體用「恥辱」黎形容格流出局，輸比盧甲第四位既球隊真係幾難睇既。但唔知點解我覺得啲英媒自己認為蘇超水平好高所以格流就一定會有好成績？
Niederkorn 係第二圈會迎戰來自希臘既球隊，聽落唔係好吸引所以未知會唔會去睇。。。