德國冰上曲棍球乙組聯賽 第 31 週 EC Bad Nauheim - ESV Kaufbeuren Colonel-Knight-Stadion 賽果： 2:3 n.O. (1:0, 1:2, 0:0, 0:1) 入場人數： 2.351 (10 作客球迷)
歇冬歇左兩個星期但呢兩個星期要忙聖誕同新年（忙住食野，食完大餐要運動減肥），希望大家都過左個開心聖誕同新一年都健健康康！！
Elversberg 上半季完結後一星期，我地同一班球迷係一個小小既地方提早一齊慶祝聖誕，係聖誕 party 其中一位朋友提起有人邀請大家去睇冰上曲棍球。事源係上年有一位來自 Frankfurt 近郊既冰曲球迷係 Saarland 住左幾個月時去左睇幾場 Elversberg 既比賽，係球場同一班 Elversberg 球迷做左朋友。當佢要返去 Frankfurt 時，佢叫大家有時問可以去睇佢支持既氷曲球隊 EC Bad Nauheim（乙組）。最近佢見大家冬天無波睇就提議大家可以去搵佢一齊睇冰曲。
Bad Nauheim 位於 Frankfurt 以北大約三十分鐘車程，由我地屋企渣車去就要大約三個鐘左右。咁岩我有屋企人黎探我，可以順便帶佢去 Frankfurt 呢啲大城市睇下。
當日我地三個人一早出發，渣左兩個鐘頭車去到 Frankfurt。原本諗住可以有兩三個鐘做下遊客，點知係間餐廳排隊買野食起碼排左九個字。呢間餐廳叫 Vapiano，可以話係我係德國最中意去既一間意大利餐廳，一來要大城市先有（即係我唔係好多機會食到），二來真係幾好食（即叫即係你面前整）。不過當日間餐廳多人到爆，每條隊都有幾個人排緊隊，每個人又幫自己啲 friend order 埋咁。好在我地無行程要趕，只係少左時間睇下個城市。
太陽落山後我地就出發到 Bad Nauheim，原本講到起碼十個人會一齊去睇冰曲，最後計埋我地三個先得六個人！係停車場會合其他人後就行去冰球場（德文叫 Eisstadtion / ice stadium)。早幾年係捷克有睇過大學既冰曲決賽，所以一路都以當時見識過既室內場地同氣氛去期待睇呢場波。買完飛排隊入場先發現，呢個 Colonel-Knight-Stadion 係一個有蓋戶外場！！球場唔係密封架，看台後面乜都無，即係完全無「入左球場會暖啲」呢回事，只可以入場買杯熱飲暖身。
EC Bad Nauheim 現時位於聯賽榜低下游位置，佢地既對手 ESV Kaufbeuren 就排高佢地幾名咁。唔講你又知唔知冰曲都有 ultras 入場打鼓唱歌支持呢？（呢個都係其中一個我地想去睇冰曲既原因） 好可惜當日 Kaufbeuren 既球迷組織因為有幾位球迷被賽會罰 Stadionverbot，所以整個組織決定一齊杯葛今場波，最後只有幾位作客球迷入場。不同我想像唔到如果客隊有組織到場支持會成點既樣，佢地作客區係無圍欄分隔，只係有幾位保安企係路中間望下咁，人人都可以隨便路過所謂既作客區。
係作客區行多幾步就會到球迷組織聚集既區域，佢地已經掛好哂橫額好放定哂啲大旗係欄杆上準備開波時用。趁未開波我就同我細佬講下球迷文化有幾吸引，我係香港睇左咁多年波都無遊說過佢同我一齊睇，我知佢對足球無咩興趣所以都無同佢深入講過啲球迷。今次借呢場波可以同佢講多啲球場看台上既事，果然係現場佢見到啲球迷同感受到啲氣氛後又有啲興趣。
一開始佢想搵個靚位睇波，我又想搵個位影球迷，行去中央看台後面諗住可以睇到波又睇球迷，但啲靚仔只經比人霸哂，淨返既位都係視線會受阻，影左幾張相就即刻返去我地原本企係球迷打氣區附近。
你可以話冰曲同足球差唔多，都係大家搶到個波之後搵機會射入個龍，但係比賽節奏好快，我地對眼成日都追唔切個波。呢一刻佢地係你面前搶緊波，下一秒就已經去左對面龍，再下一秒大家就慶祝入波，我地個頭就打哂問號「下，原來入左波」。
第一回合一完我地去左買野食（呢度都係要買預付卡），佢地既豬扒包只係 3,5euro!!! 第二回合開始我地就跟返大隊入左看台同班球迷組織一齊睇。所謂既球迷結盟就係咁黎，好多時都係因為兩個黎自唔同球會既球迷做左朋友，大家去睇大家既球隊一齊打氣，時間耐左受到越黎越多球迷一齊互相打氣。我地入左球迷區後都有一齊打下拍打下氣（球迷打氣歌好多時都差唔多）。Bad Nauheim 既球迷轉歌轉得好快，佢地每首歌唱兩次就轉另一首，但佢地又真係唱足全場架喎！
三個回合完左之後仍然係2：2打和，要再加時五分鐘（金球制），五分鐘後再分唔到勝負就互射點球分勝負。（平時唔睇冰曲，唔好笑我唔識冰曲啲 term）。 Kaufbeuren 係加時射入一球就完場，主場球迷即刻起身走人。係零下三度企左差唔多三個鐘終於可以上車暖返下！！
以後有機會會去睇下甲組比賽，睇下啲大球會既球迷感受下氣氛。好多 Groundhoppers 趁歇冬都會周圍搵波睇，有啲飛去英國睇波或者飛標（Darts, 啲氣氛又係正到爆！！），有啲就睇冬季運動等等。好在過多兩星期又有波睇啦～～～