德國西南地區聯賽 第二十週 （次輪第一週）
SV Elversberg - SV Eintracht Trier
Waldstadion an der Kaiserlinde
賽果: 2:0 (1:0)
入場人數： 1.571 (200 作客球迷)

國際賽期甲乙丙組無波睇，但地區聯賽就如常繼續。今個比賽週末係下半季既開始，時間過得真係好快。

岩岩呢個星期五我地夜晚要返到 Elversberg 主場，當我地係公路就快到 Elversberg 時，遠處已經見到山後有球場既射燈發出既光。我地趕頭趕命先趕到開波前一個鐘到達，當時已經有好多車泊哂係球場附近。當晚又凍又濕，夜晚睇波真係一個大考驗，原本唔諗住會有好多人去睇，最後竟然都有成千五人入場！

今場波係 Block C1 重開後既第一場晚賽，但當晚又凍又濕，夜晚睇波真係一個大考驗。好在 Elv 終於都開始賣熱紅酒啦！！！！佢地既熱紅酒有點重口味，聞同飲落去第一啖完全只有酒精味，不過真係好保暖。

熱紅酒係香港係似唔係好多人飲咁，但我介紹大家天氣凍既時候可以整返幾杯同家人朋友一齊暖下身，或者裝入暖水壺帶入球場飲。懶既可以去瑪莎買佢地既枝裝 Mulled wine, 返屋企倒落個煲度煲熱佢即可飲用（煲到啲酒出煙就得，唔洗煲到佢滾）。如果你屋企有啲飲唔落口既平價紅酒，係呢個時候就岩用啦！去街市買玉桂同丁香 (Cinnamon and Cloves)，幾蚊就有一包，唔好買 Citysuper 果啲幾十蚊掠水貨，買多個橙，將個橙切開一半，一半可以留返自己食，另一半就切片。然後倒枝紅酒落煲，加2－3條玉桂，一小堆丁香，見到佢開始熱之後跟自己口味落糖，我會落2－3 tbsp 糖。唔洗十五分鐘就有熱紅酒飲啦！冬天去睇波真係唔可以無熱紅酒！茶同熱朱古力呢啲就留返比小朋友飲啦～

講返場波，對手 Eintracht Trier 賽前排係榜尾（賽後都係），成績咁差都仲有大約二百名作客球迷搭一個鐘車到 Elversberg 為自己愛隊打氣！Trier 以前都有係高組別賽事打滾過，所以佢地到現時都仲有一班 ultras 同其他忠實球迷跟佢地周圍走。但如果下季要降班既話就真係唔知仲有無咁多人啦。佢地既球迷有幾首打氣歌都有好突別 beat，聽落去好似有隊鼓隊幫佢地打 beat 咁，有時真係會唔小心跟埋佢地一齊唱。作客球迷帶左五枝大旗去 fing，到完場前得返一枝旗，就知佢地有幾失望。

主場球迷既氣氛我覺得只係一般，我會話作客球迷果面仲好氣氛。上半場個個周圍望討論呢樣又討論果樣，話望到場外有幾個生面口既人，可能係 Trier 既人黎搞事。（幾年前試過 Trier 球迷賽後搵 Elv 球迷搞事） 下半場大家終於專心返場波投入打氣，最後淨勝兩球完場，繼續企係榜首位置。今場波真係無咩特別事好講，只係一場好平常又合理既賽事，榜首贏榜尾，客隊食左一張紅牌，大家開開心心返屋企。

第二朝起身食完早餐就上網睇香港對北韓，EAFF 官網正播無評述，只有球迷既打氣氛，好想快啲可以返香港同大家一齊打氣。。