20.05.2017 德國 Rheinland-Pfalz/Saar 高級聯賽 第 34 週 Borussia Neunkirchen - FSV Salmrohr Ellenfeldstadion 賽果： 0:1 (0:0) 入場人數： 315 （30 名作客球迷）
好多時候都係因為想睇某隊波或某特別賽事而去睇波，而今次可以算係少有因為球場而慕名入場。Ellenfeldstadion 係好多 Groundhoppers 認定必去既球場，我入時定真係嘩左一聲！
P 同我講過好多次 Neunkirchen 有個好宏偉既球場，可惜球隊風光不在令入場人數得返幾百人。Borussia Neunkirchen 係 1950-60 年代可以算係一枝大球會，當時亦出戰過頂級聯賽，入場人數爆棚，有唔少買唔到飛既球迷更加會爬到看台頂睇波。後來現時既 1. Bundesliga 成立後，西南地區獲分派兩個席位，可惜當時 Neunkirchen 未能搶得一席位，最後由 Kaiserslautern 同 Saarbrücken 代表西南地區出戰德甲。
呢個城市離 Elversberg 只有十分鐘內既車程，係莎蘭既第二大城市，以前係一個製鐵工業城，當年既工廠被政府活化為一個文化中心，上年年尾我地都去左睇一套講關於 Neunkirchen 之父 Carl Ferdinand Stumm 既音樂劇。 Stumm 可以話係當時既工人領導，身為工廠老闆，佢為工人提供醫療同生活保障，令人人有工開有飯食。
有一個字用黎形容工業城市通常都唔會錯，就係「窮」。Neunkirchen 既大工廠現時已經關閉，政府無咩數入，有錢淨都唔會花錢用黎翻新球場，導致 Ellenfeld 球場自 1965 年開始就無再進行過任何翻新工場。佢地最出名既企位看台亦都因為日久失修令到結構不穩而被迫關閉，現時球場內只有三個看台開放。
當日我地回到 Elversberg，先去 SVE 趁地區聯賽最後一週休息日而為球迷搞既 fan festival 食飽，夠鐘就出發去 Neunkirchen。係球場外面已經可以見到主看台外圍，買完飛後要上樓梯先入到球場。樓梯一出就係望住已經關閉既企位看台，已經嘩左一聲，好靚！！！！！！一個超懷舊既看台係正我面前。史浩克既舊主場 Parkstadion 都係超震憾，不過最近佢地開始左清拆工程，而家只可以係相睇返了。
找地去到主看台對面既企位區，左手邊有 NK 既球迷組織，睇黎佢地準備左一大塊橫額諗住陣間打開，我地就一路等睇好戲。賽前 NK 雖然排尾二，但有好多被動因素都可能影響到佢地降唔降班。當中包括西南地區最後要降班既球隊係咪會降落 Rheinland-Pfalz/Saar 高級聯賽；有幾隊球隊傳出有財困有可能會被扣分或被迫降班，最後可能會頂左佢地降班位。但所有既被動因素都要同時發生先可以令 NK 留班，所以今場兩隊都已經可以話係篤定降班，我地想趁 NK 降到第六級別前入場睇，怕降班後會無人入場會好悶！
球員入場時，球會通過超殘舊既破音喇叭播出球迷版既 You’ll Never Walk Alone，播完就開波啦。客隊上半場就射入全場唯一入球，估唔到主看台有作客球迷黎到支持球隊，仲超大聲慶祝！下半場開波無耐，主隊既球迷組織突然開始放彩色既煙同唱歌。球隊當然即刻開咪話球內嚴禁放 pyro，佢地咁做只會傷害到球隊。我地身邊較年老既球迷見到班人放煙即刻勁嬲，係咁鬧爆佢地。從佢地既角度去諗都明點解佢地咁嬲既，可能班友好日唔入場，一入場就走黎放煙搞到球隊被罰。
放完煙後，佢地就打開賽前卷起左既白色橫額，上面寫住「Vorstand Raus」，叫球隊既管理層扯！我地無特別研究當中既問題，但估係係班人覺得球隊係因為管理不善導致今季成績咁差要降班。約十分鐘後聽到場內傳來警車聲，有幾位警察入左場。
非聯賽球隊通常都唔會花錢係比賽日請保安，所以當 NK 見到有球迷放煙「想搞事」後就只好報警。我估啲球迷原本可能準備左啲野完場先做，但最後警察既出現佢地咩都做唔到。完場後聽到警察開咪指球迷組織既區域會關閉，所有身處於該區既球迷統統要接受警察問話同登記先可以離開。
我地離開球場時，發現場外有差唔多 15 架警車！！！15 架！！！加加埋埋有幾十個防暴警察，完全唔知咩事要咁大陣丈？？我懷疑係啲保安吹到勁大講到球場有騷亂咁，搞到啲警察以為好大件事咁派勁多人出黎。
雖然場比賽就無咩水準可言，但都叫做有啲花生食！來季 Neunkirchen 將會是第六級別聯賽，而原本屬於地區聯賽既 FC Homburg 當日亦宣布降班至 Oberliga。即係得返 Elversberg 同 Saarbrücken 係地區聯賽。希望 Elversberg 係升班附加賽可以有好表現繼而升上丙組，為莎蘭爭光